ഓരോ ഇന്ത്യൻ അടുക്കളയിലും, തൻ്റെ കഴിവിനേക്കാൾ കൂടുതൽ പണിയെടുക്കുന്ന ഒരൊറ്റ ഉപകരണമേയുള്ളൂ – അത് മിക്സർ ഗ്രൈൻഡർ ആണ്. ഫ്രെഷ് തേങ്ങാ ചട്ണി ഉണ്ടാക്കുമ്പോഴോ, ഇഞ്ചി-വെളുത്തുള്ളി പേസ്റ്റ് അരയ്ക്കുമ്പോഴോ, ഉണങ്ങിയ മസാലകൾ പൊടിക്കുമ്പോഴോ, ദോശ മാവ് തയ്യാറാക്കുമ്പോഴോ, ഈ മൾട്ടിടാസ്ക്കർ എപ്പോഴും ഡ്യൂട്ടിയിലുണ്ട്. എന്നാൽ നമ്മളിൽ പലരും നിശ്ശബ്ദമായി സഹിക്കുന്ന ഒരു പ്രശ്നമുണ്ട്:
ജാറിന് ഒരുതരം ദുർഗന്ധം വന്നു തുടങ്ങും. ചിലപ്പോൾ അത് പൂപ്പൽ മണമായിരിക്കും, ചിലപ്പോൾ പുളിച്ച മണമായിരിക്കും – നിർഭാഗ്യവശാൽ ഈ മണം അവിടെത്തന്നെ തങ്ങിനിൽക്കും.
ജാറുകൾ വൃത്തിയാക്കിയാലും മണം മാറാതെ നിൽക്കും- കാരണം എന്താണ്?
ശരിയായ രീതിയിൽ ഉണക്കാത്തതാണ് കാരണം. ഈ ചെറിയ പിഴവ് നിങ്ങളുടെ ദിവസേനയുള്ള ഭക്ഷണത്തിൽ ബാക്ടീരിയകൾക്കും, പൂപ്പലിനും, തുരുമ്പിനും കടന്നു കയറാൻ വഴിയൊരുക്കും.
ഈർപ്പം എങ്ങനെ പ്രശ്നമാകുന്നു
ദുർഗന്ധത്തിന് കാരണം വെളുത്തുള്ളി, ഇഞ്ചി, അല്ലെങ്കിൽ മസാലകളുടെ അവശിഷ്ടങ്ങളാണെന്ന് എളുപ്പത്തിൽ കുറ്റപ്പെടുത്താൻ സാധിക്കും. എന്നാൽ യഥാർത്ഥ പ്രശ്നം ഈർപ്പമാണ്. നിങ്ങൾ നനഞ്ഞ സാധനങ്ങൾ അരയ്ക്കുമ്പോൾ, ബ്ലേഡിന്റെ അസംബ്ലിയിലേക്ക് വെള്ളം ഒളിച്ചുകടക്കുന്നു, മൂടിയുടെ (Lid) ഗ്രൂവുകളിൽ ഒളിഞ്ഞിരിക്കുന്നു, റബ്ബർ റിംഗിൽ പറ്റിപ്പിടിക്കുന്നു. ഈ ഈർപ്പം ശരിയായി നീക്കം ചെയ്തില്ലെങ്കിൽ, ബാക്ടീരിയകൾക്കും പൂപ്പലിനും വളരാനുള്ള മികച്ച അന്തരീക്ഷം അത് സൃഷ്ടിക്കുന്നു. അതിലുപരി, ഇത് ബ്ലേഡുകൾ തുരുമ്പെടുക്കുന്നതിലേക്ക് നയിച്ചേക്കാം, ഇത് ദുർഗന്ധത്തെ മാത്രമല്ല, നിങ്ങൾ അടുത്തതായി അരയ്ക്കുന്ന ഭക്ഷണത്തിൻ്റെ രുചിയെയും ബാധിക്കും.
വേഗത്തിലുള്ള കഴുകലും തുടയ്ക്കലും മതിയാകാത്തതിൻ്റെ കാരണങ്ങൾ
- ടവലുകളിൽ, പ്രത്യേകിച്ച് വീണ്ടും ഉപയോഗിക്കുന്നതോ നനഞ്ഞതോ ആയ ടവലുകളിൽ, പതിവായി വൃത്തിയാക്കിയില്ലെങ്കിൽ ബാക്ടീരിയകൾ ഉണ്ടാകാം.
- ബ്ലേഡ് അസംബ്ലിയും മൂടിയുടെ ഗ്രൂവുകളും വെറുമൊരു തുണി കൊണ്ട് എത്തിപ്പെടാൻ പ്രയാസമുള്ള ഭാഗങ്ങളാണ്.
- ജാറിൻ്റെ പുറംഭാഗം ഉണങ്ങിയതായി തോന്നിയാലും, ഒളിഞ്ഞുകിടക്കുന്ന മൂലകളിൽ ഈർപ്പം പലപ്പോഴും നിലനിൽക്കും. ആ ബാക്കിയുള്ള ഈർപ്പമാണ് പിന്നീട് പ്രശ്നമുണ്ടാക്കുന്നത്.
