ഇന്ത്യൻ പുരുഷന്മാരെ വിവാഹം കഴിക്കരുതെന്ന് ഉപദേശിക്കുന്ന ഒരു ഇറ്റാലിയൻ യുവാവിന്റെ വീഡിയോ സോഷ്യൽ മീഡിയയിൽ വൈറലാകുന്നു. ഇൻസ്റ്റാഗ്രാമിൽ പങ്കുവെച്ച ഈ വീഡിയോ ഇതിനകം ദശലക്ഷത്തിലധികം ആളുകളാണ് കണ്ടത്.
ഇന്ത്യൻ പുരുഷന്മാർ സോമ്പികളോ മടിയന്മാരോ ആണെന്നും വീട്ടുകാര്യങ്ങൾ ഒന്നും ചെയ്യാൻ മടിയുള്ളതുകൊണ്ടാണ് അവർ വിവാഹം കഴിക്കുന്നതെന്നുമാണ് ഇറ്റാലിയൻ യുവാവ് വീഡിയോയിൽ പറയുന്നത്. “സ്നേഹം കൊണ്ടാണ് അവർ വിവാഹം കഴിക്കുന്നത് എന്ന് നിങ്ങൾ കരുതുന്നുണ്ടോ? അല്ല, വീട് വൃത്തിയാക്കാനും തുണി അലക്കാനും വേണ്ടിയാണ് അവർ വിവാഹം കഴിക്കുന്നത്,” എന്ന് ഇയാൾ പറയുന്നു. ഇന്ത്യൻ പുരുഷന്മാർ വീടിനുള്ളിൽ അഴുക്കുണ്ടാക്കുന്നതും വസ്ത്രങ്ങൾ വലിച്ചെറിയുന്നതും മറ്റുള്ളവർ വീട് വൃത്തിയാക്കാൻ നിർബന്ധിതരാകുന്നതും ഇയാൾ അഭിനയിച്ചു കാണിക്കുന്നുമുണ്ട്. ‘അയാൾക്ക് മനസ്സിലാകാത്ത പുരുഷാധിപത്യം’ എന്ന അടിക്കുറിപ്പോടെയാണ് വീഡിയോ പങ്കുവെച്ചിരിക്കുന്നത്.
ഈ വീഡിയോ സോഷ്യൽ മീഡിയയിൽ വലിയ ചർച്ചകൾക്ക് വഴിവെച്ചിട്ടുണ്ട്. അനുകൂലിച്ചും പ്രതികൂലിച്ചും നിരവധി ആളുകളാണ് രംഗത്തെത്തിയത്. “എന്റെ അമ്മയെ ആര് നോക്കും എന്ന ചിന്ത കൊണ്ടാണ് അവർ പ്രധാനമായും വിവാഹം കഴിക്കുന്നത്,” എന്ന് ഒരു ഉപയോക്താവ് കുറിച്ചപ്പോൾ, സ്വന്തം മകൻ ഒരു ഗ്ലാസ് വെള്ളം എടുത്ത് കുടിച്ചാൽ പോലും കരയുന്ന അമ്മമാരാണ് ഇന്ത്യൻ പുരുഷന്മാരുടെ ഈ പെരുമാറ്റത്തിന് കാരണമെന്ന് ഒരു ഇന്ത്യൻ യുവതി അഭിപ്രായപ്പെട്ടു.
എന്നാൽ ഈ വാദങ്ങളെ എതിർത്തുകൊണ്ട് മറ്റൊരു ഉപയോക്താവും രംഗത്തെത്തി. “ഇറ്റലിയിൽ ജീവിക്കുന്ന എനിക്കറിയാം, ഇറ്റാലിയൻ പുരുഷന്മാരെക്കുറിച്ച് അവിടുത്തെ സ്ത്രീകളും ഇത് തന്നെയാണ് പറയുന്നത്. പുരുഷാധിപത്യമുള്ള ഏത് സമൂഹത്തിലും ഇത്തരം ആളുകളുണ്ടാകും. എല്ലാ ഇന്ത്യൻ പുരുഷന്മാരും ഇങ്ങനെയല്ല, മികച്ച രീതിയിൽ പെരുമാറുന്ന ധാരാളം ഇന്ത്യൻ പുരുഷന്മാരുണ്ട്,” എന്ന് അവർ കുറിച്ചു. ഈ അഭിപ്രായ പ്രകടനങ്ങൾ ഇപ്പോഴും സോഷ്യൽ മീഡിയയിൽ തുടരുകയാണ്.
