ഹരിയാനയിലെ കർണാൽ സ്വദേശിയും 100 ശതമാനം കേൾവിപരിമിതിയുള്ള ബാങ്ക് മാനേജറുമായ പ്രദീപ് മുൻഡേജ എവറസ്റ്റ് ബേസ് ക്യാമ്പ് (5,364 മീറ്റർ) കീഴടക്കി സോഷ്യൽ മീഡിയയുടെ ശ്രദ്ധ നേടിയിരിക്കുകയാണ്. മാസങ്ങൾ നീണ്ട കഠിനമായ പരിശീലനത്തിനൊടുവിൽ ഒക്ടോബർ 13-നാണ് അദ്ദേഹം ഈ അപൂർവ്വ നേട്ടം കൈവരിച്ചത്.
പഞ്ചാബ് നാഷണൽ ബാങ്കിൽ (PNB) ചീഫ് മാനേജരായി ജോലി ചെയ്യുന്ന പ്രദീപ്, കുത്തനെയുള്ള മലനിരകളും കുറഞ്ഞ ഓക്സിജന്റെ അളവും കഠിനമായ തണുപ്പും നിറഞ്ഞ 130 കിലോമീറ്റർ ദൂരമാണ് തരണം ചെയ്തത്. ഏഴാം വയസ്സിൽ പൂർണ്ണമായും കേൾവിശക്തി നഷ്ടപ്പെട്ട പ്രദീപിന് ഇത് കേവലമൊരു ട്രെക്കിംഗ് മാത്രമായിരുന്നില്ല, മറിച്ച് വർഷങ്ങളായി മനസ്സിൽ കൊണ്ടുനടന്ന വലിയൊരു സ്വപ്നത്തിന്റെ പൂർത്തീകരണമായിരുന്നു. ആത്മവിശ്വാസവും അച്ചടക്കവും കഠിനാധ്വാനവും ഉണ്ടെങ്കിൽ അസാധ്യമെന്ന് കരുതുന്ന ഏതൊരു ലക്ഷ്യവും നേടിയെടുക്കാൻ സാധിക്കുമെന്ന് അദ്ദേഹം തന്റെ നേട്ടത്തെക്കുറിച്ച് പ്രതികരിച്ചു.
പ്രദീപ് മുൻഡേജ എവറസ്റ്റ് ബേസ് ക്യാമ്പിൽ ബാങ്കിന്റെ പതാകയുയർത്തിയ വിവരം പഞ്ചാബ് നാഷണൽ ബാങ്ക് തങ്ങളുടെ ഔദ്യോഗിക ഇൻസ്റ്റാഗ്രാം പേജിലൂടെ പങ്കുവെച്ചിട്ടുണ്ട്. പ്രദീപിന്റെ ഈ ചരിത്രനേട്ടം PNB കുടുംബത്തിന് മുഴുവൻ അഭിമാനകരമായ നിമിഷമാണെന്ന് ബാങ്ക് അധികൃതർ കുറിച്ചു.
