ജീവനക്കാർ കമ്പനി വിട്ട് സ്വന്തമായി സംരംഭങ്ങൾ തുടങ്ങുന്നതിനെ മിക്ക സ്ഥാപകരും എതിർക്കുമ്പോൾ, സ്വന്തം ബിസിനസ്സ് സ്വപ്നങ്ങൾ പിന്തുടരാൻ ജീവനക്കാർക്ക് ശമ്പളത്തോടുകൂടിയ അവധി നൽകി പ്രോത്സാഹിപ്പിക്കുന്ന ഒരു ഇന്ത്യൻ സംരംഭകൻ സമൂഹമാധ്യമങ്ങളിൽ ശ്രദ്ധ നേടുകയാണ്. കർണാടക ആസ്ഥാനമായി പ്രവർത്തിക്കുന്ന ഐഡി ഫ്രഷ് ഫുഡ് ഇന്ത്യയുടെ (iD Fresh Food India) ഗ്ലോബൽ സിഇഒ മുസ്തഫ പി.സിയാണ് തന്റെ ജീവനക്കാർ സ്വന്തം സ്വപ്നങ്ങളെ പിന്തുടരണമെന്നും അർത്ഥവത്തായ കാര്യങ്ങൾ കെട്ടിപ്പടുക്കണമെന്നും ആഗ്രഹിക്കുന്നത്.
തന്റെ എളിയ തുടക്കത്തെക്കുറിച്ച് ലിങ്ക്ഡ്ഇന്നിൽ (LinkedIn) പങ്കുവെച്ച കുറിപ്പിലാണ് മുസ്തഫ ഇക്കാര്യങ്ങൾ വെളിപ്പെടുത്തിയത്. തുടക്കകാലത്ത് തനിക്ക് ഒരുപാട് തെറ്റുകൾ സംഭവിച്ചിട്ടുണ്ടെന്നും, എന്നാൽ തന്റെ ആശയത്തിൽ വിശ്വസിച്ച കുറച്ച് ആളുകൾ നൽകിയ പിന്തുണയാണ് മുന്നോട്ട് പോകാൻ പ്രേരിപ്പിച്ചതെന്നും അദ്ദേഹം കുറിച്ചു.
“ബെംഗളൂരുവിലെ ഒരു ചെറിയ അടുക്കളയിൽ 50,000 രൂപയും ഒരുപാട് ഭയവുമായാണ് ഞങ്ങൾ ഐഡി തുടങ്ങിയത്. ഞങ്ങൾക്ക് തെറ്റുകൾ പറ്റിയിട്ടുണ്ട്. ഉറക്കമില്ലാത്ത രാത്രികളുണ്ടായിട്ടുണ്ട്. എന്നാൽ ഞങ്ങൾക്ക് പോലും പൂർണ്ണമായി വിശ്വാസമില്ലാതിരുന്ന സമയത്ത് ഞങ്ങളിൽ വിശ്വാസമർപ്പിച്ച കുറച്ച് ആളുകൾ ഉണ്ടായിരുന്നതുകൊണ്ടാണ് ഞങ്ങൾ മുന്നോട്ട് പോയത്,” അദ്ദേഹം എഴുതി. പ്രതിസന്ധി ഘട്ടങ്ങളിൽ ആ വിശ്വാസം തനിക്ക് എത്രത്തോളം വിലപ്പെട്ടതായിരുന്നു എന്ന് താൻ മറന്നിട്ടില്ലെന്നും, ഇന്ന് വിജയത്തിലെത്തിയപ്പോൾ അതേ പിന്തുണ തന്റെ ജീവനക്കാർക്കും നൽകാൻ ആഗ്രഹിക്കുന്നുവെന്നും മുസ്തഫ പറഞ്ഞു.
