ചൈനയിലെ വാർഷിക ഷോപ്പിംഗ് മേളയായ ‘ഡബിൾ 11’ (Double 11) ഫെസ്റ്റിവലിനിടെ ഒരു ഉപഭോക്താവ് വെറും 11 യുവാനും (ഏകദേശം 155 രൂപ) രണ്ട് ബെഡ്റൂം ഫ്ലാറ്റ് സ്വന്തമാക്കി. അലിബാബ ഓക്ഷൻ (Alibaba Auction) എന്ന ഓൺലൈൻ ലേല പ്ലാറ്റ്‌ഫോമിലൂടെ നടന്ന ഈ അപൂർവ്വ ഇടപാടിൽ 1,600-ലധികം ആളുകളാണ് പങ്കെടുത്തത്. വടക്കുകിഴക്കൻ ചൈനയിലെ ഹെയ്‌ലോങ്‌ജിയാങ് പ്രവിശ്യയിലുള്ള ഒരു പാർപ്പിട സമുച്ചയത്തിന്റെ ഏഴാം നിലയിലാണ് 68 ചതുരശ്ര മീറ്റർ വിസ്തീർണ്ണമുള്ള ഈ അപ്പാർട്ട്മെന്റ് സ്ഥിതി ചെയ്യുന്നത്. ഒരു യുവാനിൽ ആരംഭിച്ച ലേലത്തിൽ 0.01 യുവാൻ വീതം ഉയർത്താമായിരുന്നെങ്കിലും പരമാവധി തുക 11 യുവാനായി നിജപ്പെടുത്തിയിരുന്നുവെന്ന് സൗത്ത് ചൈന മോണിംഗ് പോസ്റ്റ് റിപ്പോർട്ട് ചെയ്തു.
പ്ലാറ്റ്‌ഫോമിലെ രേഖകൾ പ്രകാരം നവംബർ 5-ന് ലേലം അവസാനിക്കുന്നതിന് മുമ്പ് 1,677 പേർ പങ്കെടുക്കുകയും ആകെ 1,001 തവണ ലേലം വിളിക്കുകയും ചെയ്തു. കിഴക്കൻ ചൈനയിലെ ജിയാങ്‌സു-ഷെജിയാങ് മേഖലയിൽ നിന്നുള്ള പേര് വെളിപ്പെടുത്താത്ത ഒരു വ്യക്തിയാണ് പരമാവധി തുകയായ 11 യുവാൻ ആദ്യം വിളിച്ച് ഫ്ലാറ്റ് സ്വന്തമാക്കിയത്. ഫ്ലാറ്റിന്റെ വിലയും പ്ലാറ്റ്‌ഫോമിന്റെ ഇടപാട് ഫീസും ഇദ്ദേഹം അടച്ചുകഴിഞ്ഞു. എങ്കിലും, വസ്തുവിന്റെ ഉടമസ്ഥാവകാശം കൈമാറുന്നതിനുള്ള നികുതി ഇനത്തിൽ ഏകദേശം 2,000 യുവാൻ (ഏകദേശം 300 ഡോളർ) കൂടി ഇദ്ദേഹം നൽകേണ്ടതുണ്ട്.
ഹെയ്‌ലോങ്‌ജിയാങ്ങിലേക്ക് സ്ഥിരതാമസം മാറ്റാൻ തനിക്ക് പദ്ധതിയില്ലെന്നും, ശൈത്യകാല യാത്രകളിൽ ഇടയ്ക്കിടെ താമസിക്കാനുള്ള ഒരു അവധിക്കാല വസതിയായി ഈ ഫ്ലാറ്റ് ഉപയോഗിക്കാനാണ് ഉദ്ദേശിക്കുന്നതെന്നും ലേലത്തിന്റെ തത്സമയ സംപ്രേഷണത്തിനിടെ വിജയിയായ ഉപഭോക്താവ് പറഞ്ഞു.
