ഏഷ്യാ കപ്പ് സൂപ്പർ ഫോറില് ഇന്ത്യയ്ക്കെതിരെ മത്സരത്തിൽ അർധസെഞ്ചറി തികച്ചതിനു പിന്നാലെ പാക്കിസ്ഥാൻ താരം സാഹിബ്സാദ ഫർഹാൻ കാണിച്ച ‘തോക്കുകൊണ്ട് വെടിവെക്കുന്ന’ രീതിയിലുള്ള ആംഗ്യം സമൂഹമാധ്യമങ്ങളിൽ ചർച്ചയായി. അർധസെഞ്ചറി തികച്ചതിനു പിന്നാലെ ബാറ്റു കൊണ്ട് വെടിയുതിർക്കുന്നതു പോലെയുള്ള ആംഗ്യമാണ് സാഹിബ്സാദ കാണിച്ചത്. ഈ ദൃശ്യങ്ങൾ സമൂഹമാധ്യമങ്ങളിൽ വൈറലായി.
അക്സർ പട്ടേലിന്റെ പന്തിൽ ഒരു കൂറ്റൻ സിക്സറടിച്ചാണ് ഫർഹാൻ തന്റെ അർദ്ധ സെഞ്ച്വറി തികച്ചത്. അഞ്ച് ബൗണ്ടറികളും മൂന്ന് സിക്സറുകളും ഉൾപ്പെടെ ഇന്ത്യയുടെ മികച്ച സ്പിൻ ആക്രമണത്തിനെതിരെ അദ്ദേഹം ഒരു മികച്ച ഇന്നിംഗ്സാണ് കളിച്ചത്. ഈ അർദ്ധ സെഞ്ച്വറി പാകിസ്താനെ ആദ്യ 10 ഓവറിൽ 91 റൺസ് നേടാൻ സഹായിച്ചു. എന്നാല് ഏഷ്യാകപ്പില് ഇന്ത്യ ആറു വിക്കറ്റിന് വിജയിച്ചു. ജയിക്കാന് 172 റണ്സ് വേണ്ടിയിരുന്ന ഇന്ത്യ 18.5 ഓവറില് നാലു വിക്കറ്റ് നഷ്ടത്തില് ലക്ഷ്യം കണ്ടു.
ആദ്യം പതുക്കെ തുടങ്ങിയ ഫർഹാൻ ഓപ്പണിംഗ് പങ്കാളി ഫഖർ സമാൻ പുറത്തായതിന് ശേഷം ആക്രമിച്ചു കളിക്കുകയായിരുന്നു. 34 പന്തിലാണ് ഫർഹാൻ അർദ്ധ സെഞ്ച്വറി തികച്ചത്. ഫീൽഡിംഗിനിടെ അഭിഷേക് ശർമ്മ രണ്ട് തവണ വിട്ടുകളഞ്ഞതിനാൽ ഫർഹാന് രണ്ട് ജീവൻ ലഭിച്ചു.
ഏഴ് ദിവസം മുമ്പ് ഇന്ത്യക്കെതിരെ നടന്ന മത്സരത്തിൽ 44 പന്തിൽ 40 റൺസെടുത്ത ഫർഹാന്റെ പ്രകടനത്തിൽ നിന്ന് വളരെ വ്യത്യസ്തമായിരുന്നു ഈ ഇന്നിംഗ്സ്. ഏഷ്യാ കപ്പ് 2025-ൽ ഇന്ത്യയും പാകിസ്താനും തമ്മിലുള്ള രണ്ടാമത്തെ മത്സരമാണിത്. ഗ്രൂപ്പ് ഘട്ടത്തിൽ ഇരു ടീമുകളും ഏറ്റുമുട്ടിയപ്പോൾ ഇന്ത്യ ആധിപത്യം പുലർത്തി വിജയിച്ചിരുന്നു.
2025 ഏപ്രിലിൽ ജമ്മു കശ്മീരിലെ പഹൽഗാമിൽ 26 സാധാരണക്കാർ കൊല്ലപ്പെട്ട ഭീകരാക്രമണത്തിന് പിന്നാലെ ഇരു രാജ്യങ്ങളും തമ്മിലുള്ള അതിർത്തിയിലെ വെടിവെപ്പും, കടുത്ത രാഷ്ട്രീയ സംഘർഷങ്ങളുമാണ് ഇപ്പോൾ നിലനിൽക്കുന്നതെന്നത് ശ്രദ്ധേയമാണ്.
ക്രിക്കറ്റ് മൈതാനത്തും ഇരു ടീമുകളും തമ്മിലുള്ള ശത്രുത പ്രകടമായിരുന്നു. രണ്ടു കളികളിലും മത്സരത്തിന് ശേഷം സൂര്യകുമാർ യാദവിന്റെ നേതൃത്വത്തിലുള്ള ഇന്ത്യ, സൽമാൻ അലി ആഗയുടെ നേതൃത്വത്തിലുള്ള പാകിസ്താനുമായി ഹസ്തദാനം ചെയ്യാനോ മത്സരത്തിന് ശേഷമുള്ള സൗഹൃദപരമായ കാര്യങ്ങൾക്കോ തയ്യാറായില്ല.
