ഈജിപ്ഷ്യൻ ദേശീയ ഫുട്ബോൾ ടീം പരിശീലകൻ ഹൊസാം ഹസന്റെ രണ്ട് ഭാര്യമാർ തമ്മിൽ പൊതുസ്ഥലത്ത് വച്ച് വലിയ വഴക്കുണ്ടാകുകയും തുടർന്ന് ഹസൻ ബോധരഹിതനായി വീഴുകയും ചെയ്തതായി റിപ്പോർട്ട്. തുടർന്ന് അദ്ദേഹത്തെ ആശുപത്രിയിൽ പ്രവേശിപ്പിച്ചെങ്കിലും നിലവിൽ അപകടനില തരണം ചെയ്തതായാണ് വിവരം. ഈ കൈയാങ്കളിയുടെ വീഡിയോ സോഷ്യൽ മീഡിയയിൽ വ്യാപകമായി പ്രചരിക്കുന്നുണ്ട്.
ഈജിപ്തിലെ നോർത്ത് കോസ്റ്റിലുള്ള പോർട്ടോ മറീനയിലെ ഒരു ഹോട്ടലിൽ വച്ചാണ് ഹസന്റെ ആദ്യ ഭാര്യ ഹുവൈദ അൽ-ഗർബാവിയും നിലവിലെ ഭാര്യ ദിന “ദാൻ ആദം” മുസ്തഫയും തമ്മിൽ ഏറ്റുമുട്ടിയത്. വാക്കുതർക്കത്തിൽ തുടങ്ങിയ വഴക്ക് പിന്നീട് മുടിക്ക് കുത്തിപ്പിടിച്ചും പരസ്പരം തല്ലിയുമുള്ള വലിയ ശാരീരിക ആക്രമണമായി മാറുകയായിരുന്നു. ഹോട്ടലിലുണ്ടായിരുന്ന മറ്റു അതിഥികൾക്കും ബന്ധുക്കൾക്കും സുരക്ഷാ ജീവനക്കാർക്കും ഇടയിൽ ഈ സംഭവം വലിയ പരിഭ്രാന്തി സൃഷ്ടിച്ചു. ഇരുവരെയും പിടിച്ചുമാറ്റാൻ ശ്രമിച്ചെങ്കിലും രണ്ടുപേർക്കും നിസ്സാര പരിക്കുകൾ പറ്റിയിട്ടുണ്ട്.
സംഭവസ്ഥലത്തുണ്ടായിരുന്ന ഹൊസാം ഹസൻ വഴക്ക് തടയാൻ ശ്രമിക്കുന്നതിനിടെയാണ് ബോധരഹിതനായി വീണത്. ഉടൻ തന്നെ അദ്ദേഹത്തെ ആശുപത്രിയിൽ എത്തിക്കുകയായിരുന്നു. ഹസന് ഗുരുതരമായ ആരോഗ്യപ്രശ്നങ്ങൾ നേരിട്ടതായി ചില റിപ്പോർട്ടുകൾ ഉണ്ടെങ്കിലും നിലവിൽ അദ്ദേഹം സുരക്ഷിതനാണ്. ഈ സംഭവത്തെത്തുടർന്ന് ഹസൻ തന്റെ ആദ്യ ഭാര്യ ഹുവൈദയെ വിവാഹമോചനം ചെയ്തതായി വാർത്തകൾ വരുന്നുണ്ടെങ്കിലും ഇരുഭാഗത്തുനിന്നും വ്യത്യസ്തമായ വിശദീകരണങ്ങളാണ് പുറത്തുവരുന്നത്. ദിനയുടെ അഭിഭാഷകൻ ഇത് മുൻകൂട്ടി ആസൂത്രണം ചെയ്ത ആക്രമണമാണെന്ന് ആരോപിച്ചു.
ഹൊസാം ഹസന്റെ പരിശീലനത്തിന് കീഴിൽ 2026-ലെ ഫിഫ ലോകകപ്പിൽ ഈജിപ്ത് ചരിത്രപരമായ പ്രകടനമാണ് കാഴ്ചവെച്ചത്. ഓസ്ട്രേലിയയെ പെനാൽറ്റിയിൽ തോൽപ്പിച്ച് ചരിത്രത്തിലാദ്യമായി അവർ ലോകകപ്പിന്റെ പ്രീ-ക്വാർട്ടറിൽ പ്രവേശിച്ചിരുന്നു. എന്നാൽ വാശിയേറിയ മത്സരത്തിൽ നിലവിലെ ചാമ്പ്യന്മാരായ അർജന്റീനയോട് 3-2 എന്ന സ്കോറിന് പരാജയപ്പെട്ടാണ് അവർ പുറത്തായത്. ഇതിന് പിന്നാലെയാണ് പരിശീലകനെ തേടി ഈ വ്യക്തിപരമായ വിവാദം എത്തിയിരിക്കുന്നത്.