ബ്ലാക്ക് ഫ്രൈഡേയ്ക്ക് സമാനമായ ചൈനയിലെ ഡബിൾ 11 ഷോപ്പിംഗ് ഫെസ്റ്റിവലിന്റെ പ്രചാരണാർത്ഥമാണ് അലിബാബ ഓക്ഷൻ ഈ ഓഫർ നൽകിയത്. വസ്തുവിന്റെ യഥാർത്ഥ മൂല്യവും ഈ പ്രൊമോഷണൽ വിൽപ്പന വിലയും തമ്മിലുള്ള വ്യത്യാസം പ്ലാറ്റ്‌ഫോം തന്നെയാണ് വഹിച്ചതെന്ന് ഒരു ഓക്ഷൻ ഏജൻസി മാനേജർ ഫെങ്‌മിയാൻ ന്യൂസിനോട് പറഞ്ഞു. പ്രാദേശിക പ്രോപ്പർട്ടി ആപ്പുകളുടെ കണക്കനുസരിച്ച് ഈ അപ്പാർട്ട്മെന്റിന് ഏകദേശം 40,000 യുവാൻ വിപണി മൂല്യമുണ്ട്. ഇതേ കെട്ടിട സമുച്ചയത്തിലെ മറ്റ് ഫ്ലാറ്റുകൾ ചതുരശ്ര മീറ്ററിന് ശരാശരി 2,700 യുവാൻ നിരക്കിലാണ് വിറ്റുപോകുന്നത്.
ഈ അസാധാരണ ഇടപാട് ചൈനീസ് സമൂഹമാധ്യമങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്. പല ഉപയോക്താക്കളും ഈ വാർത്ത കേട്ട് അമ്പരപ്പ് രേഖപ്പെടുത്തിയപ്പോൾ, ഇത്തരം വിലകുറഞ്ഞ വസ്തു ലേലങ്ങളിൽ എടുത്തുചാടി പങ്കെടുക്കരുതെന്ന് നിയമവിദഗ്ധർ മുന്നറിയിപ്പ് നൽകുന്നു. വ്യക്തമല്ലാത്ത ഉടമസ്ഥാവകാശ രേഖകൾ, അടയ്ക്കാത്ത നികുതികൾ, കുടിശ്ശികയുള്ള മെയിന്റനൻസ് ഫീസുകൾ, ചെലവേറിയ നിയമതർക്കങ്ങൾ എന്നിവ ഇത്തരം വസ്തുക്കൾക്കൊപ്പം ഉണ്ടായേക്കാമെന്ന് ബെയ്ജിംഗ് ജിൻസു ലോ ഫേമിലെ അഭിഭാഷകനായ വാങ് യുചെൻ ചൂണ്ടിക്കാട്ടി.
2009-ൽ ചൈനീസ് ഇ-കൊമേഴ്‌സ് പ്ലാറ്റ്‌ഫോമായ താവോബാവോ (Taobao) ആരംഭിച്ച ഡബിൾ 11 ഷോപ്പിംഗ് ഫെസ്റ്റിവൽ ഇന്ന് ലോകത്തിലെ ഏറ്റവും വലിയ ഓൺലൈൻ ഷോപ്പിംഗ് മേളകളിലൊന്നാണ്. നവംബർ പകുതി വരെ നീണ്ടുനിൽക്കുന്ന ഈ ഒരു മാസത്തെ വിൽപ്പന മേളയിലൂടെ കഴിഞ്ഞ വർഷം 1.6 ട്രില്യൺ യുവാനിലധികം (ഏകദേശം 240 ബില്യൺ ഡോളർ) വിറ്റുവരവ് നേടിയതായാണ് റിപ്പോർട്ടുകൾ.
ചൈനയിൽ ഇത്രയും കുറഞ്ഞ വിലയ്ക്ക് വീട് വിൽക്കുന്നത് ഇത് ആദ്യമായല്ല. 2024 നവംബറിൽ ഷാൻഡോങ് പ്രവിശ്യയിലെ വെയ്ഹായ് എന്ന സ്ഥലത്ത് കടലിനഭിമുഖമായുള്ള 40 ചതുരശ്ര മീറ്റർ അപ്പാർട്ട്മെന്റ് ഒരു സ്ത്രീ ലേലത്തിലൂടെ 11 യുവാനാണ് സ്വന്തമാക്കിയത്. 50,000 യുവാനിൽ താഴെ മൂല്യം കണക്കാക്കിയിരുന്ന ഫ്ലാറ്റായിരുന്നു അത്. ഭാവിയിലെ വലിയ വസ്തു വിൽപ്പനകൾക്ക് മുന്നോടിയായി ആളുകളുടെ ശ്രദ്ധ പിടിച്ചുപറ്റാനും പരസ്യം നേടാനുമാണ് ഇത്തരം വമ്പൻ ഡിസ്കൗണ്ട് ലേലങ്ങൾ സംഘടിപ്പിക്കുന്നതെന്ന് ഈ മേഖലയിലുള്ളവർ പറയുന്നു.
