ഗോവയിലെ ഖണ്ഡേപാറിൽ ഒരു വീട്ടുപറമ്പിൽ കൂറ്റൻ മുതല ഇറങ്ങിയത് പ്രദേശവാസികളിൽ വലിയ പരിഭ്രാന്തി സൃഷ്ടിച്ചു. സാധാരണ ദിവസമായിരുന്ന ഇവിടെ ആളുകൾ നോക്കിനിൽക്കെയാണ് മുതല സ്വൈര്യവിഹാരം നടത്തിയത്. മുതലയെ കണ്ട് പരിഭ്രാന്തരായ തെരുവുനായ്ക്കൾ അതിനുനേരെ ഉച്ചത്തിൽ കുരച്ചുകൊണ്ട് നിൽക്കുന്നതും കാണാമായിരുന്നു.
റെസിഡൻഷ്യൽ പ്രദേശത്തൂടെ മുതല നടന്നുനീങ്ങുന്ന വീഡിയോ ദൃശ്യങ്ങൾ സമൂഹമാധ്യമങ്ങളിൽ പ്രചരിക്കുന്നുണ്ട്. പുറത്തിരിക്കുകയായിരുന്ന ചിലർ മുതല വീടിന് അടുത്തേക്ക് വരുന്നത് കണ്ട് പെട്ടെന്ന് തന്നെ വീടിനുള്ളിലേക്ക് കയറി രക്ഷപ്പെട്ടു. വീടുകൾക്ക് തൊട്ടടുത്ത് ഇത്രയും വലിയൊരു ഉരഗത്തെ കണ്ടത് നാട്ടുകാരിൽ ആശങ്കയുണ്ടാക്കി. എന്നാൽ ആളുകൾ സ്വന്തം നിലയിൽ അതിനെ ഓടിക്കാൻ ശ്രമിക്കാതെ ഉടൻ തന്നെ വനംവകുപ്പിനെയും വന്യജീവി രക്ഷാപ്രവർത്തകരെയും വിവരമറിയിക്കുകയായിരുന്നു.
വിവരമറിഞ്ഞ് വന്യജീവി രക്ഷാപ്രവർത്തകനായ ചരൺ ദേശായിയും സംഘവും സ്ഥലത്തെത്തി. വളരെ ശ്രദ്ധയോടെ ആസൂത്രണം ചെയ്ത രക്ഷാപ്രവർത്തനത്തിനൊടുവിൽ അവർ മുതലയെ സുരക്ഷിതമായി പിടികൂടി അവിടെനിന്ന് മാറ്റി. ആളുകൾക്കോ മുതലയ്ക്കോ യാതൊരുവിധ പരിക്കുകളും കൂടാതെയാണ് സാഹസികമായ ഈ രക്ഷാപ്രവർത്തനം പൂർത്തിയാക്കിയത്.
പിന്നീട് സമൂഹമാധ്യമങ്ങളിൽ വൈറലായ വീഡിയോയ്ക്ക് നിരവധി ആളുകളാണ് കമന്റുകളുമായി എത്തിയത്. കൂറ്റൻ മുതലയുടെ വലിപ്പവും അത് ജനവാസ മേഖലയിൽ എത്തിയതുമാണ് പലരെയും അത്ഭുതപ്പെടുത്തിയത്. ഭയപ്പെടുത്തുന്ന രൂപത്തിലുള്ള മുതലയെ കണ്ടിട്ടും പേടിക്കാതെ കുരച്ചുചാടിയ തെരുവുനായ്ക്കളുടെ ധൈര്യത്തെ ചിലർ പുകഴ്ത്തിയപ്പോൾ, മുതല മുന്നിലൂടെ നടക്കുമ്പോഴും വളരെ ശാന്തരായി നിന്ന ആളുകളുടെയും വീഡിയോടെടുത്ത വ്യക്തിയുടെയും ഭയമില്ലായ്മയെ ചിലർ തമാശയോടെ ചോദ്യം ചെയ്തു. ചരൺ ദേശായിയുടെയും സംഘത്തിന്റെയും കൃത്യസമയത്തുള്ള ഇടപെടൽ മൂലം വൻ അപകടമാണ് അവിടെ ഒഴിവായത്.
