വിഐപി വാഹനവ്യൂഹം കടന്നുപോകാൻ പോലീസ് ഉദ്യോഗസ്ഥൻ സൈക്കിൾ യാത്രക്കാരനെ തള്ളിമാറ്റുകയും സാധനങ്ങൾ കയറ്റിയ സൈക്കിൾ വശത്തേക്ക് മാറ്റിയിടുകയും ചെയ്യുന്ന വീഡിയോകണ്ട് വൻ പ്രതിഷേധം. ശിവസേന എം.പി മിലിന്ദ് ദേവ്റ ഉൾപ്പെടെയുള്ളവർ സംഭവത്തെ രൂക്ഷമായി വിമർശിച്ചു. വിഐപി സുരക്ഷയുടെ പേരിൽ സാധാരണക്കാരായ യാത്രക്കാരോടും തൊഴിലാളികളോടും കാണിക്കുന്ന ക്രൂരമായ പെരുമാറ്റത്തെക്കുറിച്ച് ഈ സംഭവം വീണ്ടും ആശങ്കകൾക്കിടയാക്കിയിട്ടുണ്ട്.
ബാരിക്കേഡ് വെച്ച് തടഞ്ഞ റോഡിലൂടെ സൈക്കിളിൽ സാധനങ്ങളുമായി കടന്നുപോകാൻ ശ്രമിച്ചയാളെയാണ് പോലീസ് ഉദ്യോഗസ്ഥൻ തള്ളിമാറ്റിയത്. പെട്ടെന്നുള്ള തള്ളലിൽ നിയന്ത്രണം നഷ്ടപ്പെട്ട് അയാൾ താഴെ വീഴുന്നത് വീഡിയോയിൽ കാണാം. തുടർന്ന് വിഐപി വാഹനങ്ങൾക്ക് വഴി സുഗമമാക്കുന്നതിനായി പോലീസ് ഉദ്യോഗസ്ഥൻ സൈക്കിൾ വശത്തേക്ക് നീക്കി വെക്കുകയായിരുന്നു. വീഡിയോ സോഷ്യൽ മീഡിയയിൽ പ്രചരിച്ചതോടെ പോലീസിന്റെ പെരുമാറ്റത്തിനെതിരെ ശക്തമായ പ്രതിഷേധമുയർന്നു.
സംഭവത്തോട് പ്രതികരിച്ച മിലിന്ദ് ദേവ്റ, വിഐപി ആരായാലും അധ്വാനിച്ച് ജീവിക്കുന്ന ഒരു സാധാരണക്കാരനെയും അയാളുടെ സൈക്കിളിനെയും ഇത്തരത്തിൽ തള്ളിമാറ്റുന്നത് വച്ചുപൊറുപ്പിക്കാനാകില്ലെന്ന് വ്യക്തമാക്കി. പൊതുജനങ്ങളോട് മാന്യമായി പെരുമാറുന്നതിൽ വിഐപി ആരാണെന്നത് വിഷയമല്ലെന്ന് ചൂണ്ടിക്കാട്ടിയ അദ്ദേഹം, വിഷയത്തിൽ കർശന നടപടി സ്വീകരിക്കണമെന്നും ഇനിയിത് ആവർത്തിക്കില്ലെന്ന് ഉറപ്പാക്കണമെന്നും മുംബൈ പോലീസിനോടും ട്രാഫിക് പോലീസിനോടും ആവശ്യപ്പെട്ടു.
തങ്ങളുടെ ഉപജീവനത്തിനായി സൈക്കിളുകളെയും കൈവണ്ടികളെയും ആശ്രയിക്കുന്ന ആളുകളോട് പെരുമാറുമ്പോൾ പോലീസ് കൂടുതൽ അനുകമ്പ കാണിക്കണമെന്ന് സോഷ്യൽ മീഡിയ ഉപയോക്താക്കൾ ആവശ്യപ്പെട്ടു. വിഐപികളുടെ സുരക്ഷാ ക്രമീകരണങ്ങൾ സാധാരണക്കാരായ പൗരന്മാരോടുള്ള പ്രാഥമിക മര്യാദകളെ ഇല്ലാതാക്കിക്കൊണ്ടാകരുത് എന്ന അഭിപ്രായമാണ് ഭൂരിഭാഗം പേരും പങ്കുവെച്ചത്.
