വേനൽക്കാലം കടുക്കുന്നതോടെ വൈദ്യുതി ബില്ല് വർദ്ധിപ്പിക്കാതെ വീട് തണുപ്പിക്കുക എന്നത് വലിയൊരു വെല്ലുവിളിയാണ്. അമിതമായ ഉഷ്ണതരംഗം കാരണം ചിലയിടങ്ങളിൽ എയർ കണ്ടീഷണറുകൾ പോലും പരാജയപ്പെടുന്ന അവസ്ഥയാണുള്ളത്. ഈ കഠിനമായ ചൂടിനെ പ്രതിരോധിക്കാൻ പല ഇന്ത്യൻ കുടുംബങ്ങളും ഇപ്പോൾ പഴയകാല പരമ്പരാഗത രീതികളിലേക്ക് തിരിച്ചുപോവുകയാണ്. അതിലൊന്നാണ് രാമച്ചം കൊണ്ട് നിർമ്മിച്ച കർട്ടനുകൾ. ചെലവേറിയതും പരിസ്ഥിതിക്ക് ദോഷകരവുമായ ആധുനിക സംവിധാനങ്ങൾക്ക് പകരം രാമച്ചം കർട്ടനുകൾ ഉപയോഗിക്കുന്നതിന്റെ ഗുണങ്ങൾ പലരും ഇന്ന് സോഷ്യൽ മീഡിയയിലൂടെ പങ്കുവെക്കുന്നുണ്ട്.
ഇന്ത്യൻ വീടുകളിൽ നൂറ്റാണ്ടുകളായി ഉപയോഗിച്ചുവരുന്ന സുഗന്ധമുള്ള ഒരു പുല്ലാണ് രാമച്ചം. ഇത് നെയ്തെടുക്കുന്ന കർട്ടനുകൾ ജനലുകളിലോ വാതിലുകളിലോ തൂക്കിയിട്ട് അതിൽ വെള്ളം തളിക്കുമ്പോൾ, പുറത്തുനിന്നുള്ള ചൂടുവായു ഇതിലൂടെ കടന്ന് തണുത്ത കാറ്റായി അകത്തേക്ക് എത്തുന്നു. പണ്ട് കൊട്ടാരങ്ങളിൽ പോലും രാജാക്കന്മാരെ തണുപ്പിക്കാൻ ഉപയോഗിച്ചിരുന്ന ഈ വിദ്യ ഒരു ‘നാച്ചുറൽ എസി’ പോലെയാണ് പ്രവർത്തിക്കുന്നത്. വൈദ്യുതി ആവശ്യമില്ലാത്തതിനാൽ ഇത് തികച്ചും പരിസ്ഥിതി സൗഹൃദവും ലാഭകരവുമായ മാർഗ്ഗമാണ്.
തണുപ്പിനോടൊപ്പം തന്നെ രാമച്ചത്തിന്റെ മനംമയക്കുന്ന സുഗന്ധം വീടിനുള്ളിൽ ഒരു പ്രത്യേക ഉന്മേഷം നൽകുന്നു. കൃത്രിമമായ റൂം ഫ്രഷ്നറുകളെ അപേക്ഷിച്ച് രാമച്ചത്തിന്റെ ഗന്ധം തികച്ചും പ്രകൃതിദത്തവും മനസ്സിന് ശാന്തി നൽകുന്നതുമാണ്. ഇവ പരിപാലിക്കാനും വളരെ എളുപ്പമാണ്; ഇടയ്ക്കിടെ അല്പം വെള്ളം തളിച്ചു കൊടുത്താൽ മാത്രം മതിയാകും. ശരിയായ രീതിയിൽ സൂക്ഷിച്ചാൽ വർഷങ്ങളോളം ഇവ ഉപയോഗിക്കാൻ സാധിക്കും. എയർ കണ്ടീഷണറുകളുടെ ഉപയോഗം കുറച്ചുകൊണ്ട് വേനൽക്കാലത്തെ ഉച്ചസമയങ്ങളിൽ പോലും വീടിനുള്ളിൽ സുഖകരമായ അന്തരീക്ഷം നിലനിർത്താൻ രാമച്ചം കർട്ടനുകൾ സഹായിക്കുന്നു.