മിക്സി ജാറിന് ദുർഗന്ധം ഉണ്ടാകുന്നത് എങ്ങനെ തടയാം?
അധികം പരിശ്രമം ഇല്ലാത്ത ഒരു പരിഹാരമാണ് നിങ്ങൾക്ക് വേണ്ടതെങ്കിൽ നിങ്ങളുടെ ജാറിനെ ‘ശ്വാസം വിടാൻ’ അനുവദിക്കുക. ജാറും അതിൻ്റെ മൂടിയും സംഭരിക്കുന്നതിന് മുൻപ് പൂർണ്ണമായും ഉണങ്ങാൻ എപ്പോഴും അനുവദിക്കുക.
മിക്സർ ഗ്രൈൻഡർ ജാറുകൾ പൂർണ്ണമായും ഉണക്കാനും ദുർഗന്ധം തടയാനുമുള്ള 3 എളുപ്പ വഴികൾ
ദുർഗന്ധവും ഈർപ്പവും ഇല്ലാതാക്കാൻ ഈ ഉണക്കൽ രീതികളിൽ ഒന്ന് പരീക്ഷിക്കുക:
- സൂര്യപ്രകാശത്തിൽ ഉണക്കൽ (Sun-Dry Method): ജാറും മൂടിയും തുറന്ന്, നേരിട്ടുള്ള സൂര്യപ്രകാശത്തിൽ 10-15 മിനിറ്റ് വെക്കുക. സൂര്യപ്രകാശം നന്നായി ഉണക്കുക മാത്രമല്ല, പ്രകൃതിദത്തമായ ആൻ്റി ബാക്ടീരിയൽ ഗുണങ്ങളുള്ളതുമാണ്.
- ടിഷ്യൂവും ഫാനും ഉപയോഗിച്ചുള്ള വിദ്യ (Tissue-And-Fan Hack): ജാറ് തലകീഴായി ഒരു വൃത്തിയുള്ള ടിഷ്യൂ പേപ്പറിലോ ഉണങ്ങിയ തുണിയിലോ ഒരു ഫാനിൻ്റെ അടിയിൽ വെക്കുക. വായുസഞ്ചാരം ഉണങ്ങൽ പ്രക്രിയ വേഗത്തിലാക്കാൻ സഹായിക്കുന്നു, ബ്ലേഡുകൾക്ക് അടുത്തുള്ള ഈർപ്പം ടിഷ്യൂ വലിച്ചെടുക്കുകയും ചെയ്യും.
- സ്പിൻ-ഡ്രൈ ട്രിക്ക്: കഴുകിയ ശേഷം, മൂടി ഉറപ്പിച്ച് ജാർ (ഒന്നും ഇടാതെ) അഞ്ച് സെക്കൻഡ് നേരത്തേക്ക് മിക്സിയിൽ ഓടിക്കുക. വേഗത്തിലുള്ള കറക്കം ഒളിഞ്ഞിരിക്കുന്ന ജലത്തുള്ളികളെ പുറത്തേക്ക് തെറിപ്പിക്കും. അതിനുശേഷം ഒരു ടിഷ്യൂ ഉപയോഗിച്ച് തുടയ്ക്കുക, ജാർ എപ്പോഴും മൂടി ലൂസായി തുറന്നുവെച്ച് സൂക്ഷിക്കുക.
നിങ്ങൾ ജാർ നന്നായി ഉണക്കിയാലും, ആഴ്ചയിലൊരിക്കൽ ഒരു ആഴത്തിലുള്ള ശുചീകരണം എല്ലാം പുതിയതും ശുചിത്വമുള്ളതുമായി നിലനിർത്താൻ സഹായിക്കും. ഫലപ്രദമായ ഒരു DIY (നമുക്ക് സ്വന്തമായി ചെയ്യാൻ കഴിയുന്ന) പരിഹാരം ഇതാ:
- 1 ടീസ്പൂൺ വൈറ്റ് വിനാഗിരിയും അര ടീസ്പൂൺ ബേക്കിംഗ് സോഡയും കലർത്തുക.
- ഈ മിശ്രിതം ജാറിനുള്ളിൽ പുരട്ടി 10-15 മിനിറ്റ് വെക്കുക.
- സാവധാനം ഉരച്ച്, ചൂടുവെള്ളത്തിൽ കഴുകുക, നന്നായി ഉണക്കുക.ഈ രീതി കഠിനമായ ദുർഗന്ധം ഇല്ലാതാക്കാനും ബാക്കിയുള്ള ഭക്ഷണാവശിഷ്ടങ്ങൾ നീക്കം ചെയ്യാനും സഹായിക്കുന്നു.അടുത്ത തവണ നിങ്ങൾ പുതിന ചട്ണിയോ ഗരം മസാലയോ തയ്യാറാക്കുമ്പോൾ, വൃത്തിയാക്കിയ ശേഷം കുറച്ച് അധിക സമയം എടുക്കുക. ജാറ് പൂർണ്ണമായും ഉണങ്ങാൻ അനുവദിക്കുക.
