ചെറുപ്പമായിരിയ്ക്കാന്‍ ആഗ്രഹിയ്ക്കുന്നവരാണ് നമ്മള്‍ എല്ലാവരും. എന്നാല്‍ ചെറുപ്പം നിലനിര്‍ത്തണമെങ്കില്‍ നമ്മള്‍ തന്നെ ശരിയായ ജീവിതശൈലി ഉണ്ടാക്കിയെടുക്കേണ്ടിയിരിയ്ക്കുന്നു. നല്ല പോലെ ആരോഗ്യം നോക്കുന്നവരാണ് നിങ്ങള്‍ എങ്കില്‍ നിങ്ങള്‍ക്ക് നിരവധി ആരോഗ്യശീലങ്ങളും ഉണ്ടായിരിക്കും. ഈ ശീലങ്ങള്‍ എല്ലാവരും പിന്തുടര്‍ന്നാല്‍ എല്ലാവര്‍ക്കും നല്ല യുവത്വം തുളുമ്പുന്ന ശരീരം സ്വന്തമാക്കാന്‍ സാധിക്കും. നമ്മുടെ ശരീരത്തിലെ പഴയ കോശങ്ങള്‍ പോയി പുതിയ കോശങ്ങള്‍ രൂപപ്പെടുന്നത് ചെറുപ്പം നില നിര്‍ത്താന്‍ പ്രധാനമാണ്. എന്നാല്‍ നമ്മുടെ ശരീരത്തിലുണ്ടാകുന്ന ചില ഇന്‍ഫ്ളമേഷന്‍ അഥവാ വീക്കം കാരണം നമ്മുടെ നിറം കുറയും, ഇരുണ്ട നിറം വരും, കണ്ണിന് ചുറ്റും തടിപ്പും കറുപ്പും വരാം, കവിള്‍ തൂങ്ങിപ്പോകും, മുടി പോകും, ചര്‍മത്തില്‍ ചുളിവുകള്‍ വീഴും, കഴുത്തില്‍ കറുപ്പു വീഴും. ഇതെല്ലാം പ്രായമാകുന്നതിന് മുന്‍പേ പ്രായമാകുന്ന തോന്നലുണ്ടാകും. ഇതിന് കാരണമാകുന്ന ചില ശീലങ്ങളുണ്ട്. അവയെ കുറിച്ച് അറിയാം…
* വ്യായാമമില്ലാത്ത ജീവിതരീതി – വ്യായാമമില്ലാത്ത ജീവിതരീതി ചര്‍മകോശങ്ങള്‍ പെട്ടെന്ന് വയസാകുന്നതിന് കാരണമാകുന്നു. ഇതിലൂടെ ചര്‍മത്തിലെ കോശങ്ങള്‍ തൂങ്ങും, മസിലുകള്‍ അയയും, മുഖത്തെ മസിലുകള്‍ തൂങ്ങൂം, താടിയിലെ ചര്‍മം തൂങ്ങും. ശരിയായി വ്യായാമം ചെയ്താല്‍ ചര്‍മത്തിന്റെയും ശരീരത്തിന്റെയും ചെറുപ്പം നില നിര്‍ത്താന്‍ സഹായിക്കും.
* വെളളം കുടിയ്ക്കുന്നത് കുറയുന്നത് – പ്രായക്കൂടുതല്‍ തോന്നിപ്പിയ്ക്കുന്നതിന് പ്രധാന കാരണമാണ് ഇത്. ദിവസവും രണ്ടു മൂന്ന് ലിറ്റര്‍ വെള്ളം കുടിയ്ക്കുക. വെള്ളക്കുറവ് ചര്‍മം വരണ്ടുപോകുന്നതിന് കാരണമാകും. ഇത് ചര്‍മത്തില്‍ ചുളിവുകള്‍ വീഴാന്‍ ഇടയാക്കും.
* കെമിക്കലുകള്‍ അടങ്ങിയ സോപ്പും ക്രീമും – ബ്ലീച്ചിംഗ് ഇഫക്ടുള്ള സോപ്പുകള്‍ ഉണ്ട്, ക്രീമുകള്‍ ഉണ്ട്. ഇതെല്ലാം ചര്‍മത്തിന്റെ ടോണ്‍ പെട്ടെന്ന് കേടാക്കും.
