ടെഹ്റാനിന്റെ ആകാശത്ത് വർണ്ണശബളമായ പ്രകാശങ്ങളോടെ അജ്ഞാമായ ഒരു വസ്തു പാറിനടക്കുന്നതിന്റെ നിരവധി വീഡിയോകൾ സോഷ്യൽ മീഡിയയിൽ പ്രചരിക്കുന്നത് വൻ ഊഹാപോഹങ്ങൾക്ക് വഴിവെച്ചിരിക്കുകയാണ്. സെപ്റ്റംബർ 20-ന് ചിത്രീകരിച്ചതെന്ന് കരുതപ്പെടുന്ന ഈ വീഡിയോകളിൽ, രാത്രിയിലെ ആകാശത്തുകൂടി താഴ്ന്ന് പറക്കുന്ന ഒരു വസ്തുവാണ് കാണപ്പെടുന്നത്. ടെഹ്റാനിലെ ആസാദേഗാൻ എക്സ്പ്രസ്‌വേയ്ക്ക് സമീപമാണ് ഈ സംഭവം നടന്നതെന്ന് എക്സ് (X) പ്ലാറ്റ്‌ഫോമിലെ ഒരു പോസ്റ്റിൽ പറയുന്നു.
എന്നാൽ ഈ വസ്തുവിന്റെ കൃത്യമായ സ്ഥാനം, ഉയരം, വേഗത, അല്ലെങ്കിൽ വലിപ്പം എന്നിവയെക്കുറിച്ച് ഇതുവരെ ഔദ്യോഗിക വിവരങ്ങളൊന്നും ലഭ്യമായിട്ടില്ല. ഇറാനിയൻ അധികൃതരും ഈ വസ്തുവിനെക്കുറിച്ച് പ്രതികരിക്കുകയോ ഇതിനെ ഒരു ഭീഷണിയായി കണക്കാക്കുകയോ ചെയ്തിട്ടില്ല.
ഇറാനും അമേരിക്കയും ഇസ്രായേലും തമ്മിൽ വൻ സംഘർഷാവസ്ഥ നിലനിൽക്കുന്ന പശ്ചാത്തലത്തിലാണ് ഈ വീഡിയോകൾ പുറത്തുവന്നിരിക്കുന്നത്.
ഈ പ്രകാശങ്ങൾ എന്തായിരിക്കാം എന്നതിനെക്കുറിച്ച് പലവിധ സിദ്ധാന്തങ്ങളാണ് സോഷ്യൽ മീഡിയയിൽ ഉയരുന്നത്. ഇതൊരു മിലിട്ടറി ഡ്രോണോ അല്ലെങ്കിൽ ഒന്നിലധികം ഡ്രോണുകൾ ഒരുമിച്ച് പറക്കുന്നതോ ആകാം എന്ന് ചിലർ അഭിപ്രായപ്പെടുന്നു. ഒരു പടികൂടി കടന്ന് അന്യഗ്രഹജീവികളാണോ അതോ പറക്കും തളികയാണോ എന്നൊക്കെ അഭ്യൂഹങ്ങളും പരക്കുന്നുണ്ട്. എന്നാൽ ദൂരെ നിന്ന് നോക്കുമ്പോൾ കാണുന്ന ഏതെങ്കിലും പട്ടമോ മറ്റോ ആകാം ഇതെന്നും ചിലർ സംശയിക്കുന്നു.
