ഡിസൈനർമാർ പലപ്പോഴും അവരുടെ പുതിയ വസ്ത്രശേഖരങ്ങൾ പ്രശസ്തമായ റൺവേകളിലൂടെയാണ് അവതരിപ്പിക്കാറുള്ളത്. എന്നാൽ ഫാഷൻ പ്രേമികളാണ് അവയെ റൺവേയ്ക്ക് അപ്പുറത്തേക്ക് എത്തിക്കുകയും ഒരു തരംഗമാക്കി മാറ്റുകയും ചെയ്യുന്നത്. ഹൈദരാബാദ് സ്വദേശിയായ ശതകോടീശ്വരി സുധ റെഡ്ഡി തന്റെ മികച്ച ഫാഷൻ ശൈലികൊണ്ടും നൂറുകണക്കിന് കോടികൾ വിലമതിക്കുന്ന അപൂർവ്വമായ ആഭരണശേഖരം കൊണ്ടും ഏറെ പ്രശസ്തയാണ്.
പാരീസ് ഹോട്ട് കോച്ചർ വീക്കിൽ മൂന്ന് ഗ്ലാമറസ് ലുക്കുകളിലാണ് അവർ എത്തിയത്. എന്നാൽ അവിടെ എല്ലാവരുടെയും ശ്രദ്ധ പിടിച്ചുപറ്റിയത് അവരുടെ 280 കോടി രൂപ വിലമതിക്കുന്ന ആഭരണശേഖരമായിരുന്നു. മെറ്റ് ഗാല റെഡ് കാർപെറ്റിൽ അവർ ധരിച്ച, ഏകദേശം 142.8 കോടി രൂപ വിലമതിക്കുന്ന 550 കാരറ്റിന്റെ കടും വയലറ്റ്-നീല ടാൻസാനൈറ്റ് ലോക്കറ്റ് ഏറെ ശ്രദ്ധിക്കപ്പെട്ടിരുന്നു. സുധ റെഡ്ഡിയുടെ ഈ ആഭരണശേഖരത്തെക്കുറിച്ച് അത്ഭുതപ്പെടുമ്പോൾ തന്നെ, അവരുടെ ആഡംബര ജീവിതത്തിലേക്ക് കൂടി ഒന്ന് കണ്ണോടിക്കാം.
ഒരു ഫാഷൻ, കല ആസ്വാദക എന്നതിലുപരി മികച്ചൊരു ജീവകാരുണ്യ പ്രവർത്തക കൂടിയാണ് സുധ റെഡ്ഡി. തന്റെ 19-ാം വയസ്സിലായിരുന്നു മേഘ എഞ്ചിനീയറിംഗ് ആൻഡ് ഇൻഫ്രാസ്ട്രക്ചർ ലിമിറ്റഡിന്റെ (MEIL) പ്രൊമോട്ടറും മാനേജിംഗ് ഡയറക്ടറുമായ പി.വി. കൃഷ്ണ റെഡ്ഡിയുമായുള്ള അവരുടെ വിവാഹം. കലയെ ഏറെ സ്നേഹിക്കുന്ന അവർ MEIL-ന്റെ ഡയറക്ടർമാരിൽ ഒരാളാണ്, ഒപ്പം സുധ റെഡ്ഡി ഫൗണ്ടേഷനും നടത്തിവരുന്നു. സുധ റെഡ്ഡിയുടെ ആകെ സമ്പാദ്യം ഔദ്യോഗികമായി വെളിപ്പെടുത്തിയിട്ടില്ലെങ്കിലും, ഫോബ്സ് മാസികയുടെ കണക്കനുസരിച്ച് ഭർത്താവ് പി.വി. കൃഷ്ണ റെഡ്ഡിയുടെ ആസ്തി 2 ബില്യൺ യു.എസ് ഡോളറാണ് (ഏകദേശം 19,066 കോടി രൂപ).
