ലോകമെമ്പാടും വൃക്കരോഗികളുടെ എണ്ണം ഭയാനകമാംവിധം വർദ്ധിച്ചുകൊണ്ടിരിക്കുകയാണ്. ഇന്റർനാഷണൽ സൊസൈറ്റി ഓഫ് നെഫ്രോളജിയുടെ കണക്കനുസരിച്ച്, ലോകമെമ്പാടും 85 കോടിയിലധികം ആളുകൾ വിവിധ തരം വൃക്കരോഗങ്ങളാൽ ബുദ്ധിമുട്ടുന്നുണ്ട്. പ്രമേഹം, ഉയർന്ന രക്തസമ്മർദ്ദം എന്നിവ വർദ്ധിക്കുന്നതാണ് ഇതിന് പ്രധാന കാരണം. രക്തത്തിലെ മാലിന്യങ്ങളും അധിക ദ്രാവകവും നീക്കം ചെയ്യുക, രക്തസമ്മർദ്ദം നിയന്ത്രിക്കുക, ഇലക്ട്രോലൈറ്റുകളുടെ അളവ് ക്രമീകരിക്കുക, ഹോർമോണുകൾ ഉത്പാദിപ്പിക്കുക എന്നിങ്ങനെ ശരീരത്തിലെ സുപ്രധാന ധർമ്മങ്ങളാണ് വൃക്കകൾ നിർവ്വഹിക്കുന്നത്. അതിനാൽ വൃക്കകളുടെ ആരോഗ്യം സംരക്ഷിക്കേണ്ടത് അത്യന്താപേക്ഷിതമാണ്.
വൃക്കരോഗങ്ങൾ നേരത്തെ തിരിച്ചറിഞ്ഞാൽ ചികിത്സയും ഫലപ്രാപ്തിയും എളുപ്പമാകും. എന്നാൽ ‘ക്രോണിക് കിഡ്നി ഡിസീസ്’ (Chronic Kidney Disease) ഉള്ളവരിൽ പലപ്പോഴും പ്രകടമായ ലക്ഷണങ്ങൾ ആദ്യഘട്ടത്തിൽ കാണാറില്ല. നമ്മുടെ ദൈനംദിന ശീലങ്ങളിൽ മാറ്റം വരുത്തിയാൽ വൃക്കരോഗ സാധ്യത ഒരു പരിധിവരെ കുറയ്ക്കാൻ സാധിക്കും. 40 വയസ്സ് കഴിഞ്ഞ സ്ത്രീകളുടെ വൃക്കരോഗ സാധ്യത വർദ്ധിപ്പിക്കുന്ന ചില ശീലങ്ങളെക്കുറിച്ച് അമേരിക്കൻ ഡോക്ടറായ ജോൺ വാലന്റൈൻ ഇൻസ്റ്റാഗ്രാമിലൂടെ പങ്കുവെച്ച വിവരങ്ങൾ താഴെ പറയുന്നവയാണ്.
വൃക്കകളെ നശിപ്പിക്കുന്ന ദൈനംദിന ശീലങ്ങൾ
- ഐബുപ്രൂഫിൻ (Ibuprofen) അമിത ഉപയോഗം
വേദനസംഹാരിയായി ഉപയോഗിക്കുന്ന ഐബുപ്രൂഫിൻ പോലുള്ള എൻ.എസ്.എ.ഐ.ഡി (NSAID) മരുന്നുകൾ വൃക്കകളിലേക്കുള്ള രക്തപ്രവാഹം കുറയ്ക്കുന്നു. ഇത് കാലക്രമേണ വൃക്കകളുടെ പ്രവർത്തനത്തെ ബാധിക്കും. ഇത്തരം മരുന്നുകളുടെ അമിത ഉപയോഗം വൃക്കകളെ സ്ഥിരമായി നശിപ്പിക്കുമെന്നും ആഴ്ച്ചയിൽ മൂന്ന് തവണ ഡയാലിസിസ് ചെയ്യേണ്ടി വരുന്ന അവസ്ഥയിലേക്ക് എത്തിക്കുമെന്നും ഡോ. വാലന്റൈൻ മുന്നറിയിപ്പ് നൽകുന്നു. രക്തസമ്മർദ്ദം പോലുള്ള പ്രശ്നങ്ങളുള്ള 40 കഴിഞ്ഞ സ്ത്രീകൾ ഇത്തരം മരുന്നുകൾ ഡോക്ടറുടെ നിർദ്ദേശപ്രകാരം മാത്രം കുറഞ്ഞ അളവിൽ ഉപയോഗിക്കാൻ ശ്രദ്ധിക്കണം.
