പ്രസവശേഷം മാനസികാസ്വാസ്ഥ്യം (postpartum psychosis) ബാധിച്ച 23-കാരിയായ യുവതി തന്റെ 15 ദിവസം പ്രായമുള്ള കുഞ്ഞിനെ ഫ്രിഡ്ജിൽ വെച്ചു. മുത്തശ്ശിയാണ് കുഞ്ഞിനെ ഒരു പോറലുമില്ലാതെ രക്ഷിച്ചത്. ഈ സംഭവം പ്രസവശേഷമുള്ള മാനസികാരോഗ്യത്തെക്കുറിച്ചും ഇതിനെക്കുറിച്ച് അവബോധം നൽകേണ്ടതിന്റെ ആവശ്യകതയെക്കുറിച്ചുമുള്ള ചർച്ചകൾക്ക് വഴി തുറന്നു.
ഉത്തർപ്രദേശിലെ മൊറാദാബാദിലാണ് സംഭവം നടന്നത്. പ്രസവശേഷം മാനസികാസ്വാസ്ഥ്യം ബാധിച്ച 23-കാരിയായ യുവതി തന്റെ 15 ദിവസം പ്രായമുള്ള കുഞ്ഞിനെ ഫ്രിഡ്ജിനകത്ത് വെച്ച് ഉറങ്ങാൻ പോയി. കുഞ്ഞിന്റെ കരച്ചിൽ കേട്ട് മുത്തശ്ശിയാണ് ഫ്രിഡ്ജിനുള്ളിൽ നിന്ന് കുട്ടിയെ രക്ഷിച്ചത്.
മൊറാദാബാദിലെ ജബ്ബാർ കോളനിയിൽ ഭർത്താവിനും ഭർതൃമാതാപിതാക്കൾക്കുമൊപ്പം താമസിക്കുകയായിരുന്നു യുവതി. സെപ്റ്റംബർ 5-ന് കുഞ്ഞ് കരഞ്ഞപ്പോൾ യുവതി അവനെയും എടുത്ത് അടുക്കളയിലേക്ക് പോയി ഫ്രിഡ്ജിനകത്ത് വെച്ചെന്ന് കുടുംബാംഗങ്ങൾ പറയുന്നു. ശേഷം അവൾ മുറിയിലേക്ക് തിരികെ പോയി ഉറങ്ങി. കുറച്ച് കഴിഞ്ഞ് കുഞ്ഞിന്റെ കരച്ചിൽ കേട്ട മുത്തശ്ശി, ശബ്ദം വന്നത് ഫ്രിഡ്ജിന്റെ അടുത്തുന്നാണെന്ന് മനസ്സിലാക്കി കുഞ്ഞിനെ പുറത്തെടുത്തു. കുഞ്ഞിന് പരിക്കൊന്നും പറ്റിയിട്ടില്ലെന്ന് ഡോക്ടർമാർ സ്ഥിരീകരിച്ചതായി ന്യൂസ്18 റിപ്പോർട്ട് ചെയ്യുന്നു.
കുടുംബം ചോദിച്ചപ്പോൾ, “അവൻ ഉറങ്ങാത്തതുകൊണ്ട് ഞാൻ ഫ്രിഡ്ജിൽ വെച്ചു,” എന്നായിരുന്നു യുവതിയുടെ പ്രതികരണം. ഈ മറുപടി കുടുംബത്തെ ഞെട്ടിച്ചു. ആദ്യമൊക്കെ, അമാനുഷിക ശക്തികളാണ് ഇതിന് കാരണമെന്ന് കരുതി അവളെ ഒരു തന്ത്രികിന്റെ അടുത്ത് കൊണ്ടുപോയിരുന്നു. എന്നാൽ ഫലമില്ലെന്ന് കണ്ടപ്പോൾ ഒരു ബന്ധു മാനസികാരോഗ്യ വിദഗ്ദ്ധനെ കാണിക്കാൻ നിർദ്ദേശിച്ചു.തുടർന്ന് അവരെ മാനസിക ചികിത്സയ്ക്കായി ആശുപത്രിയിൽ പ്രവേശിപ്പിച്ചു. പരിശോധനയിൽ പ്രസവശേഷം ഉണ്ടാകുന്ന അപൂർവവും ഗുരുതരവുമായ മാനസിക രോഗമായ ‘പോസ്റ്റ്പാർട്ടം സൈക്കോസിസ്’ ആണെന്ന് ഡോക്ടർമാർ കണ്ടെത്തി.
