ഇറാൻ യുദ്ധത്തെത്തുടർന്ന് ആഗോള വിപണികൾ വലിയ അനിശ്ചിതത്വത്തിലൂടെയാണ് കടന്നുപോകുന്നത്. യുദ്ധം എണ്ണ വിതരണത്തെ ബാധിച്ചതോടെ ഓഹരി വിപണിയിൽ വലിയ ഇടിവുണ്ടായി. സാധാരണഗതിയിൽ ഇത്തരം പ്രതിസന്ധി ഘട്ടങ്ങളിൽ നിക്ഷേപകർ സുരക്ഷിത നിക്ഷേപങ്ങളായി കാണുന്നത് സ്വർണ്ണത്തെയും യുഎസ് ഡോളറിനെയുമാണ്. എന്നാൽ ഇത്തവണ ഇവയെ രണ്ടിനെയും പിന്നിലാക്കി ബിറ്റ്കോയിൻ വലിയ നേട്ടമുണ്ടാക്കുന്ന കാഴ്ചയാണ് കാണുന്നത്.
ഫെബ്രുവരി 28-ന് ഇറാനിൽ സംഘർഷം ആരംഭിച്ചത് മുതൽ ബിറ്റ്കോയിന്റെ മൂല്യം 72,000 ഡോളർ കടന്നു. ഏകദേശം 10 ശതമാനത്തോളം വർധനവാണ് ബിറ്റ്കോയിന്റെ വിലയിൽ ഉണ്ടായത്. ഓഹരി വിപണിയും എണ്ണവിലയും ചാഞ്ചാടി നിൽക്കുന്ന സമയത്താണ് ഈ മുന്നേറ്റമെന്നത് ശ്രദ്ധേയമാണ്. ബാങ്കുകളുടെയോ സർക്കാരുകളുടെയോ നിയന്ത്രണമില്ലാതെ അതിർത്തികൾ കടന്ന് നിമിഷങ്ങൾക്കുള്ളിൽ കൈമാറ്റം ചെയ്യാമെന്നതാണ് പ്രതിസന്ധി ഘട്ടങ്ങളിൽ ബിറ്റ്കോയിന്റെ സ്വീകാര്യത വർധിപ്പിക്കുന്നത്. യുദ്ധസമയത്ത് സ്വർണ്ണം കൈകാര്യം ചെയ്യുന്നതിനോ കൊണ്ടുപോകുന്നതിനോ ഉള്ള പ്രായോഗിക ബുദ്ധിമുട്ടുകളും ഡിജിറ്റൽ ആസ്തികളിലേക്ക് നിക്ഷേപകരെ ആകർഷിക്കുന്നുണ്ട്.
ഐഷെയേഴ്സ് ബിറ്റ്കോയിൻ ട്രസ്റ്റ്, ഫിഡിലിറ്റി വൈസ് ഒറിജിൻ ബിറ്റ്കോയിൻ ഫണ്ട് തുടങ്ങിയവയിലേക്ക് ഇതിനകം 1.1 ബില്യൺ ഡോളറിലധികം നിക്ഷേപം എത്തിയതായാണ് റിപ്പോർട്ടുകൾ. ബിറ്റ്കോയിൻ ഒരു സുരക്ഷിത നിക്ഷേപമാണോ എന്ന കാര്യത്തിൽ വിദഗ്ധർക്കിടയിൽ ഇപ്പോഴും അഭിപ്രായ വ്യത്യാസമുണ്ട്. എങ്കിലും, റഷ്യ-യുക്രെയ്ൻ യുദ്ധം, കോവിഡ് കാലം തുടങ്ങിയ പ്രതിസന്ധികളിലെല്ലാം ബിറ്റ്കോയിൻ വ്യാപാരത്തിൽ വലിയ വർധനവ് രേഖപ്പെടുത്തിയിട്ടുണ്ട്. സ്വർണ്ണം പോലെ പാരമ്പര്യമായി വിശ്വസിക്കാവുന്ന ഒന്നായി ബിറ്റ്കോയിൻ മാറിയിട്ടില്ലെങ്കിലും, ആധുനിക കാലത്തെ ഒരു ബദൽ നിക്ഷേപമായി പലരും ഇതിനെ കാണുന്നു.
അതേസമയം, യുദ്ധകാലത്ത് സാധാരണയായി വില വർധിക്കാറുള്ള സ്വർണ്ണത്തിന് ഇത്തവണ പ്രതീക്ഷിച്ച മുന്നേറ്റം നടത്താൻ കഴിഞ്ഞിട്ടില്ല. യുഎസ് ഡോളർ ശക്തിപ്പെട്ടതാണ് സ്വർണ്ണത്തിന് തിരിച്ചടിയായത്. ഡോളർ കരുത്താർജിക്കുമ്പോൾ മറ്റു കറൻസികൾ ഉപയോഗിക്കുന്നവർക്ക് സ്വർണ്ണം വാങ്ങുന്നത് കൂടുതൽ ചെലവേറിയതാകുന്നു. കൂടാതെ, വർധിച്ചുവരുന്ന പണപ്പെരുപ്പം കാരണം പലിശനിരക്ക് കുറയാൻ സാധ്യതയില്ലെന്ന വിലയിരുത്തലും സ്വർണ്ണത്തിന്റെ ആകർഷണീയത കുറച്ചു. എന്നാൽ 24 മണിക്കൂറും വ്യാപാരം നടക്കുന്നു എന്നതും വേഗത്തിലുള്ള ലിക്വിഡിറ്റിയും ബിറ്റ്കോയിനെ നിക്ഷേപകരുടെ പ്രിയപ്പെട്ട ഇടമാക്കി മാറ്റിയിരിക്കുകയാണ്.
