അടിത്തറ അല്ലെങ്കിൽ അടിസ്ഥാനം എന്നർത്ഥം വരുന്ന ‘ആധാർ’ എന്ന ഹിന്ദി വാക്കിൽ നിന്നാണ് ആധാർ എന്ന പേരുണ്ടായത്. ഇന്ത്യയിൽ വിവിധ സർക്കാർ, പൊതു സേവനങ്ങൾ ലഭ്യമാക്കുന്നതിനുള്ള പ്രധാന അടിസ്ഥാനരേഖയായി ആധാർ കാർഡ് മാറിയിട്ടുണ്ട്. നിരവധി സ്വകാര്യ സേവനങ്ങൾക്കും ഇത് തിരിച്ചറിയൽ രേഖയായി വ്യാപകമായി ഉപയോഗിക്കുന്നു. ട്രെയിൻ ടിക്കറ്റ് ബുക്ക് ചെയ്യാനോ, സിം കാർഡ് എടുക്കാനോ, കുട്ടിയെ സ്കൂളിൽ ചേർക്കാനോ ആകട്ടെ, ആദ്യം ആവശ്യപ്പെടുന്ന രേഖകളിലൊന്ന് ആധാറാണ്.
എന്നാൽ ആധാർ കാർഡിലെ ഫോട്ടോയിൽ പലരും സംതൃപ്തരല്ല. കാർഡ് എടുക്കുന്ന സമയത്ത് പലരും ഇത് കാര്യമാക്കാറില്ലെങ്കിലും പിന്നീട് ഫോട്ടോ നന്നാകാത്തതിൽ നിരാശപ്പെടാറുണ്ട്. ആധാർ കാർഡിലെ ഫോട്ടോ മാറ്റാൻ സാധിക്കുമോ എന്നും, മുൻപ് ഒരിക്കൽ മാറ്റിയതാണെങ്കിൽ വീണ്ടും മാറ്റാൻ കഴിയുമോ എന്നും പലരും സംശയിക്കാറുണ്ട്.
ആധാറിലെ ഫോട്ടോ എത്ര തവണ മാറ്റാം?
യൂണിക്ക് ഐഡന്റിഫിക്കേഷൻ അതോറിറ്റി ഓഫ് ഇന്ത്യയുടെ (UIDAI) ഔദ്യോഗിക വെബ്സൈറ്റ് അനുസരിച്ച്, ആധാർ കാർഡിലെ ഫോട്ടോ എത്ര തവണ വേണമെങ്കിലും മാറ്റാവുന്നതാണ്. ഇതിന് നിശ്ചിത പരിധികളൊന്നുമില്ല. ഫോട്ടോ മാറ്റാൻ ആഗ്രഹിക്കുന്നവർ അടുത്തുള്ള ആധാർ സേവന കേന്ദ്ര സന്ദർശിച്ച് ബയോമെട്രിക് അപ്ഡേറ്റിനായി അപേക്ഷ നൽകിയാൽ മതിയാകും.
ആധാർ ഫോട്ടോ എങ്ങനെ മാറ്റാം, ഫീസ് എത്രയാണ്?
ആധാർ കാർഡിലെ ഫോട്ടോ അപ്ഡേറ്റ് ചെയ്യാൻ UIDAI അനുമതി നൽകുന്നുണ്ടെങ്കിലും, വീട്ടിലിരുന്ന് ഓൺലൈനായി ഇത് ചെയ്യാൻ കഴിയില്ല. ക്യാമറയും ബയോമെട്രിക് പരിശോധനയും ആവശ്യമായതിനാൽ നിർബന്ധമായും അടുത്തുള്ള ആധാർ സേവന കേന്ദ്രത്തിൽ പോകേണ്ടതുണ്ട്.
ആധാർ സേവന കേന്ദ്രത്തിലെത്തി അപ്ഡേഷൻ ഫോം പൂരിപ്പിച്ചു നൽകണം. തുടർന്ന് ബയോമെട്രിക് വിവരങ്ങൾ പരിശോധിച്ച ശേഷം കേന്ദ്രത്തിലെ ക്യാമറ ഉപയോഗിച്ച് പുതിയ ഫോട്ടോ പകർத்தும். ഈ ഫോട്ടോയായിരിക്കും നിങ്ങളുടെ പുതുക്കിയ ആധാർ കാർഡിൽ വരുന്നത്.
ഫോട്ടോ മാറ്റുന്നതിനായി 125 രൂപ ഫീസ് നൽകേണ്ടി വരും. പ്രക്രിയ പൂർത്തിയായി ഏതാനും ദിവസങ്ങൾക്കകം വിവരങ്ങൾ അപ്ഡേറ്റ് ചെയ്യപ്പെടും. അതിനുശേഷം പുതിയ ആധാർ കാർഡ് ഡൗൺലോഡ് ചെയ്തെടുക്കാം.
അപേക്ഷ നിരസിക്കപ്പെട്ടാൽ എങ്ങനെ പരാതി നൽകാം
- ഓൺലൈൻ വഴി: UIDAI-യുടെ ഗ്രീവൻസ് റെഡ്രസൽ പോർട്ടൽ സന്ദർശിച്ച് പരാതി സമർപ്പിക്കാം.
- ഇമെയിൽ വഴി: help[at]uidai[dot]gov[dot]in എന്ന വിലാസത്തിലേക്ക് ഇമെയിൽ അയക്കാം.
- ഹെൽപ്പ് ലൈൻ: 1947 എന്ന ടോൾ ഫ്രീ നമ്പറിൽ ബന്ധപ്പെടാം.
- റീജിയണൽ ഓഫീസ്: UIDAI വെബ്‌സൈറ്റിൽ നിന്ന് വിലാസം കണ്ടെത്തി അടുത്തുള്ള റീജിയണൽ ഓഫീസിൽ നേരിട്ടെത്തി പരാതി നൽകാം.
