പശ്ചിമ ബംഗാളിലെ കാളിംപോംഗ് ജില്ലയിലുള്ള ബിന്ദുവിൽ കൂറ്റൻ മണ്ണിടിച്ചിലിൽ നിന്ന് ബൈക്ക് യാത്രികൻ തലനാരിഴയ്ക്ക് രക്ഷപ്പെട്ടു. റോഡിലേക്ക് വൻതോതിൽ പാറയും മണ്ണും അപ്രതീക്ഷിതമായി പതിച്ചപ്പോൾ ഓടിമാറാൻ സെക്കൻഡുകൾ മാത്രമാണ് ഇയാൾക്ക് ലഭിച്ചത്. ഈ ഭീതിജനകമായ രംഗങ്ങൾ ക്യാമറയിൽ പതിഞ്ഞിട്ടുണ്ട്. നിർണ്ണായകമായ ഈ പാതയിൽ മണ്ണിടിഞ്ഞതിനെ തുടർന്ന് ഗതാഗതം പൂർണ്ണമായി തടസ്സപ്പെടുകയും യാത്രക്കാർക്കിടയിൽ ഭീതി പടരുകയും ചെയ്തു.
മറ്റൊരു സംഭവത്തിൽ, സോജില ചുരത്തിന് സമീപമുള്ള സോനാമാർഗ് രംഗാ മോഡ് പ്രദേശത്ത് കനത്ത മേഘവിസ്ഫോടനത്തെ തുടർന്ന് ശക്തമായ മണ്ണിടിച്ചിലും ഉരുൾപൊട്ടലുമുണ്ടായി. ശ്രീനഗർ-ലേ ദേശീയപാതയിലെ രംഗാ മോഡിന് സമീപം കൂറ്റൻ മണ്ണിടിച്ചിൽ ഉണ്ടായതോടെ രണ്ട് പ്രദേശങ്ങൾ തമ്മിലുള്ള ഗതാഗതം പൂർണ്ണമായി തടസ്സപ്പെട്ടു. ടൺ കണക്കിന് അവശിഷ്ടങ്ങളാണ് മലനിരകളിൽ നിന്ന് റോഡിലേക്ക് പതിച്ചത്.
മുൻകരുതലെന്ന നിലയിൽ നദീതീരങ്ങളിൽ നിന്നും ജലാശയങ്ങളിൽ നിന്നും മാറിനിൽക്കാൻ പ്രദേശവാസികൾക്ക് നിർദ്ദേശം നൽകിയിട്ടുണ്ട്. സംഭവത്തിൽ ആർക്കും ജീവഹാനി റിപ്പോർട്ട് ചെയ്തിട്ടില്ല. പ്രദേശത്ത് രക്ഷാപ്രവർത്തകരെ വിന്യസിച്ചിട്ടുണ്ടെങ്കിലും കനത്ത മണ്ണിടിച്ചിൽ കാരണം ശ്രീനഗറിനും ലേയ്ക്കും ഇടയിലുള്ള ഗതാഗത ബന്ധം പൂർണ്ണമായി നിലച്ചിരിക്കുകയാണ്.
