ഇന്ത്യയിലെ പാരമ്പര്യ വിദ്യാഭ്യാസ രീതികളെയും വിജയമാനദണ്ഡങ്ങളെയും ചോദ്യം ചെയ്തുകൊണ്ട് സംരംഭകനും സോഷ്യൽ മീഡിയ ഇൻഫ്ലുവൻസറുമായ അങ്കുർ വരികൂ പങ്കുവെച്ച കുറിപ്പ് വലിയ ഓൺലൈൻ ചർച്ചകൾക്ക് വഴിവെച്ചു. രാജ്യത്തെ പ്രമുഖ എൻജിനീയറിങ് കോളേജുകളിലേക്കുള്ള പ്രവേശന പരീക്ഷയായ ‘ജെ.ഇ.ഇ’ (JEE) രണ്ടുതവണ പരാജയപ്പെട്ട ഇൻഡോർ സ്വദേശിയായ ഒരു യുവ ഡിസൈനറുടെ കഥയാണ് അങ്കുർ വരികൂ പങ്കുവെച്ചത്. പരീക്ഷയിൽ തോറ്റതോടെ പാരമ്പര്യ ഡിഗ്രി പഠനം ഉപേക്ഷിച്ച്, യൂട്യൂബിലെ സൗജന്യ ട്യൂട്ടോറിയലുകൾ കണ്ടാണ് ഈ യുവാവ് പ്രൊഡക്ട് ഡിസൈനിംഗ് സ്വയം പഠിച്ചെടുത്തത്.
നിലവിൽ ഒരു ഫ്രീലാൻസറായി പ്രവർത്തിക്കുന്ന ഈ യുവാവ് പ്രതിമാസം രണ്ടുലക്ഷം രൂപയോളം വരുമാനം ഉണ്ടാക്കുന്നുണ്ടെന്ന് വരികൂ വ്യക്തമാക്കുന്നു. രാജ്യത്തെ മുൻനിര എൻജിനീയറിങ് കോളേജുകളിൽ നിന്ന് പഠിച്ചിറങ്ങുന്ന ബിരുദധാരികളെപ്പോലും വെല്ലുന്ന തരത്തിലുള്ള മികവുറ്റ പ്രൊഫഷണൽ പ്രൊഫൈലാണ് ഈ ചെറുപ്പക്കാരൻ കെട്ടിപ്പടുത്തിരിക്കുന്നത്. ഇന്ത്യയിൽ പ്രതിഭകൾക്ക് യാതൊരു ക്ഷാമവുമില്ലെന്നും, എന്നാൽ വലിയ സർവ്വകലാശാലകളുടെ പേരുകൾക്കും ഡിഗ്രി സർട്ടിഫിക്കറ്റുകൾക്കും മാത്രം പ്രാധാന്യം നൽകുന്ന സമൂഹത്തിന്റെ മനോഭാവമാണ് പ്രശ്നമെന്നും അദ്ദേഹം അഭിപ്രായപ്പെട്ടു. ഒരാൾ മുൻപ് എവിടെയായിരുന്നു എന്ന് കാണിക്കാൻ മാത്രമേ ഡിഗ്രി സർട്ടിഫിക്കറ്റുകൾക്ക് സാധിക്കൂ എന്നും, അവർക്ക് ഭാവിയിൽ എത്രത്തോളം ഉയരത്തിൽ എത്താൻ കഴിയുമെന്ന് നിർണ്ണയിക്കാൻ അതിനാവില്ലെന്നും അദ്ദേഹം കൂട്ടിച്ചേർത്തു.
എന്നാൽ വരികൂവിന്റെ ഈ നിലപാടിനെതിരെ ശക്തമായ വിമർശനങ്ങളും ഉയരുന്നുണ്ട്. ഇത്തരം വിജയഗാഥകൾ അപൂർവ്വമായി മാത്രം സംഭവിക്കുന്ന ഒറ്റപ്പെട്ട ഉദാഹരണങ്ങൾ മാത്രമാണെന്നാണ് ഭൂരിഭാഗം ആളുകളുടെയും വാദം. ഇന്ത്യയിൽ ഐ.ഐ.റ്റിയിൽ (IIT) നിന്ന് പഠിച്ചിറങ്ങുന്നവർക്ക് പോലും ചെറുപ്പത്തിൽ തന്നെ മാസം രണ്ടുലക്ഷം രൂപ ശമ്പളം ലഭിക്കാറില്ലെന്നും, മറ്റു കോളേജുകളിൽ നിന്ന് പഠിക്കുന്നവർ നാൽപ്പത് വയസ്സായാൽ പോലും ഒരുലക്ഷം രൂപ തികച്ചു സമ്പാദിക്കാൻ കഷ്ടപ്പെടാറുണ്ടെന്നും ചിലർ ചൂണ്ടിക്കാട്ടി. 17-ാം വയസ്സിൽ ലോകത്തിലെ തന്നെ ഏറ്റവും കഠിനമായ പരീക്ഷകളിലൊന്ന് പാസ്സാകുന്നത് ചെറിയ കാര്യമല്ലെന്നും, ഇന്ത്യയിലെ വിജയകരമായ പല സ്റ്റാർട്ടപ്പുകൾക്കും പിന്നിൽ ഐ.ഐ.റ്റി പൂർവ്വവിദ്യാർത്ഥികളാണെന്നതും അവിടുത്തെ പഠനമികവിനുള്ള തെളിവാണ് എന്നും മറ്റുള്ളവർ അഭിപ്രായപ്പെട്ടു.
