ഇൻഡോർ: മേഘാലയയില് മധുവിധു യാത്രയ്ക്കിടെ കൊല്ലപ്പെട്ട ഇൻഡോർ സ്വദേശിയായ വ്യവസായി രാജാ രഘുവൻഷിയുടെ കൊലപാതകത്തെ ആസ്പദമാക്കി സിനിമ നിർമ്മിക്കുന്നതിന് കുടുംബാംഗങ്ങൾ അനുമതി നൽകി. ഇദ്ദേഹത്തിന്റെ ഭാര്യ സോനം, കാമുകൻ എന്ന് സംശയിക്കുന്നയാൾ എന്നിവരുടെ അറസ്റ്റിനെ തുടർന്ന് ഈ കേസ് വലിയ വാർത്തയായിരുന്നു.
എസ്.പി. നിംബാവത്ത് സംവിധാനം ചെയ്യുന്ന ഈ ചിത്രത്തിന് ‘ഹണിമൂൺ ഇൻ ഷില്ലോങ്’ എന്നാണ് താൽക്കാലികമായി പേരിട്ടിരിക്കുന്നത്.
“എന്റെ സഹോദരന്റെ കൊലപാതകത്തെക്കുറിച്ചുള്ള സിനിമയ്ക്ക് ഞങ്ങൾ സമ്മതം നൽകി. ഈ കഥ വലിയ സ്ക്രീനിൽ എത്തിച്ചില്ലെങ്കിൽ ആരാണ് ശരി, ആരാണ് തെറ്റ് എന്ന് ആളുകൾക്ക് അറിയാൻ കഴിയില്ലെന്ന് ഞങ്ങൾ വിശ്വസിക്കുന്നു,” രഘുവൻഷിയുടെ മൂത്ത സഹോദരൻ സച്ചിൻ മാധ്യമങ്ങളോട് പറഞ്ഞു. മേഘാലയയുടെ ശരിയായ ചിത്രം സിനിമയിലൂടെ അവതരിപ്പിക്കാൻ ആഗ്രഹിക്കുന്നുവെന്ന് മറ്റൊരു സഹോദരൻ വിപിൻ പറഞ്ഞു. വിവാഹശേഷം രാജാ രഘുവൻഷിക്ക് വലിയ വഞ്ചന നേരിടേണ്ടി വന്നുവെന്ന് നിംബാവത്ത് പറഞ്ഞു.
“ഞങ്ങളുടെ സിനിമയിലൂടെ ഇത്തരം വഞ്ചനാപരമായ സംഭവങ്ങൾ അവസാനിപ്പിക്കണം എന്ന സന്ദേശം പൊതുജനങ്ങൾക്ക് നൽകാൻ ഞങ്ങൾ ആഗ്രഹിക്കുന്നു,” അദ്ദേഹം കൂട്ടിച്ചേർത്തു.
നടീനടന്മാരുടെ പേരുകൾ വെളിപ്പെടുത്താതെ, സിനിമയുടെ തിരക്കഥ തയ്യാറാണെന്ന് നിംബാവത്ത് പറഞ്ഞു.
“ചിത്രീകരണത്തിന്റെ 80 ശതമാനം ഇൻഡോറിലും ബാക്കി 20 ശതമാനം മേഘാലയയിലെ വിവിധ സ്ഥലങ്ങളിലും നടക്കും,” അദ്ദേഹം കൂട്ടിച്ചേർത്തു.
രാജാ രഘുവൻഷി മെയ് മാസത്തിൽ ഭാര്യ സോനമൊത്ത് മേഘാലയയിലേക്ക് യാത്ര തിരിച്ചിരുന്നു. കാണാതായി ദിവസങ്ങൾക്ക് ശേഷം, ജൂൺ 2-ന് ഈസ്റ്റ് ഖാസി ഹിൽസ് ജില്ലയിലെ സോഹ്റ പ്രദേശത്തെ ഒരു വെള്ളച്ചാട്ടത്തിനടുത്തുള്ള ആഴമേറിയ കൊക്കയിൽ നിന്ന് അദ്ദേഹത്തിന്റെ മൃതദേഹം കണ്ടെത്തി. രാജയുടെ ഭാര്യ സോനം, കാമുകൻ എന്ന് സംശയിക്കുന്ന രാജ് കുശ്വാഹ എന്നിവരുൾപ്പെടെ എട്ടുപേരെ പോലീസ് അറസ്റ്റ് ചെയ്തിരുന്നു.