* അമിതമായി വെയില്‍ ഏല്‍ക്കുന്നത് – സൂര്യന്റെ അള്‍ട്രാവയലറ്റ് രശ്മികള്‍ ചര്‍മത്തിന്റെ ടോണ്‍ നശിപ്പിയ്ക്കുന്നതിന് കാരണമാകും. ചര്‍മത്തില്‍ കരുവാളിപ്പുണ്ടാകും. കടുത്ത വെയിലിനെ തടയാനുള്ള വഴികള്‍ ശീലിയ്ക്കുക. സണ്‍സ്‌ക്രീന്‍ ഉപയോഗിയ്ക്കുക, കുട, തൊപ്പി പോലുള്ളവ ഉപയോഗിയ്ക്കുക.
* ഭക്ഷണരീതി – ഫാസ്റ്റ്ഫുഡ് കഴിയ്ക്കുന്നത് ചെറിയ പെണ്‍കുട്ടികളെ വരെ പെട്ടെന്ന് പ്രായക്കൂടുതല്‍ തോന്നിപ്പിയ്ക്കുന്ന അവസ്ഥയില്‍ ആക്കുകയും ചെയ്യുന്നു. ഇതുപോലെ പഞ്ചസാര, ഉപ്പ്, പ്രോസസ് ചെയ്ത ഭക്ഷണങ്ങള്‍ എല്ലാം തന്നെ ദോഷം വരുത്തുന്നവയാണ്.
* മദ്യപാനവും പുകവലിയും – ഇന്നത്തെ കാലത്ത് സ്ത്രീകളും പുരുഷന്മാരും ഒരുപോലെ ഉപയോഗിച്ച് പോരുന്നതാണ് മദ്യം. മദ്യം ശരീരത്തില്‍ ജലാംശം കുറയ്ക്കും. ഇത് ചര്‍മകോശങ്ങളെ വരണ്ടതാക്കും. ചര്‍മത്തില്‍ ചുളിവുകളും പ്രായാധിക്യവും തോന്നിപ്പിയ്ക്കും. ഇതുപോലെ തന്നെയാണ് പുകവലിയും. ഇതും പ്രായക്കൂടുതല്‍ തോന്നിപ്പിയ്ക്കുന്നതിനുള്ള പ്രധാന കാരണമാണ്. ഈ രണ്ടു ശീലങ്ങള്‍ ശരീരത്തിന് ആവശ്യത്തിനുള്ള വൈറ്റമിനുകള്‍ വലിച്ചെടുക്കാന്‍ തടസമായി നില്‍ക്കുന്നു. വൈറ്റമിന്‍ എയും വൈറ്റമിന്‍ ബിയുമെല്ലാം തന്നെ ചര്‍മത്തിന് പ്രധാനമാണ്.
* സ്ട്രെസ് – സ്ട്രെസ് ഹോര്‍മോണ്‍ നമ്മുടെ ശരീരത്തിലെ കൊളാജന്‍ ബ്രേക്കാകുന്നതിന് കാരണമാകുന്നു. കൊളാജനാണ് ചര്‍മത്തിന് ഇറുക്കം നല്‍കുന്നതും ചര്‍മത്തില്‍ ചുളിവുകള്‍ വീഴാതെ തടയുന്നതും. സ്ട്രെസ് ഹോര്‍മോണായ കോര്‍ട്ടിസോള്‍ കൊളാജന്റെ നോര്‍മല്‍ പ്രവര്‍ത്തനത്തെ ബാധിയ്ക്കുന്നത് പ്രായക്കൂടുതല്‍ തോന്നിപ്പിയ്ക്കും.
* നല്ല ഉറക്കം – ഉറക്കക്കുറവും പ്രായക്കൂടുതല്‍ തോന്നിപ്പിയ്ക്കും. ഉറങ്ങുമ്പോള്‍ ചര്‍മത്തിലെ പുതിയ കോശങ്ങള്‍ വരുന്നു, ചര്‍മപ്രവര്‍ത്തനം കൃത്യമായി നടക്കുന്നു. രാത്രി നേരം വൈകി ഉറങ്ങിയാല്‍, ശരിയായി ഉറക്കം കിട്ടിയില്ലെങ്കില്‍ പ്രായക്കുറവ് തോന്നിപ്പിയ്ക്കും.
