ഡാല്ലാസ്-ഫോർട്ട് വർത്തിൽ നിന്ന് ന്യൂവാർക്കിലേക്ക് പുറപ്പെട്ട അമേരിക്കൻ എയർലൈൻസ് വിമാനം, ഒരു യാത്രക്കാരൻ അക്രമസ്വഭാവം കാണിച്ചതിനെ തുടർന്ന് വ്യാഴാഴ്ച രാത്രി വൈകി ബാൾട്ടിമോറിലേക്ക് തിരിച്ചുവിട്ടു. യാത്രക്കാരും ജീവനക്കാരും ചേർന്ന് ഇയാളെ തടയുകയായിരുന്നു. വിമാനത്തിൽ പ്രശ്നമുണ്ടാക്കിയ യാത്രക്കാരനെ അധികൃതർ പുറത്താക്കിയ ശേഷം വിമാനം ന്യൂവാർക്കിലേക്ക് യാത്ര തുടർന്നു.
യാത്ര തുടങ്ങി രണ്ട് മണിക്കൂറിന് ശേഷമാണ് സംഭവങ്ങളുടെ തുടക്കം. ശാന്തമായിരുന്ന അന്തരീക്ഷം പെട്ടെന്നാണ് ബഹളമയമായതെന്ന് ദൃക്സാക്ഷികൾ പറഞ്ഞു. അക്രമാസക്തനായ യാത്രക്കാരൻ തൊട്ടടുത്തിരുന്ന ആളുടെ കഴുത്തിൽ പിടിച്ച് ഉപദ്രവിക്കാൻ തുടങ്ങിയതോടെ വിമാനത്തിലുണ്ടായിരുന്ന വിരമിച്ച പോലീസ് ഉദ്യോഗസ്ഥനടക്കമുള്ള മറ്റു യാത്രക്കാർ ഇടപെട്ടു. തുടർന്ന് വിമാന ജീവനക്കാർ നൽകിയ സിപ്പ് ടൈകളും ടേപ്പും ഉപയോഗിച്ച് ഇയാളെ സീറ്റിൽ കെട്ടിയിട്ടു.
ശാരീരികമായി ഉപദ്രവിക്കുന്നതിന് മുൻപ് ഇയാളെ ശാന്തനാക്കാൻ ശ്രമിച്ച വിമാന ജീവനക്കാർക്ക് നേരെ ഇയാൾ വംശീയവും അധിക്ഷേപകരവുമായ വാക്കുകൾ ഉപയോഗിച്ചതായും യാത്രക്കാർ ആരോപിച്ചു. സ്ഥിതിഗതികൾ വഷളായതോടെയാണ് പൈലറ്റുമാർ വിമാനം ബാൾട്ടിമോറിലിറക്കാൻ തീരുമാനിച്ചത്. വിമാനം ലാൻഡ് ചെയ്ത ഉടൻ തന്നെ പോലീസ് ഇയാളെ കസ്റ്റഡിയിലെടുത്തു.
യാത്രക്കാരുടെയും ജീവനക്കാരുടെയും സുരക്ഷയ്ക്കാണ് തങ്ങൾ മുൻഗണന നൽകുന്നതെന്നും അക്രമസംഭവങ്ങൾ വെച്ചുപൊറുപ്പിക്കില്ലെന്നും അമേരിക്കൻ എയർലൈൻസ് വ്യക്തമാക്കി. സംഭവത്തിൽ എഫ്.ബി.ഐ അന്വേഷണം ആരംഭിച്ചിട്ടുണ്ട്. സംസ്ഥാന തലത്തിലുള്ള കേസുകളിൽ കസ്റ്റഡിയിലുള്ള ഇയാൾക്കെതിരെ ഫെഡറൽ കുറ്റങ്ങൾ ചുമത്തുന്നതിനെക്കുറിച്ച് അമേരിക്കൻ അറ്റോർണി ഓഫീസുമായി ആലോചിച്ച് തീരുമാനിക്കുമെന്ന് എഫ്.ബി.ഐ അറിയിച്ചു.
