ഞായറാഴ്ച നടന്ന നീറ്റ് യുജി (NEET UG) പുനഃപരീക്ഷയില് പരീക്ഷാ ഹാളിലേക്ക് പ്രവേശിക്കുന്നതിന് മുൻപ് ചില വിദ്യാർത്ഥികളോട് അവരുടെ കയ്യിലെ മന്ത്രച്ചരടുകളും കഴുത്തിലെ മാലകളും (കണ്ഠി) അഴിച്ചുമാറ്റാൻ ആവശ്യപ്പെട്ടത് വിവാദത്തിന് കാരണമായി. നാഷണൽ ടെസ്റ്റിംഗ് ഏജൻസി (NTA) രാജ്യവ്യാപകമായി നടത്തിയ മെഡിക്കൽ പ്രവേശന പുനഃപരീക്ഷയ്ക്കായി വിദ്യാർത്ഥികൾ എത്തിയ അഹമ്മദാബാദിലെ ആർ. ജെ. തിബ്രേവാൾ പരീക്ഷാ കേന്ദ്രത്തിലാണ് സംഭവം . നടപടി രക്ഷിതാക്കളുടെയും ഹിന്ദു സംഘടനകളിൽപ്പെട്ട പ്രവർത്തകരുടെയും വലിയ പ്രതിഷേധത്തിന് കാരണമായി. തുടർന്ന് പോലീസ് ഇടപെടുകയും പരീക്ഷാ കേന്ദ്രത്തിന് ചുറ്റും സുരക്ഷ ശക്തമാക്കുകയും ചെയ്തു.
സുരക്ഷാ പരിശോധനയുടെ ഭാഗമായി ചില വിദ്യാർത്ഥികളോട് മന്ത്രച്ചരടുകളും മാലകളും ഊരിവെക്കാൻ ആവശ്യപ്പെട്ടതായി അവിടെയുണ്ടായിരുന്ന രക്ഷിതാക്കൾ പറഞ്ഞു. മതപരമായ ചിഹ്നങ്ങളും ആചാരപരമായ വസ്ത്രങ്ങളും ധരിക്കാൻ അനുവദിക്കുമെന്നും എന്നാൽ ഇവർക്ക് കൂടുതൽ സുരക്ഷാ പരിശോധനകൾ ഉണ്ടായിരിക്കുമെന്നും എൻടിഎ (NTA) അടുത്തിടെ പുറത്തിറക്കിയ നിർദ്ദേശങ്ങളിൽ വ്യക്തമാക്കിയിരുന്നു. ഇങ്ങനെയൊരു നിയമം നിലനിൽക്കെ എന്തുകൊണ്ടാണ് ഈ സാധനങ്ങൾ ഒഴുപ്പിച്ചത് എന്ന് രക്ഷിതാക്കൾ ചോദ്യം ചെയ്തു.
ഹിജാബ് ധരിച്ചെത്തിയ വിദ്യാർത്ഥികളെ പരിശോധനകൾക്ക് ശേഷം പരീക്ഷ എഴുതാൻ അനുവദിച്ചപ്പോൾ, ഹിന്ദു മത ചിഹ്നങ്ങൾ ധരിച്ചവരോട് അത് മാറ്റാൻ ആവശ്യപ്പെട്ടത് വിവേചനപരമാണെന്ന് രക്ഷിതാക്കൾ ആരോപിച്ചു. ഇതേച്ചൊല്ലി പരീക്ഷാ കേന്ദ്രത്തിന് പുറത്ത് രക്ഷിതാക്കളും അധികൃതരും തമ്മിൽ വലിയ വാക്കുതർക്കമുണ്ടായി. തുടർന്ന് ഉദ്യോഗസ്ഥരെത്തി രക്ഷിതാക്കളെ ശാന്തരാക്കുകയും പരീക്ഷ തടസ്സപ്പെടുത്തരുതെന്ന് അഭ്യർത്ഥിക്കുകയും ചെയ്തു.
