മുപ്പതുകളിലേക്ക് കടക്കുമ്പോൾ മിക്കവരും തങ്ങളുടെ ജോലിതിരക്കുകളിലും ഉത്തരവാദിത്തങ്ങളിലും മുഴുകുന്നത് സ്വാഭാവികമാണ്. ഈ തിരക്കിനിടയിൽ പലപ്പോഴും സ്വന്തം ആരോഗ്യം ശ്രദ്ധിക്കാൻ ആരും സമയം കണ്ടെത്താറില്ല. എന്നാൽ, ശരീരത്തിനുള്ളിൽ പല ഗുരുതരമായ ആരോഗ്യപ്രശ്നങ്ങളും നിശബ്ദമായി രൂപപ്പെടാൻ തുടങ്ങുന്ന പ്രായമാണിതെന്നാണ് വിദഗ്ധർ മുന്നറിയിപ്പ് നൽകുന്നത്. കൃത്യസമയത്ത് ആരോഗ്യപരിശോധനകൾ നടത്തിയാൽ ഇത്തരം പ്രശ്നങ്ങൾ തുടക്കത്തിൽ തന്നെ കണ്ടെത്താനും ചികിത്സിച്ച് ഭേദമാക്കാനും സാധിക്കും. ഇത് ഭാവിയിലുണ്ടായേക്കാവുന്ന വലിയ ശാരീരിക ബുദ്ധിമുട്ടുകളെ ഒഴിവാക്കാൻ സഹായിക്കും.
മുപ്പത് വയസ്സിന് ശേഷം ശരീരം പലവിധത്തിലുള്ള മാറ്റങ്ങളിലൂടെ കടന്നുപോകാറുണ്ട്. പ്രീ-ഡയബറ്റിസ് (പ്രമേഹത്തിന് തൊട്ടുമുമ്പുള്ള അവസ്ഥ), ഫാറ്റി ലിവർ, തൈറോയ്ഡ് വ്യതിയാനങ്ങൾ തുടങ്ങിയ പ്രശ്നങ്ങൾ പുറമേക്ക് ലക്ഷണങ്ങളൊന്നും കാണിക്കാതെ തന്നെ ഈ പ്രായത്തിൽ ശരീരത്തിൽ വളരാം എന്ന് ഇന്ത്യാ ഗവൺമെന്റ് നടത്തിയ പഠനങ്ങൾ സൂചിപ്പിക്കുന്നു. രോഗലക്ഷണങ്ങൾ പ്രകടമായി തുടങ്ങുമ്പോഴേക്കും ചികിത്സ സങ്കീർണ്ണവും ദൈർഘ്യമേറിയതുമായി മാറിയിട്ടുണ്ടാകും. അതുകൊണ്ടുതന്നെ പ്രതിരോധ നടപടികൾ സ്വീകരിക്കാൻ ഏറ്റവും അനുയോജ്യമായ പ്രായമായാണ് മുപ്പതുകളെ കണക്കാക്കുന്നത്.
രക്തപരിശോധനകൾ ഒരിയ്ക്കലും അവഗണിക്കരുത്. ഫാസ്റ്റിംഗ് ബ്ലഡ് ഷുഗർ, HbA1c തുടങ്ങിയ പരിശോധനകളിലൂടെ ശരീരത്തിലെ പഞ്ചസാരയുടെ അളവ് കൃത്യമായി മനസ്സിലാക്കാം. ഇതിൽ HbA1c ടെസ്റ്റ് കഴിഞ്ഞ മൂന്ന് മാസത്തെ ശരാശരി പഞ്ചസാരയുടെ അളവ് വ്യക്തമാക്കുന്നതിനാൽ പ്രമേഹസാധ്യത മുൻകൂട്ടി അറിയാൻ സഹായിക്കും. അതുപോലെ തന്നെ ലിപ്പിഡ് പ്രൊഫൈൽ പരിശോധനയും വളരെ പ്രധാനമാണ്. ഇത് കൊളസ്ട്രോളിന്റെ അളവ് മാത്രമല്ല, ഹൃദയാരോഗ്യവുമായി ബന്ധപ്പെട്ട മറ്റ് സൂചനകളും നൽകുന്നു. ചിലപ്പോൾ കൊളസ്ട്രോൾ സാധാരണ നിലയിലാണെന്ന് തോന്നിയാലും ട്രൈഗ്ലിസറൈഡുകളിലോ എച്ച്ഡിഎൽ (HDL) അളവിലോ ഉള്ള വ്യത്യാസം ഹൃദയസംബന്ധമായ പ്രശ്നങ്ങൾക്ക് കാരണമായേക്കാം.
