1947-ലെ ഇൻഡ്യാ-പാക് വിഭജനത്തിന് തൊട്ടുമുമ്പുള്ള നിർണായക ഘട്ടത്തിൽ, പാകിസ്ഥാൻ സ്ഥാപകൻ മുഹമ്മദ് അലി ജിന്നയുടെ മാരകരോഗ വിവരം അതീവ രഹസ്യമായി സൂക്ഷിച്ചതിന് മുംബൈക്കാരായ രണ്ട് ഇന്ത്യൻ പാഴ്സി ഡോക്ടർമാർക്ക് പാകിസ്ഥാന്റെ ഏറ്റവും ഉയർന്ന സിവിലിയൻ ബഹുമതി പ്രഖ്യാപിച്ചു. ഫിസിഷ്യൻ ഡോ. ജാൽ രതൻജി പട്ടേൽ, റേഡിയോളജിസ്റ്റ് ഡോ. ജാൽ ധായ്ഭോ-കൂ എന്നിവർക്കാണ് മരണാനന്തര ബഹുമതിയായി ‘നിഷാൻ-ഇ-ഇംതിയാസ്’ പുരസ്കാരം നൽകുന്നത്.
പാകിസ്ഥാൻ ആസൂത്രണ വികസന മന്ത്രിയും അവാർഡ് കമ്മിറ്റി അധ്യക്ഷനുമായ അഹ്സൻ ഇഖ്ബാലാണ് ഈ പ്രഖ്യാപനം നടത്തിയത്. 1946-ൽ ജിന്നയുടെ എക്സ്-റേ പരിശോധിച്ച ഈ ഡോക്ടർമാർ, അദ്ദേഹത്തെ ബാധിച്ച ക്ഷയരോഗം ഗുരുതരമാണെന്നും ഒരു ഒന്നര വർഷത്തിനപ്പുറം ആയുസ്സില്ലെന്നും കണ്ടെത്തിയിരുന്നു. എന്നാൽ, ഒരു ഡോക്ടർ പാലിക്കേണ്ട തൊഴിൽപരമായ രഹസ്യാത്മകത കാത്തുസൂക്ഷിക്കാൻ അവർ തയ്യാറായി. ഈ രോഗവിവരം അന്ന് പുറത്തുവന്നിരുന്നെങ്കിൽ വിഭജനത്തിന്റെ സമയക്രമത്തെയും പാകിസ്ഥാന്റെ രൂപീകരണത്തെത്തന്നെയും അത് ബാധിക്കുമായിരുന്നുവെന്ന് ചരിത്രകാരന്മാർ വിശ്വസിക്കുന്നു.
ജിന്നയുടെ രോഗവിവരത്തിന്റെ ഗൗരവം തനിക്ക് അറിയാമായിരുന്നെങ്കിൽ വിഭജനം വൈകിപ്പിക്കുമായിരുന്നുവെന്നും, അത് ചരിത്രഗതിതന്നെ മാറ്റിയെഴുതുമായിരുന്നുവെന്നും അവസാനത്തെ വൈസ്രോയിയായിരുന്ന മൗണ്ട്ബാറ്റൺ പ്രഭു പിന്നീട് സമ്മതിച്ചതായി അഹ്സൻ ഇഖ്ബാൽ ചൂണ്ടിക്കാട്ടി. 1930-കൾ മുതൽ ജിന്ന ക്ഷയരോഗബാധിതനായിരുന്നുവെന്ന് പ്രമുഖ ചരിത്രകാരൻ അക്ബർ അഹമ്മദും എഴുതിയിട്ടുണ്ട്. തന്റെ രോഗവിവരം പുറത്തുവന്നാൽ അത് തന്റെ രാഷ്ട്രീയ നേതൃത്വത്തെ ബാധിക്കുമെന്ന ഭയത്താൽ ജിന്ന തന്നെ അത് ജനങ്ങളിൽ നിന്ന് മറച്ചുവെക്കുകയായിരുന്നു.
1947 ഓഗസ്റ്റിൽ പാകിസ്ഥാൻ രൂപീകൃതമായി കേവലം ഒരു വർഷത്തിനുശേഷം, 1948 സെപ്റ്റംബർ 11-നാണ് ജിന്ന അന്തരിച്ചത്. ജിന്നയുടെ മരണത്തിന് 78 വർഷങ്ങൾക്ക് ശേഷം, 2027 മാർച്ച് മാസം നടക്കുന്ന ചടങ്ങിൽ ഡോക്ടർമാർക്കുള്ള ഈ ബഹുമതി ഔദ്യോഗികമായി സമ്മാനിക്കും.
