പസഫിക് സമുദ്രത്തിൽ സുതാര്യമായ തലയും അസാധാരണമായ പച്ച കണ്ണുകളുമുള്ള അപൂർവ്വ ആഴക്കടൽ മത്സ്യത്തിന്റെ 4K ദൃശ്യങ്ങൾ ശാസ്ത്രജ്ഞർ ക്യാപ്ടർ ചെയ്തു. ‘ബാരിലൈ ഫിഷ്’ (Barreleye fish) എന്നറിയപ്പെടുന്ന ഈ അപൂർവ്വ സമുദ്രജീവിയെ കാലിഫോർണിയയിലെ മോണ്ടെറി തീരത്ത് നടത്തിയ പര്യവേക്ഷണത്തിനിടയിലാണ് മോണ്ടെറി ബേ അക്വേറിയം റിസർച്ച് ഇൻസ്റ്റിറ്റ്യൂട്ട് (MBARI) ഗവേഷകർ ക്യാമറയിൽ പകർത്തിയത്. ആഴക്കടൽ ജീവികളുടെ അത്ഭുതകരമായ അനുകൂലനങ്ങളെക്കുറിച്ചുള്ള കൂടുതൽ വിവരങ്ങൾ നൽകുന്നതാണ് ഈ അപൂർവ്വ കണ്ടെത്തൽ.
ഏകദേശം 2,000 അടി ആഴത്തിൽ കണ്ടെത്തിയ ബാരിലൈ ഫിഷ്
ആറ് ഇഞ്ച് നീളമുള്ള ഈ മത്സ്യം ഒക്ടോബർ 22-നാണ് മോണ്ടെറി കാന്യോണിന് സമീപം ഏകദേശം 1,970 അടി ആഴത്തിൽ കണ്ടെത്തിയത്. ‘ഡോക് റിക്കറ്റ്സ്’ (Doc Ricketts) എന്ന് പേരുള്ള റിമോട്ട് കൺട്രോൾഡ് വെഹിക്കിൾ (ROV) ഉപയോഗിച്ചാണ് ഗവേഷകർ ഈ ദൃശ്യങ്ങൾ പകർത്തിയത്. ‘ഡേവിഡ് പക്കാർഡ്’ എന്ന ഗവേഷണ കപ്പലിലുണ്ടായിരുന്ന സംഘം ഇരുണ്ട ജലത്തിൽ നിശ്ചലമായി നിൽക്കുന്ന ഈ ജീവിയെ ഏകദേശം 20 മിനിറ്റോളം നിരീക്ഷിച്ചു.
ശാസ്ത്രീയമായി ‘മാക്രോപിന്ന മൈക്രോസ്റ്റോമ’ (Macropinna microstoma) എന്നറിയപ്പെടുന്ന ഈ മത്സ്യം സാധാരണയായി 2,000 മുതൽ 2,600 അടി വരെ ആഴത്തിലാണ് കാണപ്പെടുന്നത്. ഇതിന്റെ ഏറ്റവും വലിയ പ്രത്യേകത സുതാര്യവും താഴികക്കുടം പോലുള്ളതുമായ തലയാണ്. ഇതിലൂടെ ഇതിന്റെ തിളക്കമുള്ള പച്ചക്കണ്ണുകൾ വ്യക്തമായി കാണാൻ സാധിക്കും.
സുതാര്യമായ തല ഇതിനെ വ്യത്യസ്തമാക്കുന്നത് എങ്ങനെ?
ഈ മത്സ്യത്തിന്റെ അസാധാരണ ശരീരഘടന വർഷങ്ങളായി ശാസ്ത്രജ്ഞരെ അത്ഭുതപ്പെടുത്തുന്നുണ്ട്. ഇതിന്റെ കുഴൽ രൂപത്തിലുള്ള കണ്ണുകൾ സുതാര്യമായ തലയ്ക്കുള്ളിൽ തിരിക്കാൻ കഴിയും. ഇത് ഇരകളെ കണ്ടെത്താൻ മുകളിലേക്കും, ഭക്ഷണം കഴിക്കുമ്പോൾ മുന്നിലേക്കും നോക്കാൻ സഹായിക്കുന്നു.
ഈ ജീവിയെ താൻ മുമ്പും കണ്ടിട്ടുണ്ടെങ്കിലും, MBARI തങ്ങളുടെ അന്തർവാഹിനികളിൽ 4K ക്യാമറകൾ ഉൾപ്പെടുത്തുന്നതിന് ഒൻപത് വർഷം മുമ്പാണ് അവസാനമായി കണ്ടതെന്ന് എക്സ്പീഡിഷൻ സീനിയർ സയന്റിസ്റ്റ് സ്റ്റീവൻ ഹാഡോക്ക് പറഞ്ഞു. ഭാവന സമ്പന്നനായ ഒരു കുട്ടി വരച്ചതുപോലെയുള്ള അത്ഭുതകരമായ ഒരു ജീവിയാണിതെന്ന് അദ്ദേഹം വിശേഷിപ്പിച്ചു. മുൻകാല ചിത്രങ്ങളിൽ ഈ സുതാര്യമായ ഭാഗം വ്യക്തമായിരുന്നില്ലെന്നും, ജീവനുള്ളപ്പോൾ അതിന്റെ തലയിലെ ഈ സുതാര്യമായ ‘കോക്ക്പിറ്റ്’ കേടുപാടുകൾ കൂടാതെ കാണാൻ കഴിയുന്നത് വലിയൊരു ഭാഗ്യമാണെന്നും അദ്ദേഹം കൂട്ടിച്ചേർത്തു.
ആഴക്കടൽ ജീവിയെ പഠിക്കാൻ ഈ ദൃശ്യങ്ങൾ സഹായിച്ചേക്കാം
സൂര്യപ്രകാശം വളരെ കുറഞ്ഞ ഇത്തരം ആഴക്കടൽ ചുറ്റുപാടുകളിൽ ജീവികൾ എങ്ങനെ കാഴ്ചശക്തി ഉപയോഗിക്കുന്നു എന്ന് മനസ്സിലാക്കാൻ പുതിയ ദൃശ്യങ്ങൾ ഗവേഷകരെ സഹായിച്ചേക്കാം. സമുദ്രത്തിന്റെ മധ്യഭാഗങ്ങളിൽ അതിജീവിക്കാൻ ഈ ജീവികൾ മുകളിലൂടെ കടന്നുപോകുന്ന നിഴലുകൾ പോലുള്ള നേരിയ ഒപ്റ്റിക്കൽ സിഗ്നലുകളെയാണ് ആശ്രയിക്കുന്നത് എന്ന് ഹാഡോക്ക് വ്യക്തമാക്കി. സമുദ്രത്തിലെ ജീവികളുടെ വിസ്മയകരമായ പരിണാമങ്ങളെക്കുറിച്ച് കൂടുതൽ അറിയാൻ ഈ കണ്ടെത്തൽ അവസരമൊരുക്കുന്നു.