മദ്യപിക്കാത്തവരിൽ പോലും ഇന്ന് ഫാറ്റി ലിവർ എന്ന അവസ്ഥ വ്യാപകമായി കണ്ടുവരുന്നുണ്ട്. ആദ്യഘട്ടത്തിൽ ലക്ഷണങ്ങൾ പ്രകടമാക്കാത്ത ഈ രോഗം പിന്നീട് വലിയ ആരോഗ്യപ്രശ്നങ്ങളിലേക്ക് നയിക്കാം. ഒരു സാധാരണ അൾട്രാസൗണ്ട് സ്കാനിംഗിലൂടെ ഫാറ്റി ലിവർ കണ്ടെത്താൻ സാധിക്കുമെങ്കിലും പലരും ഈ പരിശോധന നടത്താൻ മടിക്കുന്നു. ശരീരഭാരം എന്നത് കേവലം ഒരു അക്കമല്ലെന്ന് തിരിച്ചറിയണം. ബിഎംഐ (BMI) പരിശോധിക്കുന്നതിനൊപ്പം ശരീരത്തിലെ കൊഴുപ്പിന്റെയും പേശികളുടെയും അനുപാതം മനസ്സിലാക്കേണ്ടതും അത്യാവശ്യമാണ്. പുറമെ നിന്ന് നോക്കുമ്പോൾ ആരോഗ്യവാനായി തോന്നുന്ന ഒരാളുടെ ശരീരത്തിനുള്ളിലെ കൊഴുപ്പ് ഭാവിയിൽ വില്ലനായി മാറിയേക്കാം.
ഹൃദയത്തിന്റെയും തൈറോയ്ഡിന്റെയും പ്രവർത്തനം കൃത്യമായി പരിശോധിക്കേണ്ടതും അനിവാര്യമാണ്. തൈറോയ്ഡ് പ്രശ്നങ്ങൾ തുടക്കത്തിൽ ലക്ഷണങ്ങൾ കാണിക്കില്ലെങ്കിലും പിന്നീട് അത് ഊർജ്ജക്കുറവിനും മാനസികാവസ്ഥയിലെ മാറ്റങ്ങൾക്കും ദഹനപ്രക്രിയ തടസ്സപ്പെടുന്നതിനും കാരണമാകും. കൂടാതെ വിറ്റാമിൻ ഡി, വിറ്റാമിൻ ബി12, അയൺ എന്നിവയുടെ കുറവ് ഇന്ന് യുവാക്കളിൽ സാധാരണമാണ്. പലപ്പോഴും അമിതമായ ക്ഷീണമോ മാനസിക സമ്മർദ്ദമോ ആണെന്ന് കരുതി നാം അവഗണിക്കുന്ന പല ലക്ഷണങ്ങളും ഇത്തരം പോഷകക്കുറവ് മൂലമാകാം. കൃത്യമായ ഇടവേളകളിലുള്ള ആരോഗ്യപരിശോധനകൾ ഇത്തരം കുറവുകൾ പരിഹരിക്കാനും മികച്ച ആരോഗ്യം നിലനിർത്താനും സഹായിക്കും.