- ആവശ്യത്തിന് വെള്ളം കുടിക്കാതിരിക്കുക
ശരീരത്തിൽ ജലാംശം കുറയുന്നത് വൃക്കകളിൽ കല്ലുകൾ ഉണ്ടാകാനും അണുബാധയ്ക്കും കാരണമാകുന്നു. വിട്ടുമാറാത്ത നിർജ്ജലീകരണം ടോക്സിനുകൾ അടിഞ്ഞുകൂടാൻ കാരണമാവുകയും ഇത് സെപ്സിസ് (Sepsis) പോലുള്ള ഗുരുതരമായ അവസ്ഥകളിലേക്കും മരണത്തിലേക്കും വരെ നയിച്ചേക്കാം. കാലാവസ്ഥയും ശാരീരിക അധ്വാനവും പരിഗണിച്ച് ദിവസവും 8-10 ഗ്ലാസ് വെള്ളമെങ്കിലും കുടിക്കാൻ ശ്രമിക്കുക.
- അമിതമായ പ്രോട്ടീൻ ഉപയോഗം
പ്രോട്ടീൻ അത്യാവശ്യ ഘടകമാണെങ്കിലും അമിതമായാൽ അത് വൃക്കകളെ ദോഷകരമായി ബാധിക്കും. ഹൈ-പ്രോട്ടീൻ ഡയറ്റുകൾ വൃക്കകൾക്ക് അമിത ജോലിഭാരം നൽകുന്നു. 40 വയസ്സിന് ശേഷം ഇത് തിരുത്താനാകാത്ത പ്രത്യാഘാതങ്ങൾ ഉണ്ടാക്കുകയും വൃക്ക മാറ്റിവെക്കൽ ശസ്ത്രക്രിയ ആവശ്യമായി വരുന്ന അവസ്ഥയിലേക്ക് എത്തിക്കുകയും ചെയ്തേക്കാം.
- ഇടയ്ക്കിടെയുള്ള മൂത്രമൊഴിക്കൽ
രാത്രികാലങ്ങളിൽ ഇടയ്ക്കിടെ മൂത്രമൊഴിക്കുന്നത് വൃക്കകളുടെ ഫിൽട്ടറിംഗിൽ തകരാർ സംഭവിക്കുന്നതിന്റെ ലക്ഷണമാകാം. പല സ്ത്രീകളും ഇത് ഗൗരവമായി എടുക്കാറില്ല. നാഷണൽ കിഡ്നി ഫൗണ്ടേഷന്റെ അഭിപ്രായത്തിൽ, വൃക്കയിലെ ഫിൽട്ടറുകൾക്ക് കേടുപാടുകൾ സംഭവിക്കുമ്പോൾ മൂത്രമൊഴിക്കാനുള്ള തോന്നൽ വർദ്ധിക്കാം. ഇത് മൂത്രനാളിയിലെ അണുബാധയുടെ (UTI) ലക്ഷണവുമാകാം.
- മൂത്രം പിടിച്ചുനിർത്തുന്നത്
മൂത്രം പിടിച്ചുനിർത്തുന്ന ശീലം ബ്ലാഡറിൽ ബാക്ടീരിയകൾ വളരാൻ കാരണമാവുകയും ഇത് വൃക്കകളിൽ അണുബാധ ഉണ്ടാക്കുകയും ചെയ്യുന്നു. 40 കഴിഞ്ഞ സ്ത്രീകളിൽ ബ്ലാഡർ-കിഡ്നി പ്രവർത്തനക്ഷമത വേഗത്തിൽ കുറയുന്നതിനാൽ ഈ ശീലം വലിയ ആഘാതമുണ്ടാക്കും. ഏകദേശം 93 ശതമാനം സ്ത്രീകളും ഇതിന്റെ അപകടസാധ്യത അറിയാതെ മൂത്രം പിടിച്ചുനിർത്താറുണ്ട്. ഇത് വൃക്കരോഗ സാധ്യത അഞ്ച് മടങ്ങ് വർദ്ധിപ്പിക്കുന്നു. വിട്ടുമാറാത്ത അണുബാധകൾ വൃക്കയിൽ വടുക്കൾ (Scarring) ഉണ്ടാക്കുകയും സ്ഥിരമായ വൃക്കസ്തംഭനത്തിലേക്ക് നയിക്കുകയും ചെയ്യും. ഒരിക്കൽ വൃക്കകൾ തകരാറിലായാൽ ആജീവനാന്ത ഡയാലിസിസ് അല്ലെങ്കിൽ അവയവ മാറ്റിവെക്കൽ മാത്രമേ പോംവഴിയുള്ളൂ.