ഐഡി ജീവനക്കാർക്കായുള്ള പുതിയ സംരംഭകത്വ നയത്തിലൂടെ (Entrepreneurship Policy) കമ്പനിയുടെ പങ്കാളിത്ത ശൃംഖല ഉൾപ്പെടെയുള്ള മുഴുവൻ സംവിധാനങ്ങളും ഉപയോഗിക്കാനുള്ള അവസരം, ഐഡി നേതൃത്വ നിരയിൽ നിന്നുള്ള മാർഗ്ഗനിർദ്ദേശങ്ങൾ, സ്വപ്നങ്ങൾ പിന്തുടരുന്ന ആ അനിശ്ചിതത്വം നിറഞ്ഞ ദിവസങ്ങളിൽ ഭാഗികമായ ശമ്പളത്തോടുകൂടിയ അവധി എന്നിവയാണ് വാഗ്ദാനം ചെയ്യുന്നത്.
സ്വന്തം സ്വപ്നങ്ങളെ പിന്തുടരുന്നതിനും സുരക്ഷിതമായ ഒരു ജോലിക്കും ഇടയിൽ ഏതെങ്കിലും ഒന്ന് തിരഞ്ഞെടുക്കാൻ ഒരു ജീവനക്കാരനും നിർബന്ധിതരാകരുതെന്ന് മുസ്തഫ പറഞ്ഞു. സംരംഭം വിജയിച്ചില്ലെങ്കിൽ കമ്പനിയിലേക്ക് തിരിച്ചുവരാനുള്ള സ്വാതന്ത്ര്യവും ജീവനക്കാർക്കുണ്ടായിരിക്കുമെന്ന് അദ്ദേഹം കൂട്ടിച്ചേർത്തു. “ഞങ്ങളുടെ ഏറ്റവും മികച്ച ചില ആളുകളോട് വിട പറയുന്നത് വേദനാജനകമായിരിക്കും. എന്നാൽ ഒരു ദിവസം, അവർ സ്വന്തമായി എന്തെങ്കിലും കെട്ടിപ്പടുക്കുന്നതും ഞങ്ങൾ ഐഡിയിലൂടെ ഉണ്ടാക്കിയതിനേക്കാൾ വലിയ മാറ്റങ്ങൾ സമൂഹത്തിൽ സൃഷ്ടിക്കുന്നതും കാണുന്നത് എന്റെ ഹൃദയത്തെ അഭിമാനം കൊണ്ട് നിറയ്ക്കും. അവർ സ്വന്തം സ്വപ്നങ്ങളെ പിന്തുടരാനും അർത്ഥവത്തായ എന്തെങ്കിലും നിർമ്മിക്കാനും ഞാൻ ആശംസിക്കുന്നു,” മുസ്തഫ പറഞ്ഞു.
ജീവനക്കാരെ സ്വന്തം സംരംഭങ്ങൾ തുടങ്ങാൻ പ്രോത്സാഹിപ്പിക്കുന്ന ആദ്യത്തെ സ്ഥാപകനല്ല മുസ്തഫ. 2021-ൽ ലാറ്റിസ് (Lattice) സഹസ്ഥാപകൻ ജാക്ക് ആൾട്ട്മാൻ, സ്വന്തമായി ബിസിനസ്സ് തുടങ്ങാൻ കമ്പനി വിടുന്ന ഏതൊരു ജീവനക്കാരനും 1,00,000 ഡോളർ നിക്ഷേപം വാഗ്ദാനം ചെയ്തിരുന്നു. ഇ-കൊമേഴ്‌സ് കമ്പനിയായ ടീസ്‌പ്രിംഗിൽ (Teespring) ജോലി ചെയ്തിരുന്ന സമയത്ത് അന്നത്തെ തന്റെ മേലധികാരി നൽകിയ സ്വാതന്ത്ര്യമാണ് ലാറ്റിസ് തുടങ്ങാൻ തന്നെ സഹായിച്ചതെന്നും, അതേ പിന്തുണ പുതിയ തലമുറയിലെ ജീവനക്കാർക്ക് നൽകുക മാത്രമാണ് താൻ ചെയ്തതെന്നും ആൾട്ട്മാൻ വ്യക്തമാക്കിയിരുന്നു.
