ജിമ്മിൽ ഏറ്റവുമധികം ആയാസകരവും എന്നാൽ ഒഴിവാക്കാൻ പാടില്ലാത്തതുമായ ഒന്നാണ് ലെഗ് ഡേ അഥവാ കാൽപ്പാദങ്ങൾക്കും കാലുകൾക്കും വേണ്ടിയുള്ള വ്യായാമങ്ങൾ. ശക്തമായ കാലുകൾ ബാഹ്യമായ ഭംഗിക്ക് മാത്രമല്ല; തുടകൾ, ഇടുപ്പ്, നിതംബം (ഗ്ലൂട്ട്സ്), കെണ്ടക്കാൽ (കാഫ്) എന്നിവിടങ്ങളിലെ പേശികൾ നടത്തം, പടികൾ കയറൽ, കസേരയിൽ നിന്ന് എഴുന്നേൽക്കൽ എന്നിവയ്ക്കൊക്കെ സഹായിക്കുന്നു. അടുത്തിടെ നടി ജാൻവി കപൂർ തന്റെ ലെഗ് വർക്കൗട്ടിന്റെ ദൃശ്യങ്ങൾ പങ്കുവെച്ചിരുന്നു.
കേറ്റിൽബെൽ ലിഫ്റ്റുകൾ, ലെഗ് എക്സ്റ്റൻഷനുകൾ, ലെഗ് പ്രസ്സുകൾ എന്നിവ ഉൾപ്പെടുന്നതാണ് അവരുടെ വ്യായാമം. സെലിബ്രിറ്റി വർക്കൗട്ടുകൾ പ്രചോദനകരമാണെങ്കിലും, സൗന്ദര്യത്തിന് അപ്പുറത്തേക്ക് ശരീരത്തിന്റെ കീഴ്ഭാഗത്തെ വിവിധ പേശികളുടെ ശക്തി വർദ്ധിപ്പിക്കുക എന്നതിനാണ് ഇതിൽ പ്രാധാന്യം നൽകേണ്ടത്.
ഗവേഷണങ്ങൾ വ്യക്തമാക്കുന്നത് ആഴ്ചയിൽ രണ്ടുതവണ കീഴ്ഭാഗത്തെ പേശികൾക്കായി വ്യായാമം ചെയ്യുന്നത് കാലുകളുടെ ശക്തിയും പേശീബലവും വർദ്ധിപ്പിക്കാൻ ഏറെ മികച്ചതാണെന്നാണ്. കോമ്പൗണ്ട് (ഒന്നിലധികം പേശികൾ ഒരേസമയം പ്രവർത്തിക്കുന്ന) വ്യായാമങ്ങളും പ്രത്യേക പേശികളെ മാത്രം ലക്ഷ്യമിട്ടുള്ള വ്യായാമങ്ങളും ചേർത്താണ് ജാൻവി കപൂറിന്റെ വ്യായാമ രീതി തയ്യാറാക്കിയിരിക്കുന്നത്. കേറ്റിൽബെൽ ലിഫ്റ്റുകൾ ഇടുപ്പിന്റെയും കാലുകളുടെയും ഏകോപനം മെച്ചപ്പെടുത്തുമ്പോൾ, ലെഗ് എക്സ്റ്റൻഷനുകൾ തുടയിലെ ക്വാഡ്രിസെപ്സ് പേശികളെ കേന്ദ്രീകരിക്കുന്നു. ലെഗ് പ്രസ്സ് ആകട്ടെ കീഴ്ഭാഗത്തെ പ്രധാനപ്പെട്ട പല പേശികളെയും ഒന്നിച്ച് പ്രവർത്തിപ്പിക്കുന്നു. നമ്മൾ നടക്കുന്നതും പടികൾ കയറുന്നതും എഴുന്നേൽക്കുന്നതുമെല്ലാം പല പേശികളുടെ കൂട്ടായ പ്രവർത്തനം മൂലമായതിനാൽ ഇത്തരത്തിലുള്ള വ്യായാമ കോമ്പിനേഷനുകൾ ഏറെ ഫലപ്രദമാണ്.
