തിരുവനന്തപുരം വട്ടിയൂർക്കാവിൽ വധശ്രമക്കേസിൽ ബിജെപി നഗരസഭാ കൗൺസിലർ സുഗതനെ പോലീസ് അറസ്റ്റ് ചെയ്തു. വാഴോട്ടുകോണം വാർഡ് കൗൺസിലറായ ഇയാളെ പിടികൂടുന്നതിനിടെ പ്രദേശത്ത് വലിയ രീതിയിലുള്ള നാടകീയ സംഭവങ്ങളാണ് ഉണ്ടായത്.
സുഗതനെ പോലീസ് കസ്റ്റഡിയിലെടുത്ത വാർത്തയറിഞ്ഞ് എത്തിയ അണികൾ പോലീസുകാരെ തടയുകയും വളയുകയും ചെയ്തു. വട്ടിയൂർക്കാവ് എസ്.എച്ച്.ഒ വിപിന്റെ നേതൃത്വത്തിലുള്ള പോലീസ് സംഘത്തിന് പ്രതിയുമായി അവിടെനിന്ന് പോകാൻ കഴിയാത്ത വിധം ആളുകൾ തടസ്സം സൃഷ്ടിക്കുകയായിരുന്നു. ഒടുവിൽ സംഘർഷാവസ്ഥ മാറ്റാനും കൂടിനിന്ന ജനക്കൂട്ടത്തെ അവിടെനിന്ന് ഓടിക്കാനുമായി പോലീസ് ഉദ്യോഗസ്ഥന് ആകാശത്തേക്ക് വെടിവെക്കേണ്ടി വന്നു.
ഒരു ഉത്സവത്തിനിടയിലുണ്ടായ തർക്കത്തെ തുടർന്ന് ഒരാളെ കൊല്ലാൻ ശ്രമിച്ച കേസിലാണ് ഇപ്പോൾ സുഗതൻ പിടിയിലായിരിക്കുന്നത്. ഈ കേസിൽ മുൻകൂർ ജാമ്യം തേടി സുഗതൻ മുൻപ് ഹൈക്കോടതിയെ സമീപിച്ചിരുന്നെങ്കിലും കോടതി അത് നിരസിച്ചിരുന്നു. കൂടാതെ ജൂൺ ഏഴിന് മുൻപായി പോലീസിന് മുന്നിൽ ഹാജരാകാനും കോടതി ഉത്തരവിട്ടിരുന്നു. എന്നാൽ കോടതി പറഞ്ഞ സമയത്ത് സ്റ്റേഷനിൽ വരാതെ സുഗതൻ ഒളിവിൽ പോവുകയാണ് ചെയ്തത്. പിന്നീട് ഇയാൾ വട്ടിയൂർക്കാവ് പരിധിയിലുണ്ടെന്ന രഹസ്യവിവരത്തെ തുടർന്ന് പോലീസ് നടത്തിയ തെരച്ചിലിലാണ് അറസ്റ്റ് ചെയ്തത്.
അതേസമയം, തനിക്ക് ചിക്കൻപോക്സ് ബാധിച്ചതിനാലാണ് സ്റ്റേഷനിൽ വരാതിരുന്നതെന്നും അറസ്റ്റ് ചെയ്യാനെത്തിയ പോലീസ് തന്റെ ഭാര്യയെയും മകളെയും ഉപദ്രവിച്ചെന്നും സുഗതൻ മാധ്യമങ്ങളോട് പറഞ്ഞു. വൈദ്യപരിശോധനയ്ക്കായി തിരുവനന്തപുരം ജനറൽ ആശുപത്രിയിൽ എത്തിച്ചപ്പോഴായിരുന്നു ഇയാളുടെ ഈ പ്രതികരണം.