സംഭവമറിഞ്ഞ് ഹിന്ദു സംഘടനകളിലെ പ്രവർത്തകർ കോളേജിന് മുന്നിൽ തടിച്ചുകൂടി പ്രതിഷേധിച്ചു. എന്നാൽ പരീക്ഷയെ ബാധിക്കാതിരിക്കാൻ പോലീസ് വേഗത്തിൽ ഇടപെടുകയും രണ്ട് പ്രവർത്തകരെ കസ്റ്റഡിയിലെടുക്കുകയും ചെയ്തു. മറ്റുള്ളവരെ പരീക്ഷാ കേന്ദ്രത്തിന് സമീപം കൂട്ടം കൂടാൻ പോലീസ് അനുവദിച്ചില്ല. ഇതിനിടെ മുസ്ലിം സമുദായത്തിൽപ്പെട്ട ചിലരും സ്ഥലത്തെത്തിയിരുന്നെങ്കിലും പോലീസുകാരുമായി സംസാരിച്ചതിന് ശേഷം അവർ അവിടെനിന്ന് മടങ്ങി. സംഘർഷാവസ്ഥ കണക്കിലെടുത്ത് പരീക്ഷ തടസ്സമില്ലാതെ നടത്താൻ കൂടുതൽ പോലീസിനെ സ്ഥലത്ത് വിന്യസിച്ചിരുന്നു.
ജൂൺ 19-ന് എൻടിഎ പുറത്തിറക്കിയ മാർഗ്ഗനിർദ്ദേശങ്ങളിൽ പരീക്ഷയ്ക്ക് വരാവുന്ന വസ്ത്രധാരണത്തെക്കുറിച്ചും സുരക്ഷാ നിയമങ്ങളെക്കുറിച്ചും കൃത്യമായി പറഞ്ഞിട്ടുണ്ടായിരുന്നു. മന്ത്രച്ചരടുകൾ, തലപ്പാവ്, ഹിജാബ് തുടങ്ങിയ മതപരമായ ചിഹ്നങ്ങളും വസ്ത്രങ്ങളും ധരിക്കാൻ വിദ്യാർത്ഥികൾക്ക് അനുവാദമുണ്ടെന്ന് ഇതിൽ വ്യക്തമാക്കിയിരുന്നു. എന്നാൽ ഇത്തരം വസ്ത്രങ്ങളോ ചിഹ്നങ്ങളോ ധരിച്ചെത്തുന്നവർ പരിശോധനകൾക്കായി നിശ്ചിത സമയത്തിന് മുൻപ് തന്നെ പരീക്ഷാ കേന്ദ്രത്തിൽ എത്തണമെന്നും എൻടിഎ നിർദ്ദേശിച്ചിരുന്നു. മതപരമായ ആചാരങ്ങളെ മാനിക്കുന്നതോടൊപ്പം പരീക്ഷയുടെ സുരക്ഷ ഉറപ്പാക്കാനാണ് ഈ നിയമങ്ങൾ ഉണ്ടാക്കിയത്.
രാജ്യത്തുടനീളം കടുത്ത സുരക്ഷാ ക്രമീകരണങ്ങളോടെയാണ് ജൂൺ 21-ലെ നീറ്റ് യുജി പുനഃപരീക്ഷ നടന്നത്. പരീക്ഷാ ഹാളിൽ കയറുന്നതിന് മുൻപ് എല്ലാ ഉദ്യോഗാർത്ഥികളെയും കർശനമായി പരിശോധിച്ചിരുന്നു. പരിശോധനകൾ കാരണം വൈകാതിരിക്കാൻ വിദ്യാർത്ഥികളോട് നേരത്തെ തന്നെ കേന്ദ്രങ്ങളിൽ എത്താൻ എൻടിഎ ആവശ്യപ്പെട്ടിരുന്നു. ഫുൾ സ്ലീവ് വസ്ത്രങ്ങളും മതപരമായ വസ്ത്രങ്ങളും ധരിക്കാൻ അനുവാദമുണ്ടായിരുന്നെങ്കിലും ഇവർക്ക് കൂടുതൽ പരിശോധനകൾ ഉണ്ടായിരുന്നു. പരിശോധന എളുപ്പമാക്കാൻ ചെരുപ്പുകൾ ധരിച്ചെത്താനാണ് നിർദ്ദേശിച്ചിരുന്നത്. പരീക്ഷയിൽ ക്രമക്കേടുകൾ തടയാനാണ് ഈ കർശന നിയമങ്ങളെന്ന് അധികൃതർ വ്യക്തമാക്കി. കനത്ത സുരക്ഷയിൽ പരീക്ഷ അവസാനിച്ച ശേഷവും അനിഷ്ട സംഭവങ്ങൾ ഒഴിവാക്കാൻ പോലീസ് സ്ഥലത്ത് തുടരുകയുണ്ടായി.