സുധയും പി.വി. കൃഷ്ണ റെഡ്ഡിയും ഹൈദരാബാദിലെ കൊട്ടാരസദൃശ്യമായ ബംഗ്ലാവിലാണ് താമസം. നൂറുകണക്കിന് കോടികൾ വിലമതിക്കുന്ന ഈ വീടിന്റെ പുറംഭാഗം പൂർണ്ണമായും വെള്ള നിറത്തിലാണ് ചെയ്തിരിക്കുന്നത്. ഗ്രെക്കോ-റോമൻ ശൈലിയിലുള്ള ഇന്റീരിയറാണ് ഇതിനുള്ളത്. ജൂബിലി ഹിൽസിലുള്ള ഈ ആഡംബര വസതിയിൽ മനോഹരമായ പച്ചപ്പുനിറഞ്ഞ തോട്ടം, നിരവധി നീരുറവകൾ, അത്യാധുനിക ഇരിപ്പിടങ്ങൾ, വലിയ കിടപ്പുമുറികൾ എന്നിവയുണ്ട്.
2024-ലാണ് സുധ റെഡ്ഡി പ്രശസ്തമായ മെറ്റ് ഗാലയിൽ ആദ്യമായി അരങ്ങേറ്റം കുറിക്കുന്നത്. തരുൺ തഹിലിയാനി ഡിസൈൻ ചെയ്ത വസ്ത്രമാണ് അന്ന് അവർ ധരിച്ചത്. ഐവറി സിൽക്ക് ഗൗണിൽ കൈകൊണ്ട് കൊത്തിയെടുത്ത മുത്തുച്ചിപ്പി പൂക്കളും ത്രീഡി ചിത്രശലഭങ്ങളും പിടിപ്പിച്ച ഈ വസ്ത്രം നിർമ്മിക്കാൻ 800 ഓളം കരകൗശല വിദഗ്ദ്ധർ 4,500-ലധികം മണിക്കൂറുകൾ അധ്വാനിച്ചിരുന്നു. ഇതിനോടൊപ്പം തന്റെ കുടുംബ ശേഖരത്തിലുള്ള 180 കാരറ്റിന്റെ ഡയമണ്ട് മാലയാണ് അവർ ധരിച്ചത്.
2026-ലെ മെറ്റ് ഗാല റെഡ് കാർപെറ്റിൽ അവർ ധരിച്ച ‘ക്വീൻ ഓഫ് മെറിലാനി’ എന്ന മാലയും അവരുടെ സ്വന്തം ശേഖരത്തിലുള്ളതായിരുന്നു. വിക്ടോറിയൻ ഫിനിഷുള്ള ചെയിനും ത്രികോണാകൃതിയിലുള്ള റോസ്-കട്ട് ഡയമണ്ടുകളുമായിരുന്നു ഇതിന്റെ പ്രത്യേകത. ഇതുകൂടാതെ 30 കാരറ്റിന്റെ റോസ്-കട്ട് പോൾക്കി ഡയമണ്ട് മോതിരവും, 18 കാരറ്റ് മഞ്ഞ സ്വർണ്ണത്തിൽ തീർത്ത 40 കാരറ്റിന്റെ കൊളംബിയൻ എമറാൾഡ് (മരതകം) മോതിരവും അവർ അണിഞ്ഞിരുന്നു.
ജൂലൈ 6 മുതൽ ജൂലൈ 9 വരെ നടന്ന പാരീസ് ഹോട്ട് കോച്ചർ വീക്കിൽ, 30 കാരറ്റ് വജ്രങ്ങൾ പതിപ്പിച്ച പാന്തർ ഇയർ കഫ്സുകളും (കാതിലണിയുന്ന ആഭരണം) 20 കോടി രൂപ വിലമതിക്കുന്ന 23 കാരറ്റിന്റെ മഞ്ഞ വജ്രമോതിരവുമാണ് സുധ ധരിച്ചത്. എലീ സാബിന്റെ ഫാഷൻ ഷോയ്ക്കായി മഞ്ഞ വസ്ത്രത്തോടൊപ്പം ടർക്കോയ്സ് രത്നങ്ങൾ പതിപ്പിച്ച ഇയർ കഫ്സുകളാണ് അവർ സ്റ്റൈൽ ചെയ്തത്. മനീഷ് മൽഹോത്രയുടെ ആദ്യ റൺവേ ഷോയ്ക്കായി, 75 കാരറ്റിന്റെ മികച്ച പ്രകൃതിദത്ത വജ്രങ്ങൾ പതിപ്പിച്ച വില്ലിന്റെ ആകൃതിയിലുള്ള മാലയാണ് അവർ ധരിച്ചത്. ഈ ആഭരണങ്ങളെല്ലാം അവരുടെ സ്വന്തം സ്വകാര്യ ശേഖരത്തിലുള്ളവയായിരുന്നു.
