കൂടത്തായി കൊലക്കേസിലെ ഒന്നാം പ്രതിയായ ജോളി ജോസഫ് ഇപ്പോൾ ജയിലിൽ പരീക്ഷാ തിരക്കുകളിലാണ്. കോഴിക്കോട് സബ് ജയിലില് വിചാരണാ തടവുകാരിയായി കഴിഞ്ഞിരുന്ന ജോളിയെ പരീക്ഷ എഴുതുന്നതിനായാണ് കണ്ണൂര് വനിതാ ജയിലിലേക്ക് മാറ്റിയത്. ഇന്ദിരാഗാന്ധി നാഷണല് ഓപ്പണ് യൂണിവേഴ്സിറ്റിയുടെ (ഇഗ്നോ) ബി.എ ഹിസ്റ്ററി രണ്ടാം വര്ഷ വിദ്യാര്ഥിയാണ് ജോളി. ആകെ എഴുതേണ്ട എട്ട് പേപ്പറുകളില് ആറെണ്ണത്തിന്റെ പരീക്ഷ ഇതിനകം കഴിഞ്ഞു. പരീക്ഷകൾ പൂർത്തിയാകുന്നതുവരെ ജോളി കണ്ണൂര് വനിതാ ജയിലില് തന്നെ തുടരുകയും, അതിനുശേഷം കോഴിക്കോടേക്ക് തിരികെ കൊണ്ടുപോവുകയും ചെയ്യും.
കനത്ത സുരക്ഷാ ക്രമീകരണങ്ങളോടെയാണ് ജോളിയെ കണ്ണൂരിലെത്തിച്ചിരിക്കുന്നത്. ജയിലിൽ എത്തുന്നതിന് മുൻപ് പ്രീഡിഗ്രി വിദ്യാഭ്യാസം മാത്രമായിരുന്നു ജോളിയുടെ യോഗ്യത. ജോളിയെ കൂടാതെ സെന്ട്രല് ജയിലിലെ മറ്റൊരു തടവുകാരനും ഇതേ ബിഎ ഹിസ്റ്ററി പരീക്ഷ എഴുതുന്നുണ്ട്.
ഇതോടൊപ്പം തന്നെ സാക്ഷരതാ മിഷന്റെ തുല്യതാ പരീക്ഷയും ജയിലില് വെച്ച് നടക്കുന്നുണ്ട്. ഈ രണ്ട് പരീക്ഷകളിലുമായി ആകെ 35 പേരാണ് നിലവിൽ കണ്ണൂര് ജയിലിലിരുന്ന് പരീക്ഷ എഴുതുന്നത്. ക്രിമിനല് കേസുകളില് ശിക്ഷിക്കപ്പെട്ടവര്ക്കും വിചാരണാ തടവുകാരായി കഴിയുന്നവർക്കും ജീവിതത്തിലെ നല്ല പാതയിലേക്ക് തിരികെ വരാനുള്ള മികച്ചൊരു അവസരമാണ് ഈ പഠനവും പരീക്ഷകളും നൽകുന്നത്.
ജയിലിലുള്ള ഉയര്ന്ന വിദ്യാഭ്യാസ യോഗ്യതയുള്ള തടവുകാര് തന്നെയാണ് മറ്റു തടവുകാര്ക്കായി ക്ലാസുകൾ എടുക്കുന്നത്. കൂടുതല് തടവുകാര് ഇപ്പോള് ജയിലിൽ തുടർപഠനത്തിന് തയ്യാറായി മുന്നോട്ടുവരുന്നുണ്ട്. നിലവിലെ പരീക്ഷകള് കഴിഞ്ഞാലുടൻ എസ് എന് ഓപ്പണ് സര്വകലാശാലയുടെ ബിഎ, ബിബിഎ, എം.കോം, എല്എല്ബി പരീക്ഷകള്ക്കായി തടവുകാര് തയ്യാറെടുപ്പ് തുടങ്ങും.
ജയില് എന്നത് കുറ്റവാളികളെ വെറുതെ തടവില് പാര്പ്പിക്കാനുള്ള ഒരിടം മാത്രമല്ല. ‘പ്രിസണ് ആന്റ് കറക്ഷണല് ഹോം’ എന്നാണ് ഇതിന്റെ ശരിയായ അർത്ഥവും പ്രയോഗവും. തടവുകാരെ ശിക്ഷാകാലാവധി കഴിയുന്നതിന് മുൻപ് അവരുടെ കുറ്റവാസനകൾ മാറ്റിയെടുത്ത്, പുതിയൊരു നല്ല മനുഷ്യനായി സമൂഹത്തിലേക്ക് തിരികെ വിടാനുള്ള ഒരു തിരുത്തൽ കേന്ദ്രമാണ് ജയിലുകള്. പല തടവുകാരും ജയിലിലെ തങ്ങളുടെ നല്ല നടപ്പിലൂടെ ശിക്ഷായിളവ് നേടി പുറത്തിറങ്ങാറുമുണ്ട്.
കുറ്റവാളികള് പുറത്തിറങ്ങി വീണ്ടും കുറ്റകൃത്യങ്ങളിൽ ഏർപ്പെടുന്ന സംഭവങ്ങൾ നിരവധിയാണെങ്കിലും, അതിനിടയിലും ചിലരെങ്കിലും ഇതുപോലെ നല്ലൊരു ജീവിത പാതയിലേക്ക് നീങ്ങുന്നത് ‘പ്രിസണ് ആന്റ് കറക്ഷണല് ഹോം’ എന്ന ആശയത്തെ അന്വര്ഥമാക്കുന്നതാണ്.