കേറ്റിൽബെൽ വ്യായാമങ്ങൾ കാലുകൾക്ക് പുറമെ ആങ്ക്ൾ അഥവാ കണങ്കാലിന്റെ സ്ഥിരതയും ബാലൻസും വർദ്ധിപ്പിക്കുന്നു. പലപ്പോഴും കണങ്കാലുകളുടെ ശക്തി നമ്മൾ ശ്രദ്ധിക്കാറില്ലെങ്കിലും കീഴ്ഭാഗത്തെ ചലനങ്ങളുടെ അടിസ്ഥാനം അവയാണ്. ഇനി, തുട മുൻഭാഗത്തെ ശക്തിപ്പെടുത്താൻ സഹായിക്കുന്ന ഒന്നാണ് ലെഗ് എക്സ്റ്റൻഷനുകൾ. മുട്ടുകൾ നിവർക്കാനും ദൈനംദിന കാര്യങ്ങൾ സുഗമമായി ചെയ്യാനും ഇത് സഹായിക്കും. എന്നാൽ ഇതിൽ അമിത ഭാരം ഉപയോഗിക്കാതെ ശ്രദ്ധയോടെ വ്യായാമം ചെയ്യുകയാണ് പ്രധാനം. അതുപോലെ ബാക്ക് സപ്പോർട്ടോടെ കീഴ്ഭാഗത്തെ ഒന്നിലധികം പേശികളെ ബലപ്പെടുത്താൻ ലെഗ് പ്രസ്സ് സഹായിക്കുന്നു.
വയസ്സാകുമ്പോഴും സ്വയം കാര്യങ്ങൾ ചെയ്യാനുള്ള ശേഷിയും സന്തുലിതാവസ്ഥയും നിലനിർത്താൻ തുടകളിലെയും ഇടുപ്പിലെയും പേശികളുടെ ബലം അത്യന്താപേക്ഷിതമാണ്. ഇടുപ്പിലെയും ഗ്ലൂട്ട്സിലെയും പേശികൾ നടക്കുന്നതിനും പെട്ടെന്ന് ദിശ മാറി സഞ്ചരിക്കുന്നതിനും സഹായിക്കുമ്പോൾ, നടക്കുമ്പോൾ ഓരോ ചുവടിലും മുൻപോട്ട് ആഞ്ഞുപോകാൻ കെണ്ടക്കാൽ (കാഫ്) പേശികൾ സഹായിക്കുന്നു. സ്ത്രീകൾ കാർഡിയോ വ്യായാമങ്ങൾ മാത്രം ചെയ്താൽ മതിയെന്നും ഭാരം ഉയർത്തുന്നത് ദോഷമാണെന്നുമുള്ള തെറ്റിദ്ധാരണ മാറേണ്ടതുണ്ട്. അനുയോജ്യമായ രീതിയിൽ ഭാരം ഉയർത്തിയുള്ള വ്യായാമങ്ങൾ ചെയ്യുന്നത് സ്ത്രീകളുടെ ആരോഗ്യത്തിനും പേശീബലത്തിനും വളരെ നല്ലതാണ്.
അതേസമയം, സെലിബ്രിറ്റികളുടെ വർക്കൗട്ടുകൾ അതേപടി അനുകരിക്കുന്നത് നല്ലതല്ല. ഓരോരുത്തരുടെയും ശരീരപ്രകൃതി, മുൻപുണ്ടായ പരിക്കുകൾ, ആരോഗ്യനില എന്നിവ വ്യത്യസ്തമാണ്. ശരിയായ രീതിയിലല്ലാതെ ഭാരമേറിയ വ്യായാമങ്ങൾ ചെയ്യുന്നത് പരിക്കുകൾക്ക് കാരണമാകും. അതിനാൽ കൃത്യമായ പരിശീലനം നേടി, സ്വന്തം ആരോഗ്യത്തിന് അനുയോജ്യമായ രീതിയിൽ കീഴ്ഭാഗത്തെ പേശികളെ ശക്തിപ്പെടുത്തുന്ന വ്യായാമങ്ങൾ പരിശീലിക്കുകയാണ് വേണ്ടത്.
