രാവിലെ എഴുന്നേൽറ്റശേഷം ആദ്യം കഴിക്കുന്ന ആഹാരത്തിന് നമ്മുടെ ആരോഗ്യത്തിൽ വലിയ പങ്കുണ്ട്. രാത്രിയിൽ മണിക്കൂറുകളോളം ശരീരം പട്ടിണിയായിരുന്ന ശേഷം കഴിക്കുന്ന ആദ്യത്തെ ഭക്ഷണമാണ് അന്നത്തെ ദഹനത്തെയും ഊർജ്ജനിലയെയും പിന്നീട് വരാവുന്ന വിശപ്പിനെയുമെല്ലാം നിയന്ത്രിക്കുന്നത്. അതുകൊണ്ട് തന്നെ വെറുംവയറ്റിൽ കഴിക്കാൻ പാടില്ലാത്ത ചില ഭക്ഷണങ്ങളെക്കുറിച്ചും അവയ്ക്ക് പകരമായി കഴിക്കാവുന്ന നല്ല ഭക്ഷണങ്ങളെക്കുറിച്ചും ഫിറ്റ്നസ് വിദഗ്ദ്ധയായ കിരൺ കുക്രേജ ചില കാര്യങ്ങൾ പങ്കുവെക്കുന്നു.
വെറുംവയറ്റിൽ ഒഴിവാക്കേണ്ട 5 ഭക്ഷണങ്ങൾ:
ഓറഞ്ച്, പൈനാപ്പിൾ തുടങ്ങിയ സിട്രസ് പഴങ്ങളിൽ ആസിഡിന്റെ അളവ് കൂടുതലാണ്. ഇവ വെറുംവയറ്റിൽ കഴിക്കുന്നത് നെഞ്ചെരിച്ചിലിനും അസിഡിറ്റിക്കും കാരണമാകും. ഭാരം കുറയ്ക്കാനും ആരോഗ്യത്തിനും നല്ലതാണെങ്കിലും വെറുംവയറ്റിൽ ഗ്രീൻ ടീ കുടിക്കുന്നത് അസിഡിറ്റി, ഓക്കാനം, വയറിന് അസ്വസ്ഥത എന്നിവ ഉണ്ടാക്കാം. ഇതിലടങ്ങിയിരിക്കുന്ന കഫീനും ടാനിനുമാണ് വയറിനെ അസ്വസ്ഥമാക്കുന്നത്. ചായയും കാപ്പിയും കുടിച്ച് ദിവസം തുടങ്ങുന്നവരാണ് ഭൂരിഭാഗം ആളുകളും. എന്നാൽ വെറുംവയറ്റിൽ ഇവ കുടിക്കുന്നത് വയറ്റിൽ ആസിഡ് കൂടാനും ഗ്യാസ് നിറയാനും ദഹനക്കേടിനും കാരണമാകും. രാവിലെ തന്നെ എരിവുള്ള ഭക്ഷണങ്ങൾ കഴിക്കുന്നത് വയറിന്റെ ഉള്ളിലെ ചർമ്മത്തെ ദോഷകരമായി ബാധിക്കും. ഇത് വയറ്റിൽ കരിച്ചിലിനും മറ്റ് അസ്വസ്ഥതകൾക്കും വഴിവെക്കും. ഫ്രൂട്ട് ജ്യൂസുകൾ ആരോഗ്യകരമാണെന്ന് തോന്നുമെങ്കിലും വെറുംപഴങ്ങളെ അപേക്ഷിച്ച് ജ്യൂസുകളിൽ നാരുകൾ (ഫൈബർ) വളരെ കുറവാണ്. ഇത് രാവിലെ തന്നെ രക്തത്തിലെ പഞ്ചസാരയുടെ അളവ് വളരെ വേഗത്തിൽ ഉയരാൻ കാരണമാകും.
വെറുംവയറ്റിൽ കഴിക്കാവുന്ന ആരോഗ്യകരമായ 5 ഭക്ഷണങ്ങൾ:
രാവിലെ എഴുന്നേറ്റ് ചെറുചൂടുള്ള ജീരകവെള്ളം കുടിക്കുന്നത് ദഹനം സുഗമമാക്കാനും വയർ വീർക്കുന്ന അവസ്ഥ ഒഴിവാക്കാനും സഹായിക്കും. പുതിയ പഴങ്ങളും പലതരം വിത്തുകളും (seeds) ചേർത്ത് കഴിക്കുന്നത് വഴി ശരീരത്തിന് ആവശ്യത്തിന് ഫൈബറും ജലാംശവും ആരോഗ്യകരമായ കൊഴുപ്പും ലഭിക്കും. ഇത് അമിതഭാരമില്ലാതെ ദിവസം മുഴുവൻ നല്ല ഊർജ്ജം നൽകും. ഫ്രൂട്ട് ജ്യൂസിന് പകരം പച്ചക്കറി ജ്യൂസുകൾ കുടിക്കുന്നത് ശരീരത്തിന് ആവശ്യമായ ജലാംശവും ആന്റിഓക്സിഡന്റുകളും നൽകും. ചുരയ്ക്ക-വെള്ളരിക്ക ജ്യൂസ്, ബീറ്റ്റൂട്ട്-കാരറ്റ് ജ്യൂസ്, വെള്ളരിക്ക-മല്ലിയില ജ്യൂസ് എന്നിവ ഇതിനായി തിരഞ്ഞെടുക്കാം. തലേദിവസം വെള്ളത്തിൽ കുതിർത്തുവെച്ച ബദാമും വാൾനട്ടും രാവിലെ കഴിക്കുന്നത് ദഹനത്തിന് വളരെ നല്ലതാണ്. ഇവ ശരീരത്തിന് ആവശ്യമായ നല്ല കൊഴുപ്പും മിനറലുകളും ദീർഘനേരത്തെ ഊർജ്ജവും നൽകും. മുളപ്പിച്ച ധാന്യങ്ങൾ, തൈര്, ചെറുപയർ ചില്ല (moong chilla) എന്നിവ പ്രഭാതഭക്ഷണത്തിൽ ഉൾപ്പെടുത്താം. ഇവ രക്തത്തിലെ പഞ്ചസാരയുടെ അളവ് നിയന്ത്രിക്കാനും വയർ നിറഞ്ഞതായി തോന്നിക്കാനും ഇടയ്ക്കിടെയുള്ള അനാവശ്യ വിശപ്പ് ഒഴിവാക്കാനും സഹായിക്കും.
