ബെംഗളൂരുവിലെ ട്രാഫിക് സിഗ്നലിൽ വെച്ചുണ്ടായ ലളിതമായൊരു സംഭാഷണം, ഒടുവിൽ ഒരു ഓട്ടോറിക്ഷാ ഡ്രൈവർക്കും കോടീശ്വരനായ വ്യവസായിക്കും ജീവിതത്തിൽ ഒരിക്കലും മറക്കാനാകാത്ത ഒരു മനോഹര ഓർമ്മയായി മാറി. സൂപ്പർ കാർ ഓടിക്കാൻ ആഗ്രഹം പ്രകടിപ്പിച്ച ഓട്ടോ ഡ്രൈവർക്ക് തന്റെ ലംബോർഗിനിയുടെ (Lamborghini) താക്കോൽ കൈമാറിയ ബെംഗളൂരു വ്യവസായിയുടെ വീഡിയോയാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. രാകേഷ് കെ.എൻ.വി. എന്ന വ്യവസായി പങ്കുവെച്ച ഈ വീഡിയോയിലെ അദ്ദേഹത്തിന്റെ ഉദാരമനസ്കതയെയും വിശ്വാസത്തെയും പ്രശംസിക്കുകയാണ് നെറ്റിസൺസ്.
രാകേഷ് തന്റെ തിളങ്ങുന്ന മഞ്ഞ ലംബോർഗിനി കാറുമായി ബെംഗളൂരുവിലെ റോഡിലൂടെ പോകുമ്പോഴാണ് ഒരു ഓട്ടോറിക്ഷ അദ്ദേഹത്തിനരികിലേക്ക് വന്നുനിന്നത്. സോഷ്യൽ മീഡിയ വീഡിയോകളിലൂടെ രാകേഷിനെ മുൻപേ അറിയാമായിരുന്ന ഓട്ടോ ഡ്രൈവർ താൻ അദ്ദേഹത്തിന്റെ വലിയൊരു ആരാധകനാണെന്നും ഈ ആഡംബര കാർ ഏറെ ഇഷ്ടമാണെന്നും ആവേശത്തോടെ പറഞ്ഞു. ഒപ്പം ലംബോർഗിനി ഒന്ന് ഓടിച്ചുനോക്കാൻ ആഗ്രഹമുണ്ടെന്ന കാര്യവും അദ്ദേഹം രാകേഷിനോട് പങ്കുവെച്ചു. കേവലം ഒരു നന്ദിവാക്കിൽ ഒതുക്കി അവിടെനിന്ന് പോകുന്നതിന് പകരം, ഓട്ടോ ഡ്രൈവറെ അമ്പരപ്പിച്ച ഒരു ഓഫറാണ് രാകേഷ് മുന്നോട്ടുവെച്ചത്.
വണ്ടി റോഡിന്റെ വശത്തേക്ക് ഒതുക്കി നിർത്താൻ പറഞ്ഞ ശേഷം രാകേഷ് തന്റെ ലംബോർഗിനിയുടെ താക്കോൽ ഓട്ടോ ഡ്രൈവർക്ക് കൈമാറി. തുടർന്ന് ഇരുവരും തങ്ങളുടെ വാഹനങ്ങൾ പരസ്പരം മാറി. ഓട്ടോ ഡ്രൈവർ ഏറെ ശ്രദ്ധയോടെ ലംബോർഗിനിയുടെ സീറ്റിലേക്ക് ഇരുന്നപ്പോൾ, രാകേഷ് പുഞ്ചിരിയോടെ ആ ഓട്ടോറിക്ഷയിലേക്ക് കയറി. രണ്ട് വാഹനങ്ങളും ഒന്നിച്ച് റോഡിലൂടെ മുന്നോട്ട് നീങ്ങുന്നതാണ് പിന്നീട് വീഡിയോയിൽ കാണുന്നത്. ഓട്ടോ ഡ്രൈവർക്ക് അത് തന്റെ ജീവിതത്തിലെ ഏറ്റവും വലിയൊരു സ്വപ്നസാക്ഷാത്കാരമായിരുന്നു. എന്നാൽ രാകേഷിന് ആ ഓട്ടോ യാത്ര തന്റെ പഴയകാല കഷ്ടപ്പാടുകളുടെ ഓർമ്മപ്പെടുത്തലായിരുന്നു.
ഈ വീഡിയോ പങ്കുവെച്ചുകൊണ്ട് രാകേഷ് തന്റെ ഭൂതകാലത്തെക്കുറിച്ച് കുറിക്കുകയുണ്ടായി. കരിയറിന്റെ തുടക്കകാലത്ത് കടുത്ത സാമ്പത്തിക പ്രതിസന്ധി അനുഭവിച്ചിരുന്നതായും അക്കാലത്ത് ഒരു ഓട്ടോക്കൂലി നൽകുന്നത് പോലും തനിക്ക് വലിയ ബുദ്ധിമുട്ടായിരുന്നു എന്നും അദ്ദേഹം ഓർത്തുപറഞ്ഞു. വർഷങ്ങൾക്ക് ശേഷം വീണ്ടും ഒരു ഓട്ടോയിൽ യാത്ര ചെയ്തപ്പോൾ താൻ ഇന്ന് എത്തിനിൽക്കുന്ന ദൂരം എത്രത്തോളമാണെന്ന് മനസ്സിലാക്കാൻ സാധിച്ചെന്നും ഈ മാറ്റം ഏറെ അർത്ഥവത്താണെന്നും അദ്ദേഹം കൂട്ടിച്ചേർത്തു. “ഈയൊരു മറക്കാനാകാത്ത നിമിഷത്തിനായി ഞാൻ എന്റെ ലംബോർഗിനി വരെ പണയം വെച്ചു! സത്യം പറഞ്ഞാൽ ആ ഓട്ടോ ഓടിച്ചത് എന്റെ നെഞ്ചിൽ തൊട്ടു. ഓട്ടോ മീറ്റർ കാശ് കൊടുക്കാൻ പോലും കഷ്ടപ്പെട്ടിരുന്ന പഴയ നാളുകളിലേക്കാണ് അത് എന്നെ കൂട്ടിക്കൊണ്ടുപോയത്,” എന്നായിരുന്നു വീഡിയോയുടെ അടിക്കുറിപ്പ്.
ലക്ഷങ്ങൾ വിലമതിക്കുന്ന തന്റെ ആഡംബര കാർ അപരിചിതനായ ഒരാളെ വിശ്വസിച്ച് ഏൽപ്പിച്ച രാകേഷിന്റെ മനസ്സിനെ സോഷ്യൽ മീഡിയ ഒന്നടങ്കം അഭിനന്ദിക്കുകയാണ്. പണത്തേക്കാൾ വലിയ വില അനുകമ്പയ്ക്കും സ്നേഹത്തിനുമുണ്ടെന്ന് ഈ വീഡിയോ തെളിയിക്കുന്നതായി ആളുകൾ അഭിപ്രായപ്പെട്ടു. “സഹോദരാ, നിങ്ങൾ എന്റെ ഹൃദയം കീഴടക്കി” എന്നും, “ആ ഓട്ടോ ഡ്രൈവറുടെ മുഖത്തെ പുഞ്ചിരിയിൽ എല്ലാമുണ്ട്” എന്നുമാണ് വീഡിയോയ്ക്ക് താഴെ വന്ന ചില കമന്റുകൾ.
