Sports

ആദ്യ ഓവറില്‍തന്നെ ‘പൂജ്യ’രാകുന്ന ‘വല്യേട്ടന്മാരേ’…. ഇതാ പത്താമനും ആദ്യം കളിക്കുന്ന 11-ാമനും ചേര്‍ന്നൊരുക്കിയ ‘മിറാക്കിൾ’ ജയം!

അംരാത്‌ (ഒമാന്‍): ഇന്ത്യയും പാകിസ്‌താനും തമ്മിലുള്ള ആവേശകരമായ ക്രിക്കറ്റ്‌ പോരാട്ടങ്ങളുടെ ചരിത്രത്തിലേക്കാണ്‌ അണ്ടര്‍ 19 ഏഷ്യാ കപ്പ്‌ ഫൈനലും ഇടംപിടിച്ചത്‌. ”അത്ഭുതം” എന്ന ഒറ്റവാക്കിലാണ്‌ ഇന്ത്യയുടെ ഈ കിരീടനേട്ടത്തെ സമൂഹമാധ്യമങ്ങള്‍ വിശേഷിപ്പിച്ചത്‌. 338 റണ്‍സ്‌ എന്ന വിജയലക്ഷ്യം പിന്തുടര്‍ന്ന ഇന്ത്യ 42-ാം ഓവറില്‍ എട്ട്‌ വിക്കറ്റ്‌ നഷ്ടത്തില്‍ 252 റണ്‍സ്‌ എന്ന നിലയില്‍ തോല്‍വിയോടടുത്തിരുന്നു. ഒരിക്കല്‍ക്കൂടി കൈയെത്തും ദൂരത്ത്‌ കിരീടം നഷ്ടമാകുമെന്ന്‌ ഉറപ്പിച്ച്‌ ആരാധകരും പ്രതീക്ഷ കൈവിട്ടു.

കഴിഞ്ഞ ഫൈനലിലെ തോല്‍വി ആവര്‍ത്തിച്ച്‌ പാകിസ്‌താന്‍ കിരീടം നിലനിര്‍ത്തുമെന്ന ആശങ്കയും ഗ്രൂപ്പ്‌ ഘട്ടത്തിലെ പരാജയവും ഇന്ത്യന്‍ ആരാധകരുടെ നിരാശ ഇരട്ടിയാക്കി. എന്നാല്‍ ഏഴാമനായി ഇറങ്ങിയ മനന്‍ ചൗഹാനും പത്താമന്‍ മോഹിത്‌ ഉല്‍വയും തോല്‍ക്കാന്‍ തയ്യാറായിരുന്നില്ല. 5.5 ഓവറില്‍ ഇരുവരും ചേര്‍ന്ന്‌ 57 റണ്‍സ്‌ കൂട്ടിച്ചേര്‍ത്തു. അപ്പോഴും വിജയസാധ്യത പാകിസ്‌താനൊപ്പം തന്നെയായിരുന്നു. ചൗഹാന്‍ പുറത്തായതോടെ പാകിസ്‌താന്‍ വിജയം ഏതാണ്ട്‌ ഉറപ്പിച്ചു; ഒരു വിക്കറ്റ്‌ മാത്രം ശേഷിക്കേ ഇന്ത്യയ്ക്ക്‌ ജയിക്കാന്‍ വേണ്ടിയിരുന്നത്‌ 16 പന്തില്‍ 29 റണ്‍സായിരുന്നു.

അല്‍ അംരാതിലെ ചൂടേറിയ കാലാവസ്ഥയ്ക്ക്‌ അനുസൃതമായി പന്തെറിഞ്ഞ പാക്‌ ബൗളര്‍മാരുടെ തന്ത്രങ്ങള്‍ കൃത്യമായിരുന്നു. 11-ാമനായി ക്രീസിലെത്തിയ ചിഗുരുപതി വെങ്കടയ്ക്കാകട്ടെ ടൂര്‍ണമെന്റിലെ ആദ്യ മത്സരവുമായിരുന്നു അത്‌. എന്നാല്‍ പിന്നീട്‌ പിറന്നത്‌ ക്രിക്കറ്റ്‌ കണ്ട എക്കാലത്തെയും മികച്ച തിരിച്ചുവരവാണ്‌. എന്നാൽ, സി. വെങ്കിടയുടെ മികച്ച പിന്തുണയോടെ മോഹിത് ഇന്ത്യയെ വിജയതീരത്തേക്ക് നയിച്ചു. അവസാന പന്തിൽ ജയിക്കാൻ 3 റൺസ് വേണമെന്നിരിക്കെ, കവറിലൂടെ പന്ത് അതിർത്തി കടത്തി ഉൾവ ഇന്ത്യയ്ക്ക് കിരീടം ഉറപ്പിച്ചു.


