നഴ്സിംഗ് മേഖലയോടുള്ള സമൂഹത്തിന്റെ കാഴ്ചപ്പാടുകളെ വിമർശിച്ച് നടിയും രാഷ്ട്രീയപ്രവർത്തകയുമായ കങ്കണ റണാവത്. ആരോഗ്യരംഗത്തെ ഏറ്റവും പ്രധാനപ്പെട്ട മുൻനിര പോരാളികളായിരുന്നിട്ടും നഴ്സിംഗ് ജോലി പലപ്പോഴും അനാവശ്യമായി ലൈംഗികവൽക്കരിക്കപ്പെടുകയും തെറ്റായ രീതിയിൽ ചിത്രീകരിക്കപ്പെടുകയും ചെയ്യാറുണ്ടെന്ന് അവർ പറഞ്ഞു.
മുംബൈയിലെ 26/11 ഭീകരാക്രമണത്തിനിടയിൽ കാമ ഹോസ്പിറ്റലിലെ ധീരരായ ജീവനക്കാർ നടത്തിയ സമാനതകളില്ലാത്ത പോരാട്ടത്തെ ആസ്പദമാക്കി ഒരുങ്ങുന്ന തന്റെ പുതിയ ചിത്രമായ ‘ഭാരത് ഭാഗ്യ വിധാതാ’യെക്കുറിച്ച് സംസാരിക്കുകയായിരുന്നു അവർ. നഴ്സുമാരോടും മറ്റ് ആശുപത്രി ജീവനക്കാരോടുമുള്ള ജനങ്ങളുടെ മനോഭാവത്തിൽ മാറ്റം വരുത്താനും അവർക്ക് അർഹമായ ബഹുമാനം ഉറപ്പാക്കാനും ഈ സിനിമ ശ്രമിക്കുന്നുണ്ടെന്ന് കങ്കണ പറഞ്ഞു.
ജനങ്ങളുടെ വികാരങ്ങളിലും കാഴ്ചപ്പാടുകളിലും മാറ്റം വരേണ്ടതുണ്ടെന്നും, നഴ്സിംഗ് എന്നത് സമൂഹത്തിൽ ഏറ്റവും കൂടുതൽ ലൈംഗികവൽക്കരിക്കപ്പെട്ട ഒരു തൊഴിലായി മാറിയിട്ടുണ്ടെന്നും എ.എൻ.ഐക്ക് നൽകിയ പ്രത്യേക അഭിമുഖത്തിൽ കങ്കണ പറഞ്ഞു. ആശുപത്രികളിൽ ഏറ്റവും കഠിനമായ ഉത്തരവാദിത്തങ്ങൾ കൈകാര്യം ചെയ്യുമ്പോഴും നഴ്സുമാർക്ക് കുറഞ്ഞ ശമ്പളം മാത്രമാണ് ലഭിക്കുന്നതെന്നും, അവർ അമിത ജോലിഭാരത്താൽ ബുദ്ധിമുട്ടുകയാണെന്നും അർഹിക്കുന്ന അംഗീകാരം അവർക്ക് ലഭിക്കുന്നില്ലെന്നും അവർ കൂട്ടിച്ചേർത്തു.
ആരും കാണാതെ പോകുന്ന നായകന്മാരായ നഴ്സുമാരിലേക്കും വാർഡ് ബോയ്മാരിലേക്കുമാണ് ഈ സിനിമ ശ്രദ്ധ തിരിക്കുന്നത്. തങ്ങൾ സിനിമയിൽ പറയുന്ന ഒരു സംഭാഷണം ചൂണ്ടിക്കാട്ടി, സമയം കിട്ടുമ്പോൾ നഴ്സുമാരോട് മോശം രീതിയിൽ സംസാരിക്കാൻ ആളുകൾ മുതിരുന്നതാണ് ഇന്നത്തെ യാഥാർത്ഥ്യമെന്ന് കങ്കണ ഓർമ്മിപ്പിച്ചു. രോഗികളെ പരിചരിക്കുന്നതു മുതൽ ആശുപത്രിയുടെ സുഗമമായ പ്രവർത്തനം ഉറപ്പാക്കുന്നതു വരെയുള്ള പ്രധാന ജോലികൾ ചെയ്യുന്നത് അവരാണ്. ഈ സിനിമയിലൂടെ ആളുകളുടെ ചിന്താഗതിയിൽ ചെറിയൊരു മാറ്റമെങ്കിലും ഉണ്ടാക്കാൻ കഴിഞ്ഞാൽ അതൊരു വലിയ വിജയമായിരിക്കുമെന്നും അവർ പറഞ്ഞു.
ആശുപത്രികളെക്കുറിച്ച് ചിന്തിക്കുമ്പോൾ ഡോക്ടർമാരുടെ വലിയ സംഭാവനകളാണ് നമ്മുടെ മനസ്സിൽ വരുന്നത്. എന്നാൽ ആരോഗ്യരംഗത്തെ മുന്നോട്ട് നയിക്കുന്ന ലക്ഷക്കണക്കിന് വരുന്ന വാർഡ് ബോയ്മാർ, വാച്ചർമാർ, മറ്റ് താൽക്കാലിക ജീവനക്കാർ എന്നിവരുടെ കഠിനാധ്വാനം സമൂഹം പലപ്പോഴും മറന്നുപോകുന്നു. 26/11 മുംബൈ ഭീകരാക്രമണ സമയത്ത് ഭീകരനായ അജ്മൽ കസബിനെ തിരിച്ചറിയുന്നതിൽ പ്രധാന സാക്ഷികളായി ധീരമായി നിലകൊണ്ടത് ഈ ആശുപത്രി ജീവനക്കാരായിരുന്നു എന്ന കാര്യം ജനങ്ങൾക്ക് പുതിയ അറിവായിരിക്കുമെന്നും കങ്കണ കൂട്ടിച്ചേർത്തു.
ഭീകരാക്രമണത്തിനിടയിൽ നാനൂറിലധികം ജീവനുകൾ രക്ഷിക്കാൻ സഹായിച്ച സാധാരണക്കാരായ ആശുപത്രി ജീവനക്കാരുടെ ധീരത ദൃശ്യമാക്കുന്ന ചിത്രത്തിന്റെ ട്രെയിലർ അടുത്തിടെയാണ് പുറത്തിറങ്ങിയത്. സിനിമയിൽ കങ്കണ ഒരു സ്റ്റാഫ് നഴ്സിന്റെ വേഷത്തിലാണ് എത്തുന്നത്. ഇവരുടെ സേവനമില്ലെങ്കിൽ നമ്മുടെ ആരോഗ്യരംഗം ഒരു ദിവസം കൊണ്ട് തകർന്നടിയുമെന്ന സത്യമാണ് ട്രെയിലർ അടിവരയിടുന്നത്.
ഡോ. ജയന്തിലാൽ ഗഡ (പെൻ സ്റ്റുഡിയോസ്) അവതരിപ്പിക്കുന്ന ഈ ചിത്രം പെൻ സ്റ്റുഡിയോസ്, മണികർണ്ണിക ഫിലിംസ്, പരംഹംസ് ക്രിയേഷൻസ് എന്നിവർ യുനോയ ഫിലിംസ്, ഫ്ലോട്ടിംഗ് റോക്സ് എന്റർടൈൻമെന്റ് എന്നിവരുമായി സഹകരിച്ചാണ് നിർമ്മിക്കുന്നത്. ‘ഭാരത് ഭാഗ്യ വിധാതാ’ 2026 ജൂൺ 12-ന് തിയേറ്ററുകളിൽ റിലീസ് ചെയ്യും.
