2022ൽ വാരാണസിയിലെ ഗ്യാൻവാപി പള്ളി സമുച്ചയത്തിൽ സർവേ നടത്താൻ ഉത്തരവിട്ട് ശ്രദ്ധേയനായ ജഡ്ജി രവികുമാർ ദിവാകർ വീണ്ടും വാർത്തകളിൽ നിറയുന്നു. നിലവിൽ മുസാഫർനഗറിലെ അഡിഷനൽ ജില്ലാ സെഷൻസ് ജഡ്ജിയായ അദ്ദേഹം, പ്രതികൾക്ക് തുടർച്ചയായി വധശിക്ഷ വിധിച്ചുകൊണ്ടാണ് ഇപ്പോൾ ശ്രദ്ധ കേന്ദ്രീകരിക്കുന്നത്. മുസാഫർനഗറിൽ ചുമതലയേറ്റ് വെറും നാലു മാസത്തിനിടെ 10 കേസുകളിലായി 22 പേർക്കാണ് അദ്ദേഹം മരണശിക്ഷ വിധിച്ചത്.
നേരത്തെ ബറേലി കോടതിയിൽ സേവനമനുഷ്ഠിച്ചിരുന്ന വേളയിൽ 13 പേർക്കും അദ്ദേഹം വധശിക്ഷ നൽകിയിരുന്നു. ഇതോടെ ജഡ്ജി രവികുമാർ ദിവാകർ ഇതുവരെ വധശിക്ഷയ്ക്ക് വിധിച്ച കുറ്റവാളികളുടെ ആകെ എണ്ണം 35 ആയി ഉയർന്നു. ഏപ്രിൽ ആറിന് ഒരു അഭിഭാഷകന്റെ കൊലപാതക കേസിൽ മൂന്ന് പ്രതികൾക്ക് ശിക്ഷ നൽകിക്കൊണ്ടാണ് മുസാഫർനഗറിൽ അദ്ദേഹം ആദ്യ വധശിക്ഷ വിധി പ്രസ്താവിച്ചത്. തുടർന്ന് ഏപ്രിൽ 28-ന് മറ്റൊരു കൊലപാതക കേസിൽ ഒരു സ്ത്രീക്കും അവരുടെ മൂന്ന് ആൺമക്കൾക്കും ഉൾപ്പെടെ ഒരേ കുടുംബത്തിലെ നാലുപേർക്കും അദ്ദേഹം വധശിക്ഷ വിധിക്കുകയുണ്ടായി.
പിന്നീടുള്ള മാസങ്ങളിലും വിവിധ ഗുരുതര കുറ്റകൃത്യങ്ങളിൽ പങ്കാളികളായവർക്ക് കടുത്ത ശിക്ഷകളാണ് അദ്ദേഹം നൽകിയത്. ഈ തീരുമാനങ്ങളെ അനുകൂലിച്ചും വിമർശിച്ചും സമൂഹത്തിൽ വ്യത്യസ്ത അഭിപ്രായങ്ങൾ ഉയരുന്നുണ്ട്. അതേസമയം, സെഷൻസ് കോടതികൾ പുറപ്പെടുവിക്കുന്ന വധശിക്ഷകൾ നടപ്പിലാക്കണമെങ്കിൽ ഹൈക്കോടതിയുടെ അംഗീകാരം അനിവാര്യമാണ്. മുൻപ് വാരാണസിയിൽ സിവിൽ ജഡ്ജിയായിരിക്കെ ഗ്യാൻവാപി വിഷയത്തിൽ നടത്തിയ ഇടപെടലാണ് ഇദ്ദേഹത്തെ ദേശീയതലത്തിൽ പ്രശസ്തനാക്കിയത്.
