ജയ്പ്പൂരിൽ ആംബുലൻസിന് വഴി നൽകാതെ ഒരു കാർ തടഞ്ഞിട്ടതായി ആരോപിക്കുന്ന വീഡിയോ സോഷ്യൽ മീഡിയയിൽ വലിയ പ്രതിഷേധത്തിന് കാരണമായിട്ടുണ്ട്. കാർഡ്രൈവറുടെ പെരുമാറ്റത്തെ ചോദ്യം ചെയ്തുകൊണ്ട് നിരവധിയാളുകളാണ് ഇവർക്കെതിരെ നടപടി വേണമെന്ന് ആവശ്യപ്പെടുന്നത്.
ജയ്പ്പൂരിലെ വൈശാലി മാർഗ് വെസ്റ്റിലുള്ള എച്ച്.പി പെട്രോൾ പമ്പിന് സമീപമുള്ള പഞ്ചയാവാല പ്രദേശത്താണ് ഈ സംഭവം നടന്നതെന്നാണ് റിപ്പോർട്ട്. എന്നാൽ, ഈ വീഡിയോയുടെ സത്യാവസ്ഥയോ ഇതിന് പിന്നിലെ യഥാർത്ഥ സാഹചര്യങ്ങളോ സ്വതന്ത്രമായി സ്ഥിരീകരിച്ചിട്ടില്ല.
മറ്റൊരു യാത്രക്കാരനുമായി തർക്കത്തിലേർപ്പെട്ട് അത് ഫോണിൽ ചിത്രീകരിക്കുന്നതിനിടയിൽ ഒരു സ്ത്രീ റോഡിന് നടുവിൽ വാഹനം നിർത്തിയിടുകയായിരുന്നു എന്നാണ് പ്രചരിക്കുന്ന വീഡിയോയ്ക്കൊപ്പമുള്ള കുറിപ്പിൽ പറയുന്നത്. ഈ സമയം പിന്നിൽ കിടക്കുന്ന ആംബുലൻസ് സൈറൺ മുഴക്കുന്നതും വഴി കിട്ടാനായി കാത്തു കിടക്കുന്നതും കേൾക്കാം.
‘memoriesoflokendra’ എന്ന ഇൻസ്റ്റാഗ്രാം അക്കൗണ്ടിലൂടെ പുറത്തുവന്ന ഈ വീഡിയോ എഴുപത്തിയാറായിരത്തിലധികം ആളുകളാണ് കണ്ടത്. വീഡിയോ വൈറലായതോടെ വലിയ വിമർശനങ്ങളാണ് ഉയർന്നുവന്നത്. ചിലർ റോഡിലെ തടസ്സത്തെക്കുറിച്ചാണ് സംസാരിച്ചതെങ്കിൽ, മറ്റുള്ളവർ എന്തുകൊണ്ട് ഇത് ചിത്രീകരിച്ച വ്യക്തി ഇടപെട്ട് സ്ത്രീയോട് വണ്ടി മാറ്റാൻ ആവശ്യപ്പെട്ടില്ല എന്ന് ചോദ്യം ചെയ്തു. ഈ സ്ത്രീയുടെ ലൈസൻസ് റദ്ദാക്കണമെന്നും വൻ തുക പിഴ ഈടാക്കണമെന്നും, ആംബുലൻസിലെ രോഗി മരിച്ചാൽ ഇവർക്കെതിരെ മനഃപൂർവ്വമല്ലാത്ത നരഹത്യയ്ക്ക് കേസെടുക്കണമെന്നും ആളുകൾ കമന്റ് ചെയ്തു. ഇത് കുറ്റകൃത്യമാണെന്നും പൊലീസിൽ അറിയിക്കണമെന്നും അഭിപ്രായങ്ങളുയർന്നു. ഡ്രൈവിംഗ് ലൈസൻസ് രണ്ടു വർഷത്തേക്ക് റദ്ദാക്കണമെന്നും ജയിൽ ശിക്ഷ നൽകണമെന്നും ആവശ്യപ്പെടുന്നവരുണ്ട്.
അതേസമയം, ഈ സ്ത്രീക്കെതിരെ കേസ് എടുത്തിട്ടുണ്ടോ എന്നോ പൊലീസ് അന്വേഷണം നടക്കുന്നുണ്ടോ എന്നോ ആംബുലൻസിലുണ്ടായിരുന്ന രോഗിക്ക് എന്തെങ്കിലും സംഭവിച്ചിട്ടുണ്ടോ എന്നോ ഉള്ള വിവരങ്ങൾ ഇതുവരെ ഔദ്യോഗികമായി സ്ഥിരീകരിച്ചിട്ടില്ല. അതിനാൽ അധികാരികൾ സ്ഥിരീകരിക്കുന്നത് വരെ ഈ പ്രചരണങ്ങളെ ജാഗ്രതയോടെ കാണേണ്ടതുണ്ട്.
എങ്കിലും, ആംബുലൻസ് പോലുള്ള അത്യാവശ്യ വാഹനങ്ങൾക്ക് സുരക്ഷിതമായി വഴി നൽകേണ്ടത് ഏതൊരു ഡ്രൈവറുടെയും അടിസ്ഥാനപരമായ ഉത്തരവാദിത്തമാണെന്ന കാര്യം ഈ സംഭവം വീണ്ടും ഓർമ്മിപ്പിക്കുന്നു.
ഇന്ത്യൻ മോട്ടോർ വാഹന നിയമത്തിലെ സെക്ഷൻ 194E പ്രകാരം ആംബുലൻസ്, ഫയർഫോഴ്സ് തുടങ്ങിയ അടിയന്തിര വാഹനങ്ങൾക്ക് മറ്റ് വാഹനങ്ങൾ വഴി മാറി കൊടുക്കേണ്ടതുണ്ട്. ഇത് ലംഘിച്ചാൽ ആറു മാസം വരെ തടവോ, പതിനായിരം രൂപ വരെ പിഴയോ അല്ലെങ്കിൽ ഇവ രണ്ടും കൂടിയോ ശിക്ഷയായി ലഭിക്കാം.
