സവാള അഥവാ ഉള്ളി നമ്മൾ സ്ഥിരമായി ഉപയോഗിക്കുന്ന ഒന്നാണ്. എന്നാൽ ഉള്ളിയുടെ തൊലി ഉരിയുമ്പോൾ കറുത്ത പാടുകളോ കറുത്ത പൊടിപോലെയുള്ള പദാർത്ഥമോ ശ്രദ്ധിച്ചിട്ടുണ്ടോ? കാണുമ്പോൾ പേടി തോന്നാമെങ്കിലും, ഇത് സാധാരണയായി ‘ബ്ലാക്ക് മോൾഡ്’ അഥവാ കറുത്ത പൂപ്പൽ എന്നറിയപ്പെടുന്ന ഫംഗസ് ബാധ മൂലമുണ്ടാകുന്നതാണ്. ‘അസ്പർഗില്ലസ് നൈഗർ’ (Aspergillus niger) എന്ന ഫംഗസാണ് ഇതിന് കാരണം.
ചൂടും ഈർപ്പവുമുള്ള അന്തരീക്ഷത്തിൽ ഉള്ളി വയ്ക്കുമ്പോഴോ അല്ലെങ്കിൽ ദീർഘകാലം സൂക്ഷിച്ചുവെക്കുമ്പോഴോ ആണ് ഈ ഫംഗസ് വളരുന്നത്. ഉള്ളിയുടെ ഉണങ്ങിയ പുറംതൊലിയിലോ മുകൾഭാഗത്തോ ആണ് സാധാരണയായി കറുത്ത പാടുകൾ കാണപ്പെടുന്നത്.
ഉള്ളിയുടെ ഉണങ്ങിയ പുറംതൊലിയിൽ മാത്രമാണ് ഈ കറുത്ത പാടുകളെങ്കിൽ ആ ഭാഗം കളഞ്ഞതിനു ശേഷം ഉള്ളി ഉപയോഗിക്കാവുന്നതാണ്. കേടുവന്ന തൊലി ഉരിഞ്ഞു കളഞ്ഞ ശേഷം ഉള്ളിയുടെ ഉള്ളിലെ ഭാഗം നല്ല ഉറപ്പുള്ളതാണോ, മറ്റ് നിറവ്യത്യാസങ്ങളോ ദുർഗന്ധമോ ഇല്ലയോ എന്ന് ഉറപ്പുവരുത്തുക. ഉള്ളി നല്ലതാണെങ്കിൽ വശങ്ങൾ നന്നായി കഴുകി ഉപയോഗിക്കാം. എന്നാൽ ഈ കറുത്ത പൂപ്പൽ ഉള്ളിയുടെ ഉള്ളിലെ പാളികളിലേക്ക് പടർന്നിട്ടുണ്ടെങ്കിൽ അത് ഉപയോഗിക്കരുത്.
ഉള്ളി മെഴുക്കുള്ളതോ ചീഞ്ഞതോ ആയി തോന്നുക, ദുർഗന്ധം വരിക, അല്ലെങ്കിൽ പൂപ്പൽ ഉള്ളിലേക്ക് പടരുക എന്നിവ ക കണ്ടാൽ അത് ഉപേക്ഷിക്കണം. പൂപ്പൽ വന്ന ഭാഗം മാത്രം മുറിച്ചു മാറ്റി ബാക്കി ഉപയോഗിക്കുന്നത് സുരക്ഷിതമല്ല, കാരണം ഫംഗസ് ഉൽപ്പാദിപ്പിക്കുന്ന വിഷാംശങ്ങൾ (Mycotoxins) ശരീരത്തിന് ഹാനികരമാണ്.
ഉള്ളി കൃത്യമായി സൂക്ഷിക്കുന്നത് പൂപ്പൽ വരുന്നത് തടയാൻ സഹായിക്കും. വായുസഞ്ചാരമുള്ള, തണുപ്പുള്ള ഉണങ്ങിയ സ്ഥലങ്ങളിൽ വേണം ഉള്ളി വെക്കാൻ. ഈർപ്പം തങ്ങിനിൽക്കാൻ സാധ്യതയുള്ളതിനാൽ പ്ലാസ്റ്റിക് കവറുകളിൽ അടച്ചുവെക്കരുത്. കൂടാതെ, കൂടുതൽ ഈർപ്പം പുറത്തുവിടുന്ന ഉരുളക്കിഴങ്ങ് തുടങ്ങിയ പച്ചക്കറികളുടെ കൂടെ ഉള്ളി സൂക്ഷിക്കാനും പാടില്ല.
