പതിറ്റാണ്ടുകൾക്ക് ശേഷം വലിയ രാഷ്ട്രീയ മാറ്റങ്ങളിലൂടെയാണ് പശ്ചിമ ബംഗാൾ കടന്നുപോകുന്നത്. മമത ബാനർജിയേയും തൃണമൂൽ കോൺഗ്രസിനേയും തൂത്തെറിഞ്ഞുള്ള ബിജെപിയുടെ വിജയം രാജ്യമെങ്ങും ചര്ച്ച ചെയ്യപ്പെടുകയാണ്. ഇതിനിടയിലാണ് തൃണമൂൽ പ്രവർത്തകയെന്ന് അവകാശപ്പെടുന്ന ഒരു സ്ത്രീ, തന്നെ ബിജെപി പ്രവർത്തകർ മർദ്ദിച്ചു എന്ന് പരാതിപ്പെടുന്ന വീഡിയോ സമൂഹമാധ്യമങ്ങളിൽ വൈറലായത്.
തലയിൽ വലിയൊരു കെട്ടുമായി റിപ്പോർട്ടർമാരോട് സംസാരിക്കുന്ന സ്ത്രീയുടെ ദൃശ്യങ്ങളാണ് വീഡിയോയിലുള്ളത്. എന്നാൽ അഭിമുഖത്തിനിടയിൽ അവിടെയുണ്ടായിരുന്ന ഒരാൾ സ്ത്രീയുടെ തലയിലെ ബാൻഡേജ് വലിച്ചുമാറ്റുകയും മുറിവുകളൊന്നുമില്ലെന്ന് പുറംലോകത്തെ കാണിക്കുകയും ചെയ്തു. ഇതോടെ തട്ടിപ്പ് പുറത്തായ പ്രകോപനത്തിൽ ബാൻഡേജ് മാറ്റിയ ആളെ സ്ത്രീയും കൂടെയുള്ളവരും ചേർന്ന് മർദ്ദിക്കുന്നതും ദൃശ്യങ്ങളിൽ കാണാം.
എന്നാൽ ഈ വീഡിയോയെക്കുറിച്ച് നടന്ന വസ്തുതാന്വേഷണത്തിൽ പുറത്തുവന്ന വിവരങ്ങൾ തികച്ചും വ്യത്യസ്തമാണ്. ഒന്നാമതായി, ഈ സ്ത്രീ തൃണമൂൽ കോൺഗ്രസ് പ്രവർത്തകയല്ല. രണ്ടാമതായി, ഈ സംഭവം നടന്നത് പശ്ചിമ ബംഗാളിലുമല്ല. ബിഹാറിലെ മുസാഫർപൂരിലുള്ള ശ്രീകൃഷ്ണ മെഡിക്കൽ കോളേജ് ആശുപത്രിയിൽ നടന്ന ഒരു തർക്കത്തിന്റെ ദൃശ്യങ്ങളാണിത്.
മൗര്യ ധ്വജ് എക്സ്പ്രസ് എന്ന യൂട്യൂബ് ചാനലിന്റെ റിപ്പോർട്ടർ പകർത്തിയ ഈ ദൃശ്യങ്ങൾ, ആശുപത്രിയിലെ ട്രോളി ജീവനക്കാരും രോഗികളുടെ ബന്ധുക്കളും തമ്മിലുണ്ടായ സംഘർഷത്തിന്റേതാണെന്ന് പിന്നീട് സ്ഥിരീകരിച്ചു. ആശുപത്രി ജീവനക്കാർ രോഗികളുടെ ബന്ധുക്കൾക്കെതിരെ ആരോപണം ഉന്നയിക്കുന്നതിനിടെയാണ് ഈ നാടകീയ രംഗങ്ങൾ ഉണ്ടായത്.
ബംഗാൾ തിരഞ്ഞെടുപ്പുമായി ബന്ധപ്പെടുത്തി ‘ഇൻകോഗ്നിറ്റോ’ എന്ന എക്സ് ഹാൻഡിലിലൂടെ പ്രചരിച്ച ഈ വീഡിയോ ലക്ഷക്കണക്കിന് ആളുകളാണ് കണ്ടത്. പലരും ഇത് സത്യമാണെന്ന് വിശ്വസിച്ച് പ്രതികരണങ്ങൾ രേഖപ്പെടുത്തുകയും ചെയ്തു. പശ്ചിമ ബംഗാൾ നിയമസഭാ തിരഞ്ഞെടുപ്പിൽ ബിജെപി ചരിത്ര വിജയം നേടുകയും സർക്കാർ മാറുകയും ചെയ്യുന്ന പശ്ചാത്തലത്തിലാണ് ഇത്തരമൊരു തെറ്റായ വീഡിയോ പ്രചരിച്ചത്.
മെയ് 4-നായിരുന്നു ബംഗാളിലെ തിരഞ്ഞെടുപ്പ് ഫലം പ്രഖ്യാപിച്ചത്. ചുരുക്കത്തിൽ, ബിഹാറിൽ നടന്ന ഒരു ആശുപത്രി സംഘർഷത്തിന്റെ ദൃശ്യങ്ങൾ ബംഗാളിലെ രാഷ്ട്രീയ സംഭവവികാസങ്ങളുമായി കൂട്ടിക്കെട്ടി തെറ്റായ രീതിയിൽ പ്രചരിപ്പിക്കുകയായിരുന്നു എന്ന് വ്യക്തമായി.
