ദൈനംദിന ശരീരസംരക്ഷണത്തിന് ആവശ്യമായ പ്രോട്ടീൻ (മാംസ്യം) ലഭിക്കാൻ സസ്യഭക്ഷണങ്ങളിൽ പരിമിതികളുണ്ടെന്നാണ് പലരും കരുതുന്നത്. എന്നാൽ യഥാർത്ഥത്തിൽ ധാരാളം പ്രോട്ടീനും മറ്റ് പോഷകങ്ങളുമടങ്ങിയ ഒട്ടനവധി സസ്യഭക്ഷണങ്ങൾ നമുക്ക് ചുറ്റുമുണ്ട്. പരിപ്പുവർഗ്ഗങ്ങൾ, കടല, ടോഫു, പനീർ, മുളപ്പിച്ച ധാന്യങ്ങൾ എന്നിവയെല്ലാം ഇതിന് മികച്ച ഉദാഹരണങ്ങളാണ്. ഇവയോരോന്നും ശരീരത്തിന് വ്യത്യസ്ത രീതിയിലാണ് ഗുണം ചെയ്യുന്നത്. വിവിധതരം സസ്യഭക്ഷണങ്ങൾ ഉൾപ്പെടുത്തിക്കൊണ്ട് എങ്ങനെ ആരോഗ്യകരമായ ഒരു ഭക്ഷണരീതി തയ്യാറാക്കാമെന്ന് പ്രമുഖ പോഷകാഹാര വിദഗ്ദ്ധയായ ലവ്നീത് ബത്ര ഇൻസ്റ്റാഗ്രാമിലൂടെ പങ്കുവെക്കുന്നു. പ്രധാനപ്പെട്ട ചില സസ്യഭക്ഷണങ്ങളും അവയിൽ അടങ്ങിയിരിക്കുന്ന പ്രോട്ടീന്റെ അളവും താഴെ പറയുന്ന രീതിയിലാണ്.
100 ഗ്രാം പനീറിൽ 20 ഗ്രാം പ്രോട്ടീനും, 100 ഗ്രാം ടോഫുവിൽ 15 ഗ്രാം പ്രോട്ടീനും അടങ്ങിയിരിക്കുന്നു. അതുപോലെ 100 ഗ്രാം വേവിച്ച സോയാബീനിൽ 18 ഗ്രാം പ്രോട്ടീനും, 100 ഗ്രാം വേവിച്ച കടലയിൽ 8.5 ഗ്രാം പ്രോട്ടീനും ഉണ്ട്. 100 ഗ്രാം വേവിച്ച രാജ്മയിൽ 8 ഗ്രാം പ്രോട്ടീനും, 100 ഗ്രാം മുളപ്പിച്ച ചെറുപയറിൽ 3 ഗ്രാം പ്രോട്ടീനും അടങ്ങിയിരിക്കുമ്പോൾ, വറുത്ത കടലയിൽ (100 ഗ്രാം) 20 ഗ്രാം പ്രോട്ടീൻ അടങ്ങിയിട്ടുണ്ട്. നമ്മൾ കഴിക്കുന്ന പരിപ്പിലും പനീറിലും കടലയിലും മുളപ്പിച്ച ധാന്യങ്ങളിലുമെല്ലാം പ്രോട്ടീൻ ഉണ്ടെന്നും, എന്നാൽ ഇവയെല്ലാം ശരീരത്തിൽ വ്യത്യസ്തമായ പങ്കാണ് വഹിക്കുന്നതെന്നും ലവ്നീത് ബത്ര വ്യക്തമാക്കുന്നു. അതുകൊണ്ട് ഏതെങ്കിലും ഒരൊറ്റ ഭക്ഷണത്തെ മാത്രം ആശ്രയിക്കേണ്ടതില്ല.
ആരോഗ്യകരമായ ഭക്ഷണരീതിക്കായി ആഴ്ചയിലെ മെനുവിൽ ഇവ മാറിമാറി ഉൾപ്പെടുത്താൻ അവർ നിർദ്ദേശിക്കുന്നു. ഇതിനായി ചില മികച്ച ഭക്ഷണക്കൂട്ടുകളും അവർ പങ്കുവെക്കുന്നുണ്ട്. പരിപ്പും ചോറും, രാജ്മയും ചോറും, കടലക്കറിയും ചപ്പാത്തിയും, മുളപ്പിച്ച ധാന്യങ്ങളും മോരും, ടോഫുവും ചോറും, പനീറും പച്ചക്കറികളും എന്നിവയെല്ലാം ഒരുമിച്ച് കഴിക്കുന്നത് പ്രോട്ടീൻ ലഭ്യത വർദ്ധിപ്പിക്കും. ഭക്ഷണത്തിൽ പ്രധാന വിഭവമായി പനീറോ ടോഫുവോ സോയാബീനോ ഉൾപ്പെടുത്താം. അതോടൊപ്പം പ്രോട്ടീനും ഫൈബറും കൂടുതൽ ലഭിക്കാൻ കടലയോ രാജ്മയോ ചേർക്കാവുന്നതാണ്. വൈകുന്നേരങ്ങളിലെ ലഘുഭക്ഷണമായി വറുത്ത കടലയോ മുളപ്പിച്ച ചെറുപയറോ തിരഞ്ഞെടുക്കുന്നത് ദിവസം മുഴുവൻ ശരീരത്തിന് ആവശ്യമായ പ്രോട്ടീൻ ലഭിക്കാൻ സഹായിക്കും. ഇത്തരം വ്യത്യസ്തമായ ഭക്ഷണക്കൂട്ടുകൾ ശീലമാക്കുന്നത് ശരീരത്തിന് ആവശ്യമായ പോഷകങ്ങൾ നൽകുന്നതോടൊപ്പം മനസ്സിന് സംതൃപ്തിയും നൽകും.
