കുട്ടികളുടെ ജങ്ക് ഫുഡ് കഴിക്കുന്ന ശീലം മാറ്റാൻ ഒരു പിതാവ് ചെയ്ത വ്യത്യസ്തമായ പരീക്ഷണം സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിരിക്കുകയാണ്. കുട്ടികളെ ഭയപ്പെടുത്തി നല്ല ശീലങ്ങൾ പഠിപ്പിക്കുന്നത് ശരിയായ രീതിയാണോ എന്ന കാര്യത്തിൽ ആളുകൾക്കിടയിൽ വ്യത്യസ്ത അഭിപ്രായങ്ങളാണ് ഉയരുന്നത്. അർച്ചന സിംഗ് എന്ന ഇൻസ്റ്റാഗ്രാം ഉപയോക്താവ് പങ്കുവെച്ച വീഡിയോയിൽ, പിതാവ് മകളുടെ വയറ്റിൽ വ്യാജ അൾട്രാസൗണ്ട് സ്കാനിംഗ് നടത്തുന്നതാണ് കാണാൻ കഴിയുന്നത്. ലാപ്ടോപ്പുമായി ബന്ധിപ്പിച്ച ഒരു മൗസ് സ്കാനറായി ഉപയോഗിച്ച് അദ്ദേഹം കുട്ടിയുടെ വയറിലൂടെ ചലിപ്പിക്കുന്നു.
തുടർന്ന്, ജങ്ക് ഫുഡ് കഴിച്ചതുകൊണ്ട് വയറിനുള്ളിൽ പുഴുക്കൾ ഉണ്ടായതായി ലാപ്ടോപ്പ് സ്ക്രീനിൽ കാണിക്കുന്നു. ഇത് കണ്ട് ഭയന്ന കുട്ടി കരഞ്ഞുകൊണ്ട് അമ്മയുടെ അടുത്തേക്ക് ഓടുകയും, ഇനി മേലിൽ ജങ്ക് ഫുഡ് കഴിക്കില്ലെന്ന് ഉറപ്പുനൽകുകയും ചെയ്യുന്നു. “ഒരു അച്ഛന്റെ വ്യാജ അൾട്രാസൗണ്ട് പരീക്ഷണം മകളുടെ ജങ്ക് ഫുഡ് കഴിക്കുന്ന ശീലം ഒറ്റയടിക്ക് മാറ്റി” എന്നാണ് വീഡിയോയിലെ വരികളിൽ പറയുന്നത്.
ഈ വീഡിയോയെക്കുറിച്ച് സമ്മിശ്ര പ്രതികരണങ്ങളാണ് ആളുകളിൽ നിന്നുണ്ടായത്. അനാരോഗ്യകരമായ ഭക്ഷണം ഒഴിവാക്കാൻ കുട്ടികളെ പ്രോത്സാഹിപ്പിക്കുന്നതിനുള്ള വ്യത്യസ്തവും ഫലപ്രദവുമായ വഴിയായാണ് ചിലർ ഇതിനെ കണ്ടത്. എന്നാൽ കുട്ടികളെ മനഃപൂർവ്വം ഭയപ്പെടുത്തുന്നത് ശരിയായ രീതിയാണോ എന്ന് മറ്റുചിലർ ചോദ്യം ചെയ്തു. കുട്ടിയെ കരയിപ്പിച്ചതിന് ചിലർ പിതാവിനെ വിമർശിച്ചപ്പോൾ, ഇത്തരം രീതികൾ കുട്ടികളിൽ മാനസികമായ ആഘാതമുണ്ടാക്കുമെന്നാണ് വേറെ ചിലർ അഭിപ്രായപ്പെട്ടത്. “ഇത് തമാശയായി തോന്നാമെങ്കിലും, കുട്ടികൾക്ക് എന്താണ് നൽകേണ്ടതെന്ന് തീരുമാനിക്കേണ്ടത് മുതിർന്നവരാണെന്ന് ഓർക്കണം” എന്ന് ഒരാൾ കുറിച്ചു. “പിന്നീട് കുട്ടികൾ കള്ളം പറയാൻ തുടങ്ങുമ്പോൾ നമ്മൾ അത്ഭുതപ്പെടും, അവർ ഇതെല്ലാം എവിടെ നിന്നാണ് പഠിക്കുന്നതെന്നാണ് ഞാൻ ചിന്തിക്കുന്നത്” എന്നായിരുന്നു മറ്റൊരാളുടെ കമന്റ്.
കുട്ടികളുടെ മോശം ശീലങ്ങൾ മാറ്റാൻ സമാനമായ രീതിയിൽ ഭയപ്പെടുത്തിയ മറ്റൊരു സംഭവം അടുത്തിടെ ഉത്തരാഖണ്ഡിലും നടന്നിരുന്നു. അമിതമായ സ്മാർട്ട്ഫോൺ ഉപയോഗത്തിനെതിരെ വിദ്യാർത്ഥികൾക്ക് മുന്നറിയിപ്പ് നൽകാൻ ഖാട്ടിമയിലെ ആദർശ് ഇന്ത്യ മോണ്ടിസോറി സ്കൂളിൽ സംഘടിപ്പിച്ച ഒരു പരിപാടി കുട്ടികളെ ഭയപ്പെടുത്തുന്നതായിരുന്നു. ഒരു കുട്ടിയുടെ കണ്ണുകളിൽ ബാൻഡേജ് കെട്ടി, കണ്ണിന് ഗുരുതരമായി പരിക്കേറ്റത് പോലെ തോന്നിപ്പിക്കാൻ ചുവന്ന ദ്രാവകം ഒഴിച്ചു. അമിതമായ മൊബൈൽ ഫോൺ ഉപയോഗം കാരണം തന്റെ കണ്ണുകൾ കേടായെന്നും ഡോക്ടർമാർ അത് നീക്കം ചെയ്തെന്നും കുട്ടി സഹപാഠികളോട് പറഞ്ഞു. ഇത് കേട്ട് ഭയന്ന കുട്ടികൾ കരയുന്നതും നിലവിളിക്കുന്നതുമായ വീഡിയോ പുറത്തുവന്നിരുന്നു. ഇതിന് ശേഷം തങ്ങൾ ഇനി മൊബൈൽ ഫോൺ ഉപയോഗിക്കില്ലെന്ന് പല കുട്ടികളും ഉറപ്പുനൽകുകയും ചെയ്തു.
