മുഖ്യമന്ത്രി വി.ഡി. സതീശനെതിരെ കോൺഗ്രസിനുള്ളിൽ പ്രതിഷേധം ശക്തമാകുന്നു. മുന്നണിയിൽ കൂടിയാലോചനകൾ നടത്താതെയാണ് തീരുമാനങ്ങൾ എടുക്കുന്നതെന്ന് ആരോപിച്ച് യു.ഡി.എഫ് കൺവീനർ അടൂർ പ്രകാശ് കെ.പി.സി.സി ആസ്ഥാനത്ത് വാർത്താസമ്മേളനം വിളിച്ച് രംഗത്തെത്തി. ഈ അതൃപ്തി എ.ഐ.സി.സിയെ അറിയിക്കുമെന്നും അദ്ദേഹം വ്യക്തമാക്കി. ഭരണപരിഷ്കാര കമ്മിഷൻ അധ്യക്ഷപദവി മുസ്‌ലിം ലീഗിന് നൽകിയതിന് പിന്നാലെയാണ് പാർട്ടിയിലെ ഗ്രൂപ്പ് പോര് പരസ്യമായത്.
കാബിനറ്റ് പദവികളിലേക്കുള്ള പുതിയ നിയമനങ്ങൾ ഉൾപ്പെടെയുള്ള കാര്യങ്ങൾ താൻ മാധ്യമങ്ങളിലൂടെയാണ് അറിഞ്ഞതെന്ന് അടൂർ പ്രകാശ് കുറ്റപ്പെടുത്തി. കഴിഞ്ഞ നാലുമാസമായി യു.ഡി.എഫ് യോഗം ചേർന്നിട്ടില്ലെന്നും ഉപതിരഞ്ഞെടുപ്പിൽ വേണ്ടത്ര ഏകോപനം ഉണ്ടായിരുന്നില്ലെന്നും അദ്ദേഹം പറഞ്ഞു. മുഖ്യമന്ത്രിയുടെ വിമാനയാത്രാ വിവാദത്തിൽ ന്യായീകരണത്തിന് മുതിരാതിരുന്ന കൺവീനർ, സർക്കാരിന്റെ തീരുമാനങ്ങൾ ജനങ്ങളെ ബോധ്യപ്പെടുത്തണമെന്ന് ആവശ്യപ്പെട്ടു. കൂടാതെ, വൈദ്യുതി പ്രതിസന്ധിയാണ് ഉപതിരഞ്ഞെടുപ്പിലെ തോൽവിക്ക് കാരണമായതെന്നും അദ്ദേഹം കൂട്ടിച്ചേർത്തു. എം.കെ. മുനീറിന് പുതിയ പദവി നൽകിയതിലൂടെ സർക്കാർ ലീഗിന്റെ സമ്മർദങ്ങൾക്ക് വഴങ്ങുകയാണെന്ന പ്രതീതി ദേശീയതലത്തിൽ ഉണ്ടാകുമെന്ന് ഒരു വിഭാഗം നേതാക്കൾ കരുതുന്നു.
എന്നാൽ കാബിനറ്റ് പദവികളുടെ കാര്യത്തിൽ നേരത്തെ തന്നെ ധാരണ ഉണ്ടായിരുന്നുവെന്നാണ് മറുവിഭാഗത്തിന്റെ നിലപാട്. ഭരണപരമായ തീരുമാനങ്ങൾക്കപ്പുറം മുഖ്യമന്ത്രി വി.ഡി. സതീശനെതിരെ പാർട്ടിയിൽ രൂപപ്പെട്ട എതിർപ്പുകളാണ് ഇപ്പോൾ പുറത്തുവരുന്നത്. വിവാദങ്ങളിൽ മന്ത്രിമാർക്കെതിരെ സി.പി.ഐ.എം നടത്തുന്ന പ്രചാരണങ്ങളെ ചൂണ്ടിക്കാട്ടി മുഖ്യമന്ത്രി പ്രതിരോധം തീർക്കാൻ ശ്രമിക്കുമ്പോഴാണ് സ്വന്തം പാർട്ടിയിൽ നിന്ന് തന്നെ വിമർശനം ഉയരുന്നത്.
പാർട്ടിക്കുള്ളിലെ പ്രശ്നങ്ങൾ പാർട്ടി വേദികളിൽ ചർച്ച ചെയ്യുമെന്ന് കെ.സി. വേണുഗോപാലും ബെന്നി ബഹനാനും വ്യക്തമാക്കി. എന്നാൽ അടൂർ പ്രകാശിന്റെ നിലപാടിനെ തള്ളിയ കെ. മുരളീധരൻ, നിയമനങ്ങൾ യു.ഡി.എഫിന്റെ സംയുക്ത തീരുമാനമായിരുന്നു എന്ന് അറിയിച്ചു. അതേസമയം അടൂർ പ്രകാശിന്റെ ആരോപണങ്ങളോട് പ്രതികരിക്കാൻ മുഖ്യമന്ത്രി തയ്യാറായില്ല. മുഖ്യമന്ത്രിയോട് ചോദ്യങ്ങൾ ചോദിക്കുന്നത് പോലീസും ജീവനക്കാരും തടയുകയും ചെയ്തു.
യു.ഡി.എഫ് കൺവീനറുടെ പരാമർശങ്ങൾക്ക് മുഖ്യമന്ത്രിയും പാർട്ടി നേതൃത്വവും കൃത്യമായ സമയത്ത് മറുപടി നൽകുമെന്ന് റോജി എം. ജോൺ പറഞ്ഞു. മുന്നണി കൃത്യമായ കൂടിയാലോചനകളോടെയാണ് മുന്നോട്ടുപോകുന്നതെന്നും അദ്ദേഹം കൂട്ടിച്ചേർത്തു. എന്നാൽ വിഷയത്തിൽ മാധ്യമങ്ങളിലൂടെ ചർച്ചയ്ക്കില്ലെന്ന് കെ.സി. വേണുഗോപാൽ വ്യക്തമാക്കിയപ്പോൾ, സ്വന്തം അഭിപ്രായം പാർട്ടിയിൽ പറയുമെന്ന് ബെന്നി ബഹനാന് പ്രതികരിച്ചു. അതൃപ്തി വ്യക്തമാക്കാൻ എല്ലാവർക്കും സ്വാതന്ത്ര്യമുണ്ടെന്നും ബാക്കി കാര്യങ്ങൾ ഹൈക്കമാൻഡ് തീരുമാനിക്കട്ടെയെന്നുമായിരുന്നു കെ. മുരളീധരന്റെ നിലപാട്. ഭരണപരിഷ്കാര കമ്മിഷൻ അധ്യക്ഷ പദവി കേവലം ആളെ പുനരധിവസിപ്പിക്കാനുള്ള ആലങ്കാരിക പദവിയല്ലെന്ന് എം.കെ. മുനീറും പ്രതികരിച്ചു.
