ഹൈദരാബാദ്: വരുമാനത്തിൽ കവിഞ്ഞ സ്വത്ത് സമ്പാദിച്ച കേസിൽ തെലങ്കാന ആന്റി കറപ്ഷൻ ബ്യൂറോ ഡെപ്യൂട്ടി സൂപ്രണ്ട് ഓഫ് പോലീസ് സങ്കീറെഡ്ഡി ഭീം റെഡ്ഡിയെ അറസ്റ്റ് ചെയ്തു. നിലവിൽ ഹൈദരാബാദിലെ പോലീസ് കമ്പ്യൂട്ടർ സർവീസസ് വിഭാഗത്തിൽ ജോലി ചെയ്യുന്ന ഇയാളെ, ലക്ഷ്വറി വസതിയിൽ നിന്നാണ് കസ്റ്റഡിയിലെടുത്തത്. തെലങ്കാനയിലും കർണാടകയിലുമായി 16 സ്ഥലങ്ങളിൽ ഒരേസമയം നടത്തിയ റെയ്ഡുകൾക്ക് ശേഷമായിരുന്നു അറസ്റ്റ്. പിടിച്ചെടുത്ത സ്വത്തുക്കളുടെ വിപണി മൂല്യം 200 കോടി മുതൽ 300 കോടി രൂപ വരെ വരുമെന്ന് ഉദ്യോഗസ്ഥർ അറിയിച്ചു.
എ.സി.ബി നടത്തിയ റെയ്ഡിൽ ഭീം റെഡ്ഡിയുടെയും കുടുംബാംഗങ്ങളുടെയും ബിനാമികളുടെയും പേരിലുള്ള ആഡംബര വില്ലകൾ, വാണിജ്യ സമുച്ചയങ്ങൾ, ഫ്ലാറ്റുകൾ, കൃഷിഭൂമികൾ എന്നിവയുടെ വൻ ശേഖരം തന്നെ കണ്ടെത്തി. ഹൈദരാബാദ് ഇബ്രാഹിംബാഗിലെ വസെല്ല മെഡോസിലുള്ള പ്രീമിയം വില്ല, ടെലികോം നഗറിലെ പെന്റ് ഹൗസ് ഉൾപ്പെടുന്ന മൂന്ന് നില കെട്ടിടം, സായ് പ്രഭ റെസിഡൻസിയിലെ ഫ്ലാറ്റ്, ഗച്ചിബൗളിയിലെ ക്രാന്തി സിയോൺ അപ്പാർട്ട്മെന്റിലെ ഫ്ലാറ്റ്, തെല്ലാപ്പൂരിലെ അഭിനന്ദ റെസിഡൻസിയിലുള്ള രണ്ട് ഫ്ലാറ്റുകൾ എന്നിവയാണ് കണ്ടെത്തിയ പ്രധാന വീടുകൾ. ഇതോടൊപ്പം മണികൊണ്ട ലങ്കോ ഹിൽസ് റോഡിലുള്ള അഞ്ച് നില വാണിജ്യ സമുച്ചയത്തിന്റെ വലിയൊരു പങ്കും, മണികൊണ്ട മാരിചെട്ടു ജംഗ്ഷന് സമീപമുള്ള 3,000 ചതുരശ്ര അടി വാണിജ്യ സ്ഥലവും ഇയാൾക്കുണ്ട്.
പ്രഗതി റിസോർട്ട്സിൽ 500 ചതുരശ്ര വാര പ്ലോട്ട്, നാഗോൾ കാമിനേനി ഹോസ്പിറ്റലിന് സമീപം 200 ചതുരശ്ര വാര പ്ലോട്ട്, പഠാൻചെരുവിലെ ജി.പി.ആർ ഹൗസിംഗ് സൊസൈറ്റിക്ക് സമീപം 400 ചതുരശ്ര വാര പ്ലോട്ട്, പഠാൻചെരുവിലെ മറ്റൊരു 200 ചതുരശ്ര വാര പ്ലോട്ട്, വികാരാബാദ് മോമിൻപേട്ടിൽ 1,000 ചതുരശ്ര വാര സ്ഥലം എന്നിവയും കണ്ടെത്തിയിട്ടുണ്ട്. കൂടാതെ സംഗറെഡ്ഡി സഹീരാബാദിലെ 3.5 ഏക്കർ, കർണാടകയിലെ രണ്ട് വലിയ പ്ലോട്ടുകളിലായുള്ള 44 ഏക്കർ (6 ഏക്കറും 38 ഏക്കറും), ബെംഗളൂരു ദേവനഹള്ളിയിലെ 1 ഏക്കർ, വികാരാബാദ് മോമിൻപേട്ടിലെ 2 ഏക്കർ, മുച്ചിന്തല ഗ്രാമത്തിലെ 4.2 ഏക്കർ കൃഷിഭൂമിയും ഇയാളുടെ പേരിലുണ്ട്.
