ഒരു പെൺകുട്ടിയുടെ ആദ്യ ആർത്തവം കുടുംബം ആഘോഷിക്കുന്ന ഹൃദയസ്പർശിയായ വീഡിയോ വൈറലായി. ഈ വീഡിയോക്ക് 14 ദശലക്ഷത്തിലധികം കാഴ്ചക്കാരുണ്ട്. ആൺകുടുംബാംഗങ്ങൾ അവളുടെ കാലിൽ പണം വെച്ച് അനുഗ്രഹം വാങ്ങുന്ന ഹൃദയസ്പർശിയായ ഈ ചടങ്ങ് സ്നേഹവും, ബഹുമാനവും, സാംസ്കാരിക പാരമ്പര്യങ്ങളും വിളിച്ചോതുന്നു.
വീഡിയോയിൽ, ജീവിതത്തിലെ ഒരു സുപ്രധാന നാഴികക്കല്ല് കുടുംബം ആഘോഷിക്കുമ്പോൾ ആയുഷ എന്ന പെൺകുട്ടി വാതിൽക്കൽ നിൽക്കുകയാണ്. ഈ സന്തോഷത്തിൽ വികാരഭരിതയായ അവൾ കരയുന്നുണ്ട്. കുടുംബം അവളെ സ്നേഹവും ബഹുമാനവും കൊണ്ട് മൂടുകയാണ്. അതിശയകരമായ ഒരു നിമിഷത്തിൽ, കുടുംബത്തിലെ ഏറ്റവും ഇളയ ആൺകുട്ടി മുതൽ മുതിർന്നവർ വരെ അവളുടെ കാലിൽ പണം വെച്ച് അനുഗ്രഹം വാങ്ങുന്നു.
“നിങ്ങളുടെ കുടുംബം ആദ്യ ആർത്തവം ഇങ്ങനെയൊക്കെയാണ് ആഘോഷിക്കുന്നതെങ്കിൽ” എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്. ഇന്ത്യയിലെ പല പ്രദേശങ്ങളിലും കാലങ്ങളായി നിലനിൽക്കുന്ന ഒരു ആചാരമാണിത്. പ്രത്യേകിച്ച് തെക്കേ ഇന്ത്യയിൽ സാധാരണയായി കാണുന്ന ഋതുമതിയാകുമ്പോഴുള്ള ആഘോഷങ്ങൾ ഒരു പെൺകുട്ടി സ്ത്രീയായി മാറുന്നതിനെ സൂചിപ്പിക്കുന്നു. ഈ ചടങ്ങുകൾ സന്തോഷത്തോടെയും ആദരവോടെയും കുടുംബാംഗങ്ങൾ ഒരുമിച്ചാണ് ആഘോഷിക്കുന്നത്.
സ്ത്രീകളുടെ വളര്ച്ചയുടെ നാഴികക്കല്ലുകൾ ആഘോഷിക്കുന്നതിന്റെ പ്രാധാന്യവും വിളിച്ചോതുന്ന ഈ വീഡിയോയ്ക്ക് വ്യാപകമായ പ്രശംസയാണ് ലഭിച്ചത്. ഈ പാരമ്പര്യങ്ങൾ എത്രത്തോളം അർത്ഥവത്തും ഹൃദയസ്പർശിയുമാണെന്ന് ഈ വീഡിയോ കാണിച്ചുതരുന്നു. “എല്ലാ പെൺകുട്ടികളും ഇങ്ങനെ പരിഗണിക്കപ്പെടേണ്ടവരാണ്,” ഒരു ഉപയോക്താവ് എഴുതി. “ഇത് വളരെ ശുദ്ധവും ആദരവുള്ളതുമാണ്,” രണ്ടാമത്തെ ഉപയോക്താവ് കുറിച്ചു.
“എന്റെ ആദ്യത്തെ ആർത്തവം ഞാൻ വളരെ വ്യക്തമായി ഓർക്കുന്നു.. ഞാൻ ഒമ്പതാം ക്ലാസ്സിലായിരുന്നു, എനിക്ക് ഫോൺ ഉണ്ടായിരുന്നില്ല. അമ്മ എന്നോട് ഒരു മുറിയിൽ സ്വയം പൂട്ടിയിരിക്കാൻ പറഞ്ഞു (എന്റെ അമ്മ പുരോഗമനവാദിയാണ്, ഇത് അവരുടെ തെറ്റല്ല). ഇത് എന്റെ മുത്തശ്ശിയുടെ നിർബന്ധമായിരുന്നു. എന്തുകൊണ്ടാണ് ഇങ്ങനെ ചെയ്യുന്നതെന്ന് എനിക്ക് മനസ്സിലായില്ല. ഞാൻ അമ്മയോട് ‘എന്തുകൊണ്ട്?’ എന്ന് ചോദിച്ചു. പക്ഷേ, അമ്മയ്ക്ക് മറുപടിയില്ലായിരുന്നു. എന്റെ അച്ഛൻ അപ്പോൾ വീട്ടിലില്ലായിരുന്നു. പിന്നീട് വൈകുന്നേരം വന്നപ്പോൾ ഞാൻ എവിടെയാണെന്ന് അമ്മയോട് ചോദിച്ചു. അമ്മ കാര്യം പറഞ്ഞു. അദ്ദേഹം എന്റെ മുറിയിലേക്ക് വന്നു. എനിക്ക് പുതിയൊരു കാര്യമായതുകൊണ്ട് ഞാൻ ലജ്ജിച്ചു, അതുകൊണ്ട് വാതിൽ തുറന്നില്ല. പക്ഷേ, അദ്ദേഹം നിർബന്ധിച്ചു. ഞാൻ വാതിൽ തുറന്നു, അച്ഛൻ എന്നെ അടുത്ത് ഇരുത്തി, കെട്ടിപ്പിടിക്കുകയും ഉമ്മ നൽകുകയും ചെയ്തു. എന്നിട്ട് വാതിൽ ഇനി പൂട്ടില്ലെന്നും എനിക്ക് ഇഷ്ടമുള്ളത് ചെയ്യാമെന്നും അമ്മയോട് പറഞ്ഞു. ആ നിമിഷം, അദ്ദേഹത്തിന്റെ മകളായതിൽ ഞാൻ അഭിമാനിച്ചു. എന്റെ അച്ഛൻ ഇപ്പോൾ ജീവിച്ചിരിപ്പില്ല. എനിക്ക് അദ്ദേഹത്തെ ഒരുപാട് മിസ്സ് ചെയ്യുന്നു. എന്തായാലും, ദൈവം നിങ്ങളെ അനുഗ്രഹിക്കട്ടെ,” മൂന്നാമത്തെ ഉപയോക്താവ് തന്റെ അനുഭവം പങ്കുവെച്ചു.
“എന്റെ ആദ്യ ആർത്തവം ഞാൻ വളരെ വ്യക്തമായി ഓർക്കുന്നു.. അഞ്ച് ദിവസത്തേക്ക് എന്റെ ഇഷ്ടവിഭവങ്ങൾ മാത്രമാണ് ഉണ്ടാക്കിയത്. അവസാന ദിവസം, എനിക്ക് പുതിയ വസ്ത്രങ്ങൾ, ധാരാളം മധുരപലഹാരങ്ങൾ, എല്ലാവരിൽ നിന്നും സമ്മാനങ്ങൾ എന്നിവ ലഭിച്ചു. ’’ നാലാമത്തെ ഉപയോക്താവ് പങ്കുവെച്ചു.
