കശ്മീരിലെ ഝലം നദിയിലൂടെ ഒരു വിനോദസഞ്ചാരി ടൊയോട്ട ഫോർച്യൂണർ കാർ ഓടിക്കുന്ന വീഡിയോ സോഷ്യൽ മീഡിയയിൽ വലിയ രീതിയിൽ വൈറലായിരിക്കുകയാണ്. പൊതുജനങ്ങളുടെ സുരക്ഷയെയും പരിസ്ഥിതി സംരക്ഷണത്തെയും കുറിച്ചുള്ള ആശങ്കകൾ ഉയർത്തുന്ന ഈ പ്രവർത്തിക്കെതിരെ വലിയ രീതിയിൽ വിമർശനങ്ങൾ ഉയർന്നുകഴിഞ്ഞു.
എക്സ് (X) പ്ലാറ്റ്ഫോമിൽ പങ്കുവെച്ച ഈ വീഡിയോയിൽ, നദിയിലെ ശക്തമായ നീരൊഴുക്കിനെ പ്രതിരോധിച്ച് എസ്യുവി പതുക്കെ മുന്നോട്ട് നീങ്ങുന്നത് കാണാം. ഡ്രൈവർ കാറിനുള്ളിലിരുന്ന് തന്നെയാണ് ഈ സാഹസികത മൊബൈലിൽ പകർത്തിയത്. നദീതീരത്ത് നിന്നിരുന്ന നിരവധി ആളുകളും ഈ രംഗം ഫോണിൽ പകർത്തുന്നുണ്ടായിരുന്നു. നദിയിലെ ഒഴുക്കും പാറക്കല്ലുകൾ നിറഞ്ഞ അടിത്തട്ടും വകവെക്കാതെ, വണ്ടി എവിടെയും കുടുങ്ങാതെ സുരക്ഷിതമായി മറുകരയിലെത്തി. ആർക്കും പരിക്കുകളോ വണ്ടിക്ക് കേടുപാടുകളോ സംഭവിച്ചിട്ടില്ല.
അപകടങ്ങളൊന്നും കൂടാതെയാണ് വണ്ടി മറുകരയിലെത്തിയതെങ്കിലും, സോഷ്യൽ മീഡിയയിലെ കുറച്ചു ലൈക്കുകൾക്കും ശ്രദ്ധയ്ക്കും വേണ്ടി മാത്രം എന്തിനാണ് ഇത്തരത്തിൽ നദിയിലൂടെ വണ്ടി ഓടിക്കുന്നത് എന്ന് നിരവധി ആളുകൾ ചോദ്യം ചെയ്തു. ആളുകളുടെ ചിന്താഗതിയാണ് ഇവിടെ പ്രശ്നമെന്നും, അടിസ്ഥാന സൗകര്യങ്ങളുടെ കുറവ് പറഞ്ഞ് അധികാരികളെ എപ്പോഴും കുറ്റം പറയുന്ന നമ്മൾ സ്വന്തം ഉത്തരവാദിത്തങ്ങൾ മറക്കുകയാണെന്നും വീഡിയോയ്ക്ക് താഴെ വന്ന ഒരു കുറിപ്പിൽ പറയുന്നു.
ഇത്തരം നിയമലംഘനങ്ങൾ നടത്തുന്നവർക്കെതിരെ കടുത്ത ശിക്ഷാനടപടികൾ സ്വീകരിക്കണമെന്ന് പലരും ആവശ്യപ്പെട്ടു. വിദേശരാജ്യങ്ങളിൽ കർശനമായ നിയമപാലനം ഉള്ളതുകൊണ്ടാണ് ഇന്ത്യക്കാർ അവിടെ കൃത്യമായി ജീവിക്കുന്നതെന്നും, ഇവിടെയും വണ്ടി പിടിച്ചെടുക്കുകയും ലക്ഷ രൂപ പിഴ ചുമത്തുകയും ജയിൽ ശിക്ഷ നൽകുകയും വേണമെന്ന് ആളുകൾ കമന്റ് ചെയ്തു.
സുരക്ഷാ പ്രശ്നങ്ങൾക്ക് പുറമെ, പ്രകൃതിദത്ത ജലാശയങ്ങളിലേക്ക് വാഹനങ്ങൾ ഇറക്കുന്നത് ഉണ്ടാക്കുന്ന പരിസ്ഥിതി ആഘാതത്തെക്കുറിച്ചും പലരും ആശങ്ക പ്രകടിപ്പിച്ചു. വണ്ടികളിൽ നിന്നുള്ള ഇന്ധനവും ഓയിലും വെള്ളത്തിൽ കലരുന്നത് നദിയിലെ ജീവജാലങ്ങൾക്ക് വലിയ ഭീഷണിയാണ്. കശ്മീരിലെ ഏറ്റവും പ്രധാനപ്പെട്ട ജലാശയമായ ഝലം നദി അവിടുത്തെ കൃഷിക്കും ജനജീവിതത്തിനും ഏറെ നിർണായകമാണ്. കശ്മീരി പണ്ഡിറ്റുകൾ വളരെ പവിത്രമായി കരുതുന്ന ഈ നദിയെ മലിനമാക്കിയവർക്കെതിരെ എന്ത് നടപടിയാണ് സ്വീകരിക്കുകയെന്ന് ചിലർ ചോദിച്ചു.
വലിയ എസ്യുവി കാറുകൾ നദികളിലൂടെയും ചെളിയിലൂടെയും അനായാസം ഓടിച്ചുപോകുന്ന രീതിയിലുള്ള പരസ്യങ്ങളാണ് ആളുകളെ ഇത്തരം സാഹസികതകൾ ചെയ്യാൻ പ്രേരിപ്പിക്കുന്നതെന്നും ചില സോഷ്യൽ മീഡിയ ഉപയോക്താക്കൾ അഭിപ്രായപ്പെട്ടു.
