ബാങ്കോക്കിലെ ഒരു ടാക്സി യാത്ര യാത്രികർക്ക് തികച്ചും അപ്രതീക്ഷിതവും കൗതുകകരവുമായ ഒരു അനുഭവമായി മാറുകയാണ്. ദൈനംദിന ജീവിതത്തിന് ആവശ്യമായ അത്യാവശ്യ സാധനങ്ങൾ ടാക്സിക്കുള്ളിൽ സൂക്ഷിച്ചിരിക്കുന്ന ഡ്രൈവർ, ഇവയെല്ലാം യാത്രക്കാർക്ക് തികച്ചും സൗജന്യമായാണ് നൽകുന്നത്. ഡ്രൈവറുടെ ഈ മാതൃകാപരമായ പ്രവൃത്തിയെ പ്രശംസിച്ചുകൊണ്ട് സോഷ്യൽ മീഡിയയിൽ പ്രചരിക്കുന്ന വീഡിയോ നിരവധി ആളുകളുടെ ശ്രദ്ധ പിടിച്ചുപറ്റി.
‘ഫ്ലോറ ആൻഡ് നോട്ട്’ എന്ന ഇൻസ്റ്റാഗ്രാം പേജിലൂടെയാണ് ഈ വീഡിയോ പുറത്തുവന്നത്. കഴിഞ്ഞ 10 വർഷത്തോളമായി ഈ ഡ്രൈവർ ഇത്തരം സേവനം നൽകി വരുന്നുണ്ടെന്ന് വീഡിയോയുടെ അടിക്കുറിപ്പിൽ പറയുന്നു. ടാക്സിക്കുള്ളിലെ ഈ സംവിധാനം കണ്ട് സന്തോഷിക്കുന്ന യാത്രക്കാർ ഡ്രൈവർക്ക് വലിയ തുക ടിപ്പ് നൽകാറുണ്ട്. ഈ പണം ഉപയോഗിച്ചാണ് അദ്ദേഹം വീണ്ടും പുതിയ സാധനങ്ങൾ വാങ്ങി വെക്കുന്നത്.
ടാക്സിയിലുള്ള എല്ലാ സാധനങ്ങളും സൗജന്യമാണെന്ന് അറിയുമ്പോൾ യാത്രക്കാർ അത്ഭുതപ്പെടുന്നത് വീഡിയോയിൽ കാണാം. ടൂത്ത് ബ്രഷ്, സോക്സ്, കണ്ണാടി, ബേബി പൗഡർ, പൂച്ചകൾക്കുള്ള ഭക്ഷണം എന്നിവയെല്ലാം ഈ ടാക്സിക്കുള്ളിൽ ഒരുക്കിയിട്ടുണ്ട്. ഇതിന് പുറമെ കുടിവെള്ളവും കോഫിയും ഡ്രൈവർ യാത്രക്കാർക്കായി നൽകുന്നുണ്ട്. ഒരു ചെറിയ “മിനി മാർക്കറ്റ്” പോലെയാണ് ഈ ടാക്സി അനുഭവപ്പെടുന്നതെന്ന് യാത്രക്കാർ പറയുന്നു.
യാത്രക്കാരിൽ നിന്ന് ലഭിക്കുന്ന ടിപ്പ് തുക ഉപയോഗിച്ച് സാധനങ്ങൾ വീണ്ടും വാങ്ങി വെക്കുന്നതിലൂടെ പരസ്പര സഹായത്തിന്റെ മനോഹരമായ ഒരു മാതൃക കൂടിയാണ് ഈ ഡ്രൈവർ മുന്നോട്ട് വെക്കുന്നത്. ഡ്രൈവറുടെ ഈ നന്മയെയും പെരുമാറ്റത്തെയും വാനോളം പുകഴ്ത്തിക്കൊണ്ട് നിരവധിയേറെ ആളുകളാണ് വീഡിയോക്ക് താഴെ പ്രതികരണങ്ങളുമായി എത്തുന്നത്.
