മഴക്കാലത്തിന്റെ വരവ് ദൈനംദിന ജീവിതത്തിൽ ചില ബുദ്ധിമുട്ടുകൾ ഉണ്ടാക്കാറുണ്ട്. അതിൽ ഏറ്റവും പ്രധാനപ്പെട്ട ഒന്നാണ് വസ്ത്രങ്ങൾ ഉണങ്ങാൻ എടുക്കുന്ന താമസം. മേഘാവൃതമായ അന്തരീക്ഷം കാരണം വസ്ത്രങ്ങൾ എത്ര നന്നായി കഴുകിയാലും ഡിറ്റർജന്റുകൾ ഉപയോഗിച്ചാലും അവയിൽ ഒരുതരം ഈർപ്പവും അഴുക്ക് മണവും അവശേഷിക്കാറുണ്ട്. ഇത് ശ്രദ്ധിക്കാതിരുന്നാൽ തുണികളിൽ പൂപ്പൽ പിടിക്കാനും അത് വസ്ത്രങ്ങൾ നശിച്ചുപോകാനും കാരണമാകും. എന്നാൽ ചില ലളിതമായ വഴികളിലൂടെ വസ്ത്രങ്ങളിലെ ഈ അസുഖകരമായ മണം പൂർണ്ണമായും മാറ്റിയെടുക്കാൻ സാധിക്കും.
വസ്ത്രങ്ങളിൽ ദുർഗന്ധം വരുന്നത് തടയാനുള്ള ഏറ്റവും ഫലപ്രദമായ വഴി, അവ മടക്കി വെക്കുന്നതിന് മുൻപ് പൂർണ്ണമായും ഉണങ്ങിയിട്ടുണ്ടെന്ന് ഉറപ്പുവരുത്തുകയാണ്. ചെറിയ ഈർപ്പമുണ്ടെങ്കിൽ പോലും അലമാരയിൽ വെക്കുമ്പോൾ തുണികൾക്ക് മോശം മണമുണ്ടാകും. പുറത്തിട്ട് ഉണക്കാൻ പറ്റിയില്ലെങ്കിൽ ഫാനോ, ഇൻഡോർ ഡ്രൈയിങ് റാക്കോ അല്ലെങ്കിൽ നല്ല കാറ്റും വെളിച്ചവും കയറുന്ന മുറിയോ വസ്ത്രങ്ങൾ വേഗത്തിൽ ഉണക്കിയെടുക്കാൻ ഉപയോഗിക്കാം.
വസ്ത്രങ്ങൾ കഴുകി അലക്കി എടുക്കുന്ന അവസാന ഘട്ടത്തിൽ ഒരു കപ്പ് വിനാഗിരി ചേർക്കുന്നത് വസ്ത്രങ്ങളിലെ ദുർഗന്ധം മാറ്റാൻ സഹായിക്കും. ഇത് വസ്ത്രങ്ങളിലെ മോശം മണം ഇല്ലാതാക്കാനും ഈർപ്പം നിലനിർത്തുന്ന ഡിറ്റർജന്റിന്റെ അംശങ്ങൾ നീക്കം ചെയ്യാനും നല്ലതാണ്. വസ്ത്രങ്ങൾ ഉണങ്ങിക്കഴിയുമ്പോൾ വിനാഗിരിയുടെ പുളിപ്പുള്ള മണം തനിയെ മാറിക്കൊള്ളും.
മറ്റൊരു മികച്ച അടുക്കളക്കൂട്ടാണ് ബേക്കിംഗ് സോഡ. സാധാരണ ഉപയോഗിക്കുന്ന ഡിറ്റർജന്റിനൊപ്പം അല്പം ബേക്കിംഗ് സോഡ കൂടി ചേർത്ത് വസ്ത്രങ്ങൾ കഴുകിയാൽ വസ്ത്രങ്ങളിലെ കഠിനമായ ദുർഗന്ധം മാറി അവയ്ക്ക് നല്ല പുതുമ ലഭിക്കും.
അതുപോലെ തന്നെ വാഷിംഗ് മെഷീനിൽ വസ്ത്രങ്ങൾ കഴുകി കഴിഞ്ഞയുടൻ തന്നെ പുറത്തെടുക്കാൻ ശ്രദ്ധിക്കണം. നനഞ്ഞ തുണികൾ മണിക്കൂറുകളോളം മെഷീനകത്ത് തന്നെ കിടന്നാൽ അതിൽ നിന്ന് പെട്ടെന്ന് ദുർഗന്ധം വരാൻ സാധ്യതയുണ്ട്. അങ്ങനെ വന്നാൽ വസ്ത്രങ്ങൾ വീണ്ടും കഴുകേണ്ടി വരും.
മഴക്കാലത്ത് വസ്ത്രങ്ങൾ സൂക്ഷിച്ചുവെക്കുന്നതിലും ശ്രദ്ധ വേണം. അലമാരയ്ക്കുള്ളിലെ ഈർപ്പം മാറ്റാൻ സിലിക്ക ജെൽ പാക്കറ്റുകളോ, മോയ്സ്ചർ അബ്സോർബറുകളോ അല്ലെങ്കിൽ വേപ്പിലയോ അലമാരയ്ക്കുള്ളിൽ വെക്കാവുന്നതാണ്. ഇത് അലമാരയിലെ ഈർപ്പം കുറയ്ക്കാനും പൂപ്പൽ ഉണ്ടാകുന്നത് തടയാനും സഹായിക്കും. ദിവസവും കുറച്ചു സമയം അലമാരയുടെ വാതിലുകൾ തുറന്നിടുന്നത് വായുസഞ്ചാരം വർദ്ധിപ്പിക്കും.
അവസാനമായി, അലമാരയ്ക്കുള്ളിൽ വസ്ത്രങ്ങൾ കുത്തിനിറച്ച് വെക്കാതിരിക്കുക. വസ്ത്രങ്ങൾക്കിടയിൽ അല്പം സ്ഥലം നൽകുന്നത് വായുസഞ്ചാരം സുഗമമാക്കുകയും ഈർപ്പം തങ്ങിനിൽക്കുന്നത് തടഞ്ഞ് തുണികൾ കൂടുതൽ കാലം നല്ല പുതുമയോടെ ഇരിക്കാൻ സഹായിക്കുകയും ചെയ്യും.
