സ്കൂൾ ബസ് ഓടിക്കുന്നതിനിടെ ഡ്രൈവർക്ക് ബോധക്ഷയമുണ്ടായപ്പോൾ, അവസരോചിതമായി ഇടപെട്ട് വലിയ ദുരന്തം ഒഴിവാക്കിയ അഞ്ച് വിദ്യാർത്ഥികളാണ് ഇപ്പോൾ സോഷ്യല് മീഡിയയുടെ ഹീറോകള്. മിസിസിപ്പിയിൽ , ബുധനാഴ്ച രാവിലെ കുട്ടികളുമായി പോവുകയായിരുന്ന ബസ് ഡ്രൈവർ ലിയ ടെയ്ലറിന് പെട്ടെന്ന് ആസ്ത്മ അറ്റാക്ക് ഉണ്ടാവുകയും അവർ ബോധരഹിതയായി സ്റ്റിയറിംഗിലേക്ക് വീഴുകയുമായിരുന്നു. നിയന്ത്രണം നഷ്ടപ്പെട്ട ബസ് റോഡിലൂടെ നീങ്ങുന്നത് കണ്ട് മുൻസീറ്റിലിരുന്ന ഒരു വിദ്യാർത്ഥി ഉടൻ തന്നെ ഓടിയെത്തി സ്റ്റിയറിംഗ് നിയന്ത്രിച്ചു.
ഡ്രൈവർക്ക് ഇടയ്ക്ക് ബോധം തിരിച്ചുകിട്ടിയെങ്കിലും നിമിഷങ്ങൾക്കകം അവർ പിന്നിലേക്ക് മറിഞ്ഞുവീണു. ഈ പരിഭ്രാന്തിക്കിടയിലും പതറാതെ ഒത്തൊരുമയോടെ പ്രവർത്തിച്ച കുട്ടികൾ വലിയൊരു അപകടം ഒഴിവാക്കി. ഒരു വിദ്യാർത്ഥി ബ്രേക്ക് അമർത്തി ബസ് സുരക്ഷിതമായി നിർത്തിയപ്പോൾ, മറ്റൊരു കുട്ടി ഡ്രൈവറുടെ കയ്യിലുണ്ടായിരുന്ന മരുന്ന് നൽകി അവരെ സഹായിച്ചു. മറ്റ് കുട്ടികൾ ഉടൻ തന്നെ ഫോണിലൂടെ അധികൃതരെ വിവരം അറിയിക്കുകയും ചെയ്തു. കുട്ടികളുടെ ഈ ധീരമായ പ്രവർത്തനം ബസിലുണ്ടായിരുന്ന പത്തോളം വിദ്യാർത്ഥികളുടെ ജീവനാണ് രക്ഷിച്ചത്.
വിദ്യാർത്ഥികളുടെ ഈ അസാമാന്യ ധൈര്യത്തെ ഹാൻകോക്ക് മിഡിൽ സ്കൂൾ പ്രിൻസിപ്പൽ മെലിസ സോസിയർ പ്രശംസിച്ചു. അപകടകരമായേക്കാവുന്ന ഒരു സാഹചര്യത്തെ ഏറ്റവും മികച്ച രീതിയിലാണ് ഈ കുട്ടികൾ കൈകാര്യം ചെയ്തതെന്ന് അവർ പറഞ്ഞു. മക്കൻസി ഫിഞ്ച്, ജാക്സൺ കാസ്നേവ്, ഡാരിയസ് ക്ലാർക്ക്, കെയ്ലി ക്ലാർക്ക്, ഡെസ്റ്റിനി കൊർണേലിയസ് എന്നീ അഞ്ച് വിദ്യാർത്ഥികളെയും സ്കൂളിൽ നടന്ന ചടങ്ങിൽ ആദരിച്ചു. രക്ഷാപ്രവർത്തനത്തിന്റെ വീഡിയോ സോഷ്യൽ മീഡിയയിൽ വൈറലായതോടെ ലോകമെമ്പാടുനിന്നും ഇവർക്ക് അഭിനന്ദനങ്ങൾ പ്രവഹിക്കുകയാണ്.
ചികിത്സയ്ക്ക് ശേഷം സുഖം പ്രാപിച്ച ഡ്രൈവർ ലിയ ടെയ്ലർ, തന്റെ ജീവൻ രക്ഷിച്ച കുട്ടികളോട് ഹൃദയം നിറഞ്ഞ നന്ദി രേഖപ്പെടുത്തി. അപ്രതീക്ഷിതമായുണ്ടാകുന്ന അത്യാഹിത ഘട്ടങ്ങളിൽ ശാന്തത പാലിക്കുന്നതും വേഗത്തിൽ തീരുമാനങ്ങൾ എടുക്കുന്നതും എത്രത്തോളം പ്രധാനമാണെന്ന് തെളിയിക്കുന്നതാണ് ഈ സംഭവം. മുതിർന്നവർ പോലും പകച്ചുപോകുന്ന സാഹചര്യത്തിൽ ഈ കൊച്ചു കുട്ടികൾ കാണിച്ച പക്വത ഏവരെയും അത്ഭുതപ്പെടുത്തുന്നതാണ്.