നേരത്തെ, നായകനും ഓപ്പണറുമായ ലക്ഷ്യ റായ്‌ചന്ദാനിയും ആര്യവീര്‍ സേവാഗും നല്‍കിയ മികച്ച തുടക്കം ഇന്ത്യയ്ക്ക്‌ വിജയപ്രതീക്ഷ നല്‍കിയിരുന്നു. ഒന്‍പതാം ഓവറില്‍ തന്നെ ഇന്ത്യന്‍ സ്കോര്‍ 50 കടന്നു.

മിന്നും ഫോം തുടര്‍ന്ന ആര്യവീര്‍ 51 പന്തിലും ലക്ഷ്യ 72 പന്തിലും അര്‍ധ സെഞ്ചുറികള്‍ പൂര്‍ത്തിയാക്കി. നിഖാബ്‌ ഷഫീഖ്‌ ആര്യവീറിനെ പുറത്താക്കിയതോടെയാണ്‌ ഇന്ത്യയുടെ തകര്‍ച്ച തുടങ്ങിയത്‌. പിന്നാലെ മൂന്നാമന്‍ വി.കെ. വിനീത്‌ (21 പന്തില്‍ 24), അര്‍ജുന്‍ രാജ്‌പുത്‌ (18 പന്തില്‍ 16), യഷ്‌ബര്‍ധന്‍ ചൗഹാന്‍ (ഒന്‍പത്‌), അന്‍വയ്‌ ദ്രാവിഡ്‌ (12 പന്തില്‍ 19), ആര്യന്‍ സവ്‌സാനി (ഒന്‍പത്‌), കാവ്യ പരേഷ്‌ പട്ടേല്‍ (പൂജ്യം) എന്നിവര്‍ വേഗത്തില്‍ മടങ്ങിയതോടെ ഇന്ത്യ എട്ടിന്‌ 252 എന്ന നിലയിലേക്ക്‌ വീണു.

പാകിസ്‌താനുവേണ്ടി റിസ്‌വാനുള്ള മൂന്ന്‌ വിക്കറ്റുകള്‍ വീഴ്ത്തി. നിഖാബ്‌ ഷഫീഖ്‌ രണ്ട്‌ വിക്കറ്റും അലി റാസ, മുഹമ്മദ്‌ സായം, ഹസ്‌നൈന്‍ അബാസ്‌ ദാര്‍ എന്നിവര്‍ ഓരോ വിക്കറ്റ്‌ വീതവും സ്വന്തമാക്കി. നേരത്തെ പാകിസ്‌താന്റെ മധ്യനിരയെയും വാലറ്റത്തെയും പിടിച്ചുകെട്ടാന്‍ ഇന്ത്യന്‍ ബൗളര്‍മാര്‍ക്ക്‌ സാധിച്ചതുകൊണ്ടാണ്‌ അവരുടെ സ്‌കോര്‍ 337-ല്‍ ഒതുങ്ങിയത്‌. കാവ്യ പരേഷ്‌ പട്ടേല്‍ നാല്‌ വിക്കറ്റും ചിഗുരുപതി വെങ്കട മൂന്ന്‌ വിക്കറ്റും നേടി; അര്‍ജുന്‍ രാജ്‌പുതിന്‌ ഒരു വിക്കറ്റ്‌ ലഭിച്ചു. ടൂര്‍ണമെന്റിലാകെ 361 റണ്‍സ്‌ അടിച്ചുകൂട്ടിയ ആര്യവീര്‍ സേവാഗ്‌ ഏഷ്യാ കപ്പിലെ താരമായും മോഹിത്‌ ഉല്‍വ ഫൈനലിലെ താരമായും തിരഞ്ഞെടുക്കപ്പെട്ടു.