ഹോളിവുഡ് സൂപ്പര്ഹിറ്റുകളില് പെടുന്നതും മരണത്തിന്റെ കഥ പറയുന്നതുമായ ഫൈനല് ഡെസ്റ്റിനേഷന് സിനിമ കണ്ടിട്ടുണ്ടോ? ക്രൊയേഷ്യക്കാരന് ഫ്രാനോ സെലാക്കിന്റെ കഥ ഈ സിനിമ ഓര്മ്മിപ്പിക്കുന്നു. തുടര്ച്ചയായി ഒന്നിനുപുറകെ ഒന്നായി അപകടങ്ങളുടെ ഒരു പരമ്പര നേരിട്ടിട്ടിട്ടും അതില് നിന്നെല്ലാം രക്ഷപ്പെട്ട സെലാക്കിന്റെ ജീവിതവും ഭാഗ്യവും നിങ്ങളെ അമ്പരപ്പിക്കുമെന്ന് ഉറപ്പാണ്.
ഒരു ജീവചരിത്രത്തേക്കാള് ഒരു ബ്ലോക്ക്ബസ്റ്റര് സിനിമ പോലെ തോന്നിക്കുന്ന ഒരു ക്രൊയേഷ്യന് സംഗീത അധ്യാപകനാണ് സെലക്. പലരും ഭാഗ്യവാനായി കണക്കാക്കുമ്പോള് മരണത്തോടടുത്ത ദുരന്തങ്ങളുമായുള്ള ഏറ്റുമുട്ടലുകള് അദ്ദേഹത്തെ ഒരു ഇതിഹാസമാക്കി മാറ്റി. 1929 ല് ജനിച്ച അദ്ദേഹത്തിന് മരണവുമായി ആദ്യമായി ഒരു ബന്ധം ഉണ്ടായത് 1962 ലാണ്. തണുത്തതും നനഞ്ഞതുമായ ഒരു മലയിടുക്കിലൂടെ അദ്ദേഹം ട്രെയിനില് യാത്ര ചെയ്യുമ്പോള് അത് പെട്ടെന്ന് ട്രെയിന് പാളം തെറ്റി ഒരു നദിയിലേക്ക് വീണു. പതിനേഴു പേര് മുങ്ങിമരിച്ചു. എന്നിരുന്നാലും, ഫ്രാനോ ഒടിഞ്ഞ കയ്യില് ഹൈപ്പോഥെര്മിയയുമായി നീന്തി സുരക്ഷിതനായി.
വിമാനാപകടത്തിന്റേതായിരുന്നു അടുത്ത ഊഴം. 1963 ല്, സാഗ്രെബില് നിന്ന് റിജേക്കയിലേക്ക് പറക്കുന്നതിനിടെ, സെലക് സഞ്ചരിച്ചിരുന്ന വിമാനത്തിന്റെ വാതില് പറക്കലിന്റെ മധ്യത്തില് തുറന്നു ഫ്രാനോ പുറത്തേക്ക് പോയി. അതിശയകരമെന്നു പറയട്ടെ, അദ്ദേഹം ഒരു വൈക്കോല് കൂനയില് വന്നു വീണപ്പോള് വിമാനം തകര്ന്നു മരിച്ചത് 19 പേരായിരുന്നു. ചെറിയ പരിക്കുകളോടെ അദ്ദേഹം മാത്രം രക്ഷപ്പെട്ടു.
മൂന്ന് വര്ഷത്തിന് ശേഷം, അദ്ദേഹം മുഖാമുഖം കണ്ടത് ബസപകടമാണ്. ഫ്രാനോ സഞ്ചരിച്ചിരുന്ന ബസ് റോഡില് നിന്ന് ഒരു നദിയിലേക്ക് തെന്നിമാറി വീണു. നാല് പേര് മുങ്ങിമരിച്ചു. ഒരു പരിക്കുമേല്ക്കാതെ ഫ്രാനോ വീണ്ടും നീന്തി കരയിലെത്തി. രണ്ടു തവണ കാര് കത്തിയിട്ടും ഫ്രാനോയെ പിടികൂടാന് മരണത്തിന് കഴിഞ്ഞില്ല. 1970-ല്, വാഹനമോടിക്കുന്നതിനിടെ, അദ്ദേഹത്തിന്റെ കാര് എഞ്ചിന് തീപിടിച്ച് പൊട്ടിത്തെറിച്ചു. കൃത്യസമയത്ത് അദ്ദേഹം രക്ഷപ്പെട്ടു. 1973-ല് അദ്ദേഹം യാത്ര ചെയ്ത മറ്റൊരു കാറിനും തീ പിടിച്ചു. ഇത്തവണ എയര് വെന്റുകളിലൂടെ അദ്ദേഹം രക്ഷപ്പെട്ടപ്പോള് ആകെയുണ്ടായ പരിക്ക് മുടി അല്പ്പം കരിഞ്ഞു അത്രമാത്രം. പക്ഷേ അദ്ദേഹം വീണ്ടും രക്ഷപ്പെട്ടു.
1995-ല് അദ്ദേഹത്തിനെ ഒരു ബസ് ഇടിച്ചുവീണെങ്കിലും അദ്ദേഹം എഴുന്നേറ്റു നടന്നു. 1996-ല്, ഒരു ട്രക്ക് ഒഴിവാക്കാന് ശ്രമിക്കുന്നതിനിടയില് കാര് മറിഞ്ഞു. അദ്ദേഹം കാറില് നിന്ന് തെറിച്ചുപോയി ഒരു മരത്തില് ഇടിച്ചു നിന്നപ്പോള് കാര് 300 അടി താഴെ പൊട്ടിത്തെറിച്ചു. ഇത് അദ്ദേഹത്തിന്റെ ഏഴാമത്തെ അന്തിമ ലക്ഷ്യസ്ഥാന നിമിഷമായിരുന്നു. പക്ഷേ, ഇതും അദ്ദേഹം അതിജീവിച്ചു. ഇത്രയും ദുരന്തത്തെ മുഖാമുഖം കണ്ടിട്ടും രക്ഷപ്പെട്ട അദ്ദേഹത്തിന്റെ ക്ഷമയ്ക്ക് പ്രതിഫലമായി, യഥാര്ത്ഥ ലക്ക് അദ്ദേഹത്തെ തേടി ഒടുവില് വന്നു. 2003-ല് ലോട്ടറിയടിച്ചു.
2003-ല്, 73-ാം വയസ്സില്, ഫ്രാനോ സെലാക്ക് ലോട്ടറിയില് 600,000 പൗണ്ട് (6 കോടിയിലധികം) നേടി. റിപ്ലിയുടെ അഭിപ്രായത്തില്, അദ്ദേഹം ഒരു ആഡംബര വീട് വാങ്ങി, 2010-ല് അത് വിറ്റ് തന്റെ അഞ്ചാമത്തെ ഭാര്യയോടൊപ്പം ലളിതമായ ജീവിതത്തിലേക്ക് മടങ്ങി. 2016-ല് 87-ാം വയസ്സില് തന്റെ ഭാഗ്യത്തിന്റെ കഥകളെ ബാക്കിയാക്കി ഫ്രാനോ സെലക് അന്തരിച്ചു.