മേഖലയിൽ സംഘർഷം രൂക്ഷമായതോടെ സെപ്റ്റംബർ 20-ന് ഇറാനും അമേരിക്കയും പരസ്പരം മുന്നറിയിപ്പുകൾ നൽകിയിരുന്നു. തങ്ങൾക്കെതിരെ വീണ്ടും ആക്രമണമുണ്ടായാൽ മേഖലയിലെ അമേരിക്കൻ സൈനിക താവളങ്ങൾക്കും താൽപ്പര്യങ്ങൾക്കുമെതിരെ തിരിച്ചടിക്കുമെന്ന് ഇറാന്റെ സൈന്യം മുന്നറിയിപ്പ് നൽകിയിട്ടുണ്ടെന്നാണ് റോയിട്ടേഴ്സ് റിപ്പോർട്ട് ചെയ്യുന്നത്. യാത്ര തടസ്സപ്പെടാനും വ്യോമപാതകൾ അടയ്ക്കാനും സാധ്യതയുണ്ടെന്ന് അമേരിക്കൻ സ്റ്റേറ്റ് ഡിപ്പാർട്ട്‌മെന്റും യാത്രക്കാർക്ക് മുന്നറിയിപ്പ് നൽകിയിട്ടുണ്ട്.
ടെഹ്റാനിൽ പുതിയതായി കണ്ട ഈ കാഴ്ച, 1976 സെപ്റ്റംബറിൽ ഇവിടെ നടന്ന പ്രശസ്തമായ ഒരു ആകാശ സംഭവത്തിന്റെ ഓർമ്മകളെ ഉണർത്തുന്നതാണ്. 1976 സെപ്റ്റംബർ 19-ന് ടെഹ്റാനിലെ ആകാശത്ത് വളരെ ശോഭയുള്ള ഒരു വസ്തുവിനെ കണ്ടെത്തിയതായി ഇറാൻ അധികൃതർ റിപ്പോർട്ട് ചെയ്തിരുന്നു. തുടർന്ന് ഇതിനെക്കുറിച്ച് അന്വേഷിക്കാൻ ഇറാന്റെ എഫ്-4 യുദ്ധവിമാനങ്ങൾ അയക്കുകപോലുമുണ്ടായി.
യുഎഫ്ഒ (Unidentified flying object) ഗവേഷകർക്കിടയിൽ ഏറെ ചർച്ച ചെയ്യപ്പെട്ട ഒരു സംഭവമായി ഇത് പിന്നീട് മാറി. 1976-ലെ സംഭവത്തെക്കുറിച്ചുള്ള വിവരങ്ങൾ അമേരിക്കൻ ഗവൺമെന്റിന്റെ രേഖകളിലുമുണ്ട്. യുഎസ് നാഷണൽ സെക്യൂരിറ്റി ഏജൻസിയുടെ ആർക്കൈവുകളിൽ ജോയിന്റ് ചീഫ്സ് ഓഫ് സ്റ്റാഫ് റിപ്പോർട്ട്, ഡിഫൻസ് ഇന്റലിജൻസ് ഏജൻസി സമറി എന്നിവ ഉൾപ്പെടുന്നു.
ഈ സംഭവം ഔദ്യോഗികമായി റിപ്പോർട്ട് ചെയ്യപ്പെടുകയും അന്വേഷിക്കുകയും ചെയ്തിട്ടുണ്ടെന്ന് ഈ രേഖകൾ സ്ഥിരീകരിക്കുന്നു. എങ്കിലും, 1976-ൽ കണ്ട വസ്തുവിന് ഇപ്പോൾ ടെഹ്റാനിൽ കണ്ട പ്രകാശങ്ങളുമായി എന്തെങ്കിലും ബന്ധമുള്ളതായി ഒരു തെളിവുമില്ല.
മാത്രമല്ല, ഇപ്പോൾ പ്രചരിക്കുന്ന വീഡിയോകളുടെ സത്യാവസ്ഥ സ്ഥിരീകരിക്കപ്പെട്ടിട്ടില്ല. ഇത് തിരിച്ചറിയാൻ കഴിയാത്ത വിമാനമാണെന്നോ, മിലിട്ടറി ഡ്രോൺ ആണെന്നോ അല്ലെങ്കിൽ അത്ഭുതകരമായ മറ്റെന്തെങ്കിലും വസ്തുവാണെന്നോ ഇതുവരെ ഉറപ്പിച്ചിട്ടില്ല.
