കഴിഞ്ഞ ആഴ്ച നടന്ന വെസ്റ്റ് ഇൻഡീസിനെതിരായ ഏകദിന പരമ്പരയിലെ ടീം തിരഞ്ഞെടുപ്പിൽ ഗൗതം ഗംഭീർ നയിക്കുന്ന ടീം മാനേജ്‌മെന്റിനെതിരെ കടുത്ത വിമർശനവുമായി മുൻ ഇന്ത്യൻ താരം മുഹമ്മദ് കൈഫ്. പരമ്പര ഇന്ത്യ 2-1 ന് സ്വന്തമാക്കിയെങ്കിലും, ടീമിന്റെ സെലക്ഷൻ നയത്തെ ചോദ്യം ചെയ്തുകൊണ്ട് കൈഫ് തന്റെ യൂട്യൂബ് ചാനലിലൂടെ രംഗത്തെത്തുകയായിരുന്നു.
ഒരു മത്സരത്തിൽ മാത്രം കളിപ്പിച്ച ശേഷം പേസർ ആഖിബ് നബിയെ ഒഴിവാക്കിയ ഹെഡ് കോച്ച് ഗൗതം ഗംഭീറിന്റെയും ക്യാപ്റ്റൻ ശുഭ്മൻ ഗില്ലിന്റെയും തീരുമാനത്തെ വിമർശിച്ച കൈഫ്, ഈ സമീപനം ഭാവിയിൽ ടീമിന് തിരിച്ചടിയാകുമെന്ന് മുന്നറിയിപ്പ് നൽകി.
“നിങ്ങൾ പുതിയ കളിക്കാരെ ടീമിലെടുക്കുന്നുണ്ടെങ്കിലും അവർക്ക് ആവശ്യത്തിന് പിന്തുണ നൽകുന്നില്ല. ഒരാളെ കളിപ്പിച്ചാൽ അയാൾക്ക് കൂടുതൽ അവസരങ്ങൾ നൽകണം. എന്തുകൊണ്ടാണ് അവർ നബിയെ ടീമിൽ നിന്ന് ഒഴിവാക്കിയത്? ഇതിനുപകരം കളിച്ച അൻഷുൽ കംബോജും റൺസ് വഴങ്ങിയില്ലേ? ഇത്തരം തീരുമാനങ്ങളിലൂടെ നിങ്ങൾ യുവതാരങ്ങളുടെ ആത്മവിശ്വാസം തകർക്കുകയാണ്. ഇനി എപ്പോഴാണ് നബിയ്ക്ക് ഏകദിനത്തിൽ അവസരം ലഭിക്കുക എന്ന് അറിയില്ല, ചിലപ്പോൾ ഇനി അവസരം ലഭിച്ചില്ലെന്ന് പോലും വരാം. ഇത് തെറ്റായ രീതിയാണ്. ഭാവിയിലേക്ക് കൃത്യമായ പ്ലാനിംഗ് ഇല്ലെങ്കിൽ ഇത് ടീമിന് വലിയ തിരിച്ചടിയാകും,” കൈഫ് പറഞ്ഞു.
എന്നിരുന്നാലും ക്യാപ്റ്റൻസിയിൽ ഗിൽ ഇനിയും പുരോഗമിക്കേണ്ടതുണ്ടെന്ന് പറഞ്ഞ കൈഫ്, പരിചയസമ്പന്നരായ ബൗളർമാരുടെ കുറവ് ഗില്ലിന് തിരിച്ചടിയായെന്നും ചൂണ്ടിക്കാട്ടി. പരിചയസമ്പന്നരല്ലാത്ത ബൗളർമാരുമായി ഇറങ്ങുന്ന യുവ ക്യാപ്റ്റനാണ് ഗില്ലെന്നും, ലോകകപ്പിന് അധികം സമയമില്ലാത്തതിനാൽ അദ്ദേഹം സമ്മർദ്ദത്തിലാകുന്നുണ്ടെന്നും കൈഫ് കൂട്ടിച്ചേർത്തു.
വെസ്റ്റ് ഇൻഡീസിനെതിരായ പരമ്പരയിൽ നിന്ന് പോസിറ്റീവായി ഒന്നും നേടാൻ ഇന്ത്യക്ക് സാധിച്ചിട്ടില്ലെന്നും കൈഫ് അഭിപ്രായപ്പെട്ടു. രോഹിത് ശർമ്മ, വിരാട് കോഹ്‌ലി, ഗിൽ, കെ.എൽ രാഹുൽ എന്നിവർ സെഞ്ചുറി നേടുന്നത് പുതിയ കാര്യമല്ലെന്നും, ടീമിന്റെ ബൗളിംഗ് മേഖലയിലെ ബലഹീനതകൾ പരിഹരിക്കാൻ ഈ പരമ്പര കൊണ്ട് സാധിച്ചില്ലെന്നും അദ്ദേഹം പറഞ്ഞു. ഇതിനുപുറമേ, പരിചയസമ്പന്നനായ പേസർ മുഹമ്മദ് ഷാമിയെ ടീമിലേക്ക് തിരികെ കൊണ്ടുവരുന്നതിൽ പരാജയപ്പെട്ട സെലക്ഷൻ കമ്മിറ്റിയെയും കൈഫ് രൂക്ഷമായി വിമർശിച്ചു.
