മയാമി അന്താരാഷ്ട്ര വിമാനത്താവളത്തിലെ പരിശോധനാ കേന്ദ്രത്തിലൂടെ കടന്നുപോകാൻ ശ്രമിക്കവെ ബ്രായ്ക്കുള്ളില് രണ്ട് ആമകളെ ഒളിപ്പിച്ച ഫ്ലോറിഡ സ്വദേശിനിയായ യുവതിയെ പിടികൂടിയതായി യുഎസ് ആസ്ഥാനമായുള്ള സുരക്ഷാ ഏജൻസിയായ ട്രാൻസ്പോർട്ടേഷൻ സെക്യൂരിറ്റി അഡ്മിനിസ്ട്രേഷൻ (TSA) അറിയിച്ചു. യുവതിയുടെ പേര് വെളിപ്പെടുത്തിയിട്ടില്ല. ആമകളിൽ ഒന്ന് ജീവനോടെയില്ലായിരുന്നുവെന്നും സുരക്ഷാ ഏജൻസി അറിയിച്ചു.
“ശരീരത്തിലെ സ്വകാര്യ സ്ഥലങ്ങളിൽ മൃഗങ്ങളെ ഒളിപ്പിച്ച് വിമാനത്താവള സുരക്ഷയിലൂടെ കടത്തിക്കൊണ്ടുപോകാൻ ശ്രമിക്കുന്നത് നിർത്തുക,” TSA ഫേസ്ബുക്കിൽ കുറിച്ചു. “നിങ്ങളുടെ വളർത്തുമൃഗങ്ങളോടൊപ്പം യാത്ര ചെയ്യാൻ ഞങ്ങൾ ആഗ്രഹിക്കുന്നു, നിങ്ങൾക്ക് തീർച്ചയായും അതിന് കഴിയും, പക്ഷേ ദയവായി അവരുമായി സുരക്ഷിതമായി യാത്ര ചെയ്യുക.”
TSA അവരുടെ വെബ്സൈറ്റിൽ പറയുന്നതനുസരിച്ച്, ആമകൾ ഉൾപ്പെടെയുള്ള വളർത്തുമൃഗങ്ങളെ സുരക്ഷാ പരിശോധനാ കേന്ദ്രങ്ങളിലൂടെ കൊണ്ടുപോകാൻ യാത്രക്കാരെ അനുവദിക്കുന്നുണ്ട്. മൃഗങ്ങളെ അവയുടെ കൂട്ടിൽ നിന്ന് പുറത്തെടുത്ത് പരിശോധനയ്ക്ക് വിധേയമാക്കണം.
“ഞങ്ങൾ ‘കൊണ്ടുപോകുക’ എന്നാണ് പറഞ്ഞത്, ‘വസ്ത്രത്തിനുള്ളിൽ ഒളിപ്പിക്കുക’ എന്നല്ല,” TSA കൂട്ടിച്ചേർത്തു. കൂടാതെ വിമാനത്തിൽ വളർത്തുമൃഗങ്ങളെ കൊണ്ടുപോകുന്നതിനുള്ള നിയമങ്ങളെക്കുറിച്ച് അതത് വിമാനക്കമ്പനികളുമായി ബന്ധപ്പെടാനും യാത്രക്കാർക്ക് നിർദ്ദേശം നൽകി.
ജീവനോടെയുണ്ടായിരുന്ന ആമയെ ഫ്ലോറിഡ ഡിപ്പാർട്ട്മെന്റ് ഓഫ് ഫിഷ് ആൻഡ് വൈൽഡ് ലൈഫിന് കൈമാറിയതായി TSA പോസ്റ്റിൽ അറിയിച്ചു.
ഈ വർഷം ആദ്യം മാർച്ചിൽ, ന്യൂവാർക്ക് ലിബർട്ടി അന്താരാഷ്ട്ര വിമാനത്താവളത്തിലെ TSA സുരക്ഷാ പരിശോധനയിലൂടെ ഒരു യാത്രക്കാരൻ അധിനിവേശ ഇനത്തിൽപ്പെട്ട ആമയെ കടത്താൻ ശ്രമിച്ചിരുന്നു. ഇയാൾ പാന്റ്സിന്റെ മുൻവശത്താണ് ഉരഗത്തെ ഒളിപ്പിച്ചത്. ഉദ്യോഗസ്ഥർ പറയുന്നതനുസരിച്ച്, ഉരഗത്തിന് പരിക്കുകളൊന്നും ഉണ്ടായിരുന്നില്ല.
ഇത്തരം സംഭവങ്ങൾ സാധാരണമാണ്. 2024-ൽ ഒരു സഞ്ചാരിയെ പാമ്പുകളടങ്ങിയ ബാഗ് വിമാനത്തിൽ കയറ്റാൻ ശ്രമിച്ചതിന് തടഞ്ഞിരുന്നു. മറ്റൊരു സംഭവത്തിൽ, 2023-ൽ മയാമി വിമാനത്താവള അധികൃതർ ആമസോൺ തത്തയുടെ മുട്ടകളും ജീവനുള്ള പക്ഷികളുമുണ്ടായിരുന്ന ഒരു ബാഗ് പിടിച്ചെടുത്തിരുന്നു. ഡഫൽ ബാഗിനുള്ളിൽ നിന്ന് പക്ഷികളുടെ ചില ശബ്ദങ്ങൾ കേൾക്കാമായിരുന്നു.
ഈ മാസം ആദ്യം, TSA അവരുടെ വിമാനത്താവള സുരക്ഷാ പരിശോധന നയത്തിൽ കാര്യമായ മാറ്റം വരുത്തിയിരുന്നു. യുഎസിലെ ചില വിമാനത്താവളങ്ങളിൽ യാത്രക്കാർക്ക് ഇനി സുരക്ഷാ പരിശോധനാ കേന്ദ്രങ്ങളിൽ ഷൂസ് അഴിച്ചുമാറ്റേണ്ടതില്ല. 20 വർഷത്തിലേറെയായി ഈ നിയമം നിലവിലുണ്ടായിരുന്നു.