റിയൽ എസ്റ്റേറ്റ് സ്വത്തുക്കൾക്ക് പുറമേ, വൻതോതിൽ പണവും സ്വർണവും ബിസിനസ്സ് നിക്ഷേപങ്ങളും റെയ്ഡിൽ കണ്ടെടുത്തു. ഡി.എസ്.പിയുടെ വീട്ടിൽ നിന്ന് 3.6 ലക്ഷം രൂപയും ബിനാമിയുടേതെന്ന് സംശയിക്കുന്ന വീട്ടിൽ നിന്ന് 40 ലക്ഷം രൂപയും പിടിച്ചെടുത്തു. ഏകദേശം 2 കിലോഗ്രാം സ്വർണാഭരണങ്ങളും 20 കിലോഗ്രാമോളം വെള്ളി സാധനങ്ങളും കണ്ടെടുത്തു. ബാങ്ക് അക്കൗണ്ടുകളിലായി 19.91 ലക്ഷം രൂപയും, ‘എം/എസ് ശ്രീ രാഘവേന്ദ്ര റോക്ക് സാൻഡ് മിനറൽസ്’ എന്ന സ്ഥാപനത്തിൽ 75 ലക്ഷം രൂപ നിക്ഷേപിച്ചതിന്റെ രേഖകളും കണ്ടെത്തി. കൂടാതെ, ഡി.എസ്.പിയുടെ വീട്ടിൽ നിന്ന് 23 കുപ്പി വിദേശ മദ്യവും എ.സി.ബി പിടിച്ചെടുത്തു. തുടർനടപടികൾക്കായി ഈ വിവരം സംസ്ഥാന എക്സൈസ് വകുപ്പിന് കൈമാറിയിട്ടുണ്ട്.
1989-ൽ കോൺസ്റ്റബിളായി പോലീസ് സേനയിൽ ചേർന്ന ഭീം റെഡ്ഡിക്കെതിരെ, ആഭ്യന്തര പ്രാഥമിക അന്വേഷണത്തിന് ശേഷമാണ് എ.സി.ബി നടപടി സ്വീകരിച്ചത്. അഴിമതി നിരോധന നിയമത്തിലെ വിവിധ വകുപ്പുകൾ പ്രകാരമാണ് കേസ് രജിസ്റ്റർ ചെയ്തിരിക്കുന്നത്. രേഖകളിൽ കാണിച്ചിരിക്കുന്ന സ്വത്തുക്കളുടെ വില യഥാർത്ഥ മൂല്യത്തിന്റെ ഒരു ചെറിയ ഭാഗം മാത്രമാണെന്നും, ഗച്ചിബൗളി, ബെംഗളൂരു തുടങ്ങിയ പ്രമുഖ സ്ഥലങ്ങളിലെ ഇവയുടെ യഥാർത്ഥ വിപണി വില നൂറുകണക്കിന് കോടികൾ വരുമെന്നും ഉദ്യോഗസ്ഥർ വ്യക്തമാക്കി. ഭീം റെഡ്ഡിയെ കോടതിയിൽ ഹാജരാക്കി റിമാൻഡ് ചെയ്യും. ഇയാളുടെ അഴിമതിക്ക് പിന്നിലെ ഇടപാടുകളെയും ശൃംഖലകളെയും കുറിച്ച് അന്വേഷണസംഘം കൂടുതൽ അന്വേഷണം നടത്തിവരികയാണ്.
