ഹാവേരി: ഗുരുതരമായ രോഗബാധയെത്തുടർന്ന് മരിച്ചെന്ന് കരുതിയ കർണാടക സ്വദേശിയായ 63-കാരിക്ക് സംസ്കാരച്ചടങ്ങുകൾക്കുള്ള ഒരുക്കങ്ങൾക്കിടെ ജീവനോടെയുണ്ടെന്ന് കണ്ടെത്തി. തുടര്‍ന്ന് ആശുപത്രിയിൽ പ്രവേശിക്കപ്പെടുകയും ചെയ്തു. ഹാവേരി ജില്ലയിലെ സങ്കോല്ലി സ്വദേശിയായ രേണുകമ്മയ്ക്കാണ് ബോധം തെളിഞ്ഞത്. ഹിരേഖേരൂർ താലൂക്കിലെ ഗോഡചികൊണ്ട ഗ്രാമത്തിൽ നടന്ന ഈ അപൂർവ്വ സംഭവത്തിൽ, ബന്ധുക്കളുടെ സമയോചിതമായ ഇടപെടലാണ് ഇവരുടെ ജീവൻ രക്ഷിക്കാൻ സഹായിച്ചത്.
തിങ്കളാഴ്ച രാത്രിയാണ് രേണുകമ്മയ്ക്ക് കടുത്ത രോഗബാധയുണ്ടായത്. രക്തസമ്മർദ്ദവും രക്തത്തിലെ പഞ്ചസാരയുടെ അളവും പെട്ടെന്ന് താഴ്ന്നതിനെത്തുടർന്ന് ഇവർ ബോധരഹിതയാവുകയായിരുന്നു. കുടുംബാംഗങ്ങൾ ഉടൻ തന്നെ ആശുപത്രിയിൽ എത്തിച്ചെങ്കിലും ഇവർ രക്ഷപ്പെടാൻ സാധ്യതയില്ലെന്നാണ് ഡോക്ടർ അറിയിച്ചത്. തുടർന്ന് മറ്റൊരു ആശുപത്രിയിലേക്ക് മാറ്റാൻ ശ്രമിക്കവേ രേണുകമ്മയ്ക്ക് ചലനമില്ലെന്ന് കണ്ട് ഇവർ മരണപ്പെട്ടതായി ബന്ധുക്കൾ കരുതുകയായിരുന്നു. തുടർന്ന് സംസ്കാരച്ചടങ്ങുകൾക്കായി മൃതദേഹം വീട്ടിലേക്ക് കൊണ്ടുവരികയും ബന്ധുക്കളെ വിവരമറിയിച്ച് അടുത്ത ദിവസം നടത്താനിരുന്ന ചടങ്ങുകൾക്കുള്ള ഒരുക്കങ്ങൾ ആരംഭിക്കുകയും ചെയ്തു.
മരിച്ചുവെന്ന് കരുതിയ സമയത്ത് രേണുകമ്മയുടെ ശ്വാസോച്ഛ്വാസം വളരെ ദുർബലമായിരുന്നു. അനക്കമില്ലാതെ കിടന്നതിനാലാണ് ബന്ധുക്കൾ മരണം ഉറപ്പിച്ചത്. ഇതിനിടെ വിലാപയാത്രയ്ക്കുള്ള റീത്തുകളുമായി ബന്ധുക്കൾ ഗ്രാമത്തിൽ എത്തിച്ചേർന്നിരുന്നു. എന്നാൽ അരികിലിരുന്ന് ശ്രദ്ധിച്ചപ്പോൾ ദുർബലമായ ശ്വാസോച്ഛ്വാസം കാരണം ഇവരുടെ നെഞ്ചിൽ ചെറിയൊരു ചലനം ബന്ധുക്കളുടെ ശ്രദ്ധയിൽപ്പെടുകയായിരുന്നു. ഉടൻ തന്നെ ഇവരെ അടുത്തുള്ള സ്വകാര്യ ആശുപത്രിയിലേക്ക് മാറ്റി.
ആശുപത്രി അധികൃതർ തീവ്രപരിചരണം നൽകിയതോടെ രേണുകമ്മയുടെ ആരോഗ്യനില മെച്ചപ്പെട്ടു. നിലവിൽ ഇവർ വൈദ്യസഹായത്തോടെ സുഖം പ്രാപിച്ചുവരികയാണ്. വിലാപവീടായി മാറിയ വീട് നിമിഷങ്ങൾക്കുള്ളിൽ ആശ്വാസത്തിന്റെയും സന്തോഷത്തിന്റെയും കേന്ദ്രമായി മാറിയെന്നതാണ് വേറിട്ട കാഴ്ചയായത്.