പ്രസവശേഷമുള്ള മാനസികാരോഗ്യം
പ്രസവശേഷം ഉണ്ടാകുന്ന മാനസികാരോഗ്യ പ്രശ്നങ്ങൾ തീവ്രത കുറഞ്ഞതും കൂടിയതുമാകാമെന്ന് മാനസികാരോഗ്യ വിദഗ്ദ്ധർ പറയുന്നു. പല പുതിയ അമ്മമാർക്കും ‘ബേബി ബ്ലൂസ്’ എന്ന അവസ്ഥ ഉണ്ടാകാറുണ്ട്. ഇത് മാനസികാവസ്ഥയിലുള്ള മാറ്റങ്ങൾ, ക്ഷോഭം എന്നിവ ഉൾക്കൊള്ളുന്നു. ഇത് സാധാരണയായി രണ്ടാഴ്ചക്കുള്ളിൽ മാറുന്നു. എന്നിരുന്നാലും, ചില സ്ത്രീകൾക്ക് പ്രസവശേഷമുള്ള വിഷാദരോഗം ഉണ്ടാകാൻ സാധ്യതയുണ്ട്. ഇത് സ്ഥിരമായ മാനസികാവസ്ഥ, ഉത്കണ്ഠ, കുഞ്ഞുമായി അടുപ്പം തോന്നാതിരിക്കുക എന്നിവയ്ക്ക് കാരണമാകും.
മൊറാദാബാദിലേത് പോലെ ഗുരുതരമായ സാഹചര്യങ്ങളിൽ, ഇത് ‘പോസ്റ്റ്പാർട്ടം സൈക്കോസിസ്’ എന്ന അവസ്ഥയിലേക്ക് മാറിയേക്കാം. ഈ അവസ്ഥയിൽ അമ്മയ്ക്ക് യാഥാർത്ഥ്യബോധം നഷ്ടപ്പെടുകയും, മതിഭ്രമം, ആശയക്കുഴപ്പം, തെറ്റായ തീരുമാനങ്ങൾ എന്നിവയുണ്ടാകാൻ സാധ്യതയുണ്ട്. ഇത് അമ്മയ്ക്കും കുഞ്ഞിനും ഗുരുതരമായ അപകടസാധ്യതകൾ ഉണ്ടാക്കുന്നു.
ലോകാരോഗ്യ സംഘടനയുടെ (WHO) കണക്കനുസരിച്ച്, വികസ്വര രാജ്യങ്ങളിൽ ഏകദേശം 20 ശതമാനം സ്ത്രീകൾക്കും പ്രസവശേഷമുള്ള വിഷാദരോഗം ഉണ്ടാകുന്നു. ‘പോസ്റ്റ്പാർട്ടം സൈക്കോസിസ്’ അപൂർവമാണെങ്കിലും (1,000 പ്രസവങ്ങളിൽ 1-2 സ്ത്രീകൾക്ക് മാത്രം) പ്രസവശേഷമുള്ള വിഷാദരോഗം വളരെ സാധാരണമാണ്.നാഷണൽ ലൈബ്രറി ഓഫ് മെഡിസിൻ നടത്തിയ ഒരു പഠനമനുസരിച്ച്, ഇന്ത്യയിൽ പ്രസവശേഷമുള്ള വിഷാദരോഗത്തിന്റെ തോത് 22 ശതമാനമാണ്. എന്നിട്ടും ഈ അവസ്ഥയെക്കുറിച്ചുള്ള അവബോധം കുറവാണ്.
പല വീടുകളിലും ഈ രോഗലക്ഷണങ്ങളെ തെറ്റിദ്ധരിക്കുകയോ അവഗണിക്കുകയോ ചെയ്യുന്നു. ചിലപ്പോൾ ഇതിന് കാരണം ‘ദുരാത്മാക്കൾ’ ആണെന്ന് അവർ തെറ്റിദ്ധരിക്കുന്നു.മൊറാദാബാദിലെ സംഭവത്തിലും, കുടുംബം തുടക്കത്തിൽ ആത്മീയ ചികിത്സ തേടുകയും പിന്നീട് മാത്രമാണ് വൈദ്യസഹായം തേടിയതും.