ആന്ധ്രാപ്രദേശിലെ വുയ്യൂരു എന്ന ഗ്രാമത്തിലാണ് സുധ റെഡ്ഡി വളർന്നത്. താൻ പണ്ടേ നിയമങ്ങൾ കൃത്യമായി പാലിക്കുന്ന കൂട്ടത്തിലായിരുന്നില്ലെന്നും, ചെളി വെള്ളത്തിലും മഴയത്തുമൊക്കെ കളിച്ചുനടക്കാൻ ഇഷ്ടപ്പെടുന്ന കുട്ടിയായിരുന്നുവെന്നും വോഗ് ഇന്ത്യയ്ക്ക് നൽകിയ അഭിമുഖത്തിൽ അവർ പറഞ്ഞിട്ടുണ്ട്. ഒരു ബാങ്ക് ഉദ്യോഗസ്ഥനായ അച്ഛന്റെയും വീട്ടമ്മയായ അമ്മയുടെയും മകളായ സുധയുടെ വീട്ടിലേക്ക് എപ്പോഴും എല്ലാത്തരം ആളുകളും കടന്നുവരുമായിരുന്നു. ജീവകാരുണ്യ പ്രവർത്തനം എന്നത് തങ്ങൾക്ക് ഒരു ഔപചാരികമായ കാര്യമല്ലായിരുന്നു, മറിച്ച് ജീവിതത്തിന്റെ ഭാഗമായിരുന്നുവെന്ന് അവർ ഓർക്കുന്നു.
സുധ റെഡ്ഡി ഫൗണ്ടേഷൻ വഴി എല്ലാ മാസവും മെഡിക്കൽ ക്യാമ്പുകൾ, സൗജന്യ ഉച്ചഭക്ഷണ പരിപാടികൾ, വിദ്യാഭ്യാസം, ആരോഗ്യം, പരിസ്ഥിതി സംരക്ഷണം തുടങ്ങിയ നിരവധി സഹായ പദ്ധതികൾ നടത്തിവരുന്നുണ്ട്. തന്റെ മക്കളായ മാനസിനെയും പ്രണവിനെയും ഇത്തരം ജീവകാരുണ്യ ചർച്ചകളിൽ പങ്കാളികളാക്കാറുണ്ടെന്നും, ശരിയായ സമയത്ത് ഈ പാരമ്പര്യം അവർക്ക് കൈമാറുകയാണ് ലക്ഷ്യമെന്നും അവർ കൂട്ടിച്ചേർത്തു.
സുധ റെഡ്ഡി സോഷ്യൽ മീഡിയയിൽ സജീവമാണ്. സ്വകാര്യ ജെറ്റുകളിൽ യാത്ര ചെയ്യുന്ന ചിത്രങ്ങൾ അവർ പലപ്പോഴും പങ്കുവെക്കാറുണ്ട്. യാത്രകളിൽ അവരുടെ വളർത്തുനായയും ഒപ്പമുണ്ടാകും. ലൂയിസ് വിറ്റൺ, ഷിയാപറെല്ലി, ചാനൽ, ഹെർമിസ് തുടങ്ങിയ ലോകപ്രശസ്ത ബ്രാൻഡുകളുടെ വിലകൂടിയ ബാഗുകളുടെ വലിയൊരു ശേഖരവും അവർക്കുണ്ട്. ഇതിനുപുറമെ ആഡംബര കാറുകളുടെ ഒരു വലിയ നിര തന്നെയുണ്ടെങ്കിലും, ഭർത്താവ് പി.വി. കൃഷ്ണ റെഡ്ഡി സമ്മാനിച്ച കറുപ്പും സ്വർണ്ണവും കലർന്ന റോൾസ് റോയ്സ് ഗോസ്റ്റ് (Rolls-Royce Ghost) കാറാണ് ഇവയിൽ ഏറ്റവും ശ്രദ്ധേയം.
