ന്യൂസീലൻഡിനെതിരായ രണ്ടാം ട്വന്റി-20 മത്സരത്തിൽ വൈഭവ് സൂര്യവംശി പ്ലെയിങ് ഇലവനിൽ ഇടംപിടിച്ചേക്കുമെന്ന് സൂചന. സൂപ്പർതാരം ഇഷാൻ കിഷന് പേശീവലിവാണെന്നും അടുത്ത മത്സരത്തിൽ കളിക്കാൻ കഴിഞ്ഞേക്കില്ലെന്നും ബാറ്റിങ് കോച്ച് സിതാൻഷു കോട്ടകാണ് വ്യക്തമാക്കിയത്. പേശീവലിവിനെ തുടർന്നാണ് വൺ ഡൗണായി ഇറങ്ങേണ്ടിയിരുന്ന ഇഷാൻ കഴിഞ്ഞ മത്സരത്തിൽ അഞ്ചാമനായി ക്രീസിലെത്തിയതെന്നും അദ്ദേഹം വെളിപ്പെടുത്തി. അതിനാൽ ഇഷാന് പകരം വൈഭവിനെ ടീമിൽ ഉൾപ്പെടുത്തിയേക്കുമെന്നാണ് കരുതുന്നത്.
പലവിധ ഊഹാപോഹങ്ങൾ പുറത്തുവരുന്നുണ്ടെങ്കിലും ഇഷാന് ചെറിയ രീതിയിൽ പേശീവേദന അനുഭവപ്പെട്ടതുകൊണ്ടാണ് ബാറ്റിങ് ഓർഡറിൽ മാറ്റം വരുത്തിയതെന്ന് കോട്ടക് വിശദീകരിച്ചു. ഹേഗ്ലി ഓവലിൽ നടക്കുന്ന മത്സരത്തിൽ ഇഷാൻ കളിച്ചേക്കില്ല. പരുക്കിൽ നിന്ന് മുക്തനായില്ലെങ്കിൽ ഇഷാന് പകരം വൈഭവ് പ്ലെയിങ് ഇലവനിൽ ഉണ്ടാക ഉറപ്പാണ്. മറ്റൊരു താരത്തിനേക്കാളും മുൻഗണന വൈഭവിനായിരിക്കുമെന്നും കോട്ടക് വ്യക്തമാക്കി. ആദ്യ മത്സരത്തിൽ മൂന്നാമനായി തിലക് വർമ ഇറങ്ങിയത് ചർച്ചയായിരുന്നു. മത്സരത്തിൽ തിലക് 11 പന്തിൽ 6 റൺസും അഞ്ചാമതിറങ്ങിയ ഇഷാൻ ഒരു റൺസുമെടുത്ത് പുറത്തായി. ഇഷാന്റെ പരുക്കിന്റെ വിവരം അപ്പോൾ പുറത്തുവന്നിരുന്നില്ല. കിവീസ് ഉയർത്തിയ 226 റൺസ് വിജയലക്ഷ്യം നാല് വിക്കറ്റ് ബാക്കി നിൽക്കെ ഇന്ത്യ മറികടന്നിരുന്നു.
ഏഷ്യൻ ഗെയിംസിലാണ് വൈഭവ് ഒടുവിൽ ഇന്ത്യക്കായി കളിച്ചത്. ടൂർണമെന്റിലെ സെമിഫൈനലിലും ഫൈനലിലും താരം കളിച്ചിരുന്നു. എന്നാൽ പിന്നീട് വെസ്റ്റ് ഇൻഡീസിനെതിരായ അഞ്ച് മത്സരങ്ങളിലും ബെഞ്ചിലിരിക്കാനായിരുന്നു വൈഭവിന്റെ വിധി. അഭിഷേക് ശർമയും സഞ്ജു സാംസണും മികച്ച ഫോമിൽ തുടരുന്നതിനാൽ വൈഭവ് അവസരത്തിനായി കാത്തിരിക്കണമെന്നും നിലവിൽ പ്ലെയിങ് ഇലവനിൽ ഇടമില്ലെന്നും ക്യാപ്റ്റൻ ശ്രേയസ് അയ്യർ കഴിഞ്ഞ ദിവസവും വ്യക്തമാക്കിയിരുന്നു. സ്വന്തം അവസരം വരുന്നത് വരെ താരം ക്ഷമയോടെ കാത്തിരിക്കണമെന്നായിരുന്നു ശ്രേയസിന്റെ നിലപാട്.
ന്യൂസീലൻഡിനെതിരായ ആദ്യ ട്വന്റി-20ക്ക് മുൻപും ശ്രേയസ് അയ്യർ ഇക്കാര്യം ആവർത്തിച്ചിരുന്നു. ടീമിനൊപ്പം സഞ്ചരിക്കാനും വിദേശ പിച്ചുകൾ പരിചയപ്പെടാനും കഴിയുന്നത് വൈഭവിന് ഭാവിയിൽ ഗുണം ചെയ്യുമെന്നും, പിന്നീട് കളിക്കാനിറങ്ങുമ്പോൾ മറ്റുള്ളവർക്ക് വേണ്ട മാർഗനിർദേശം നൽകാൻ ഇതുവഴി സാധിക്കുമെന്നുമായിരുന്നു ക്യാപ്റ്റന്റെ വാക്കുകൾ. കഴിഞ്ഞ ഐപിഎൽ സീസണിൽ രാജസ്ഥാൻ റോയൽസിനായി 776 റൺസാണ് വൈഭവ് അടിച്ചുകൂട്ടിയത്. ഇന്ത്യക്കായി കളിച്ച എട്ട് ട്വന്റി-20 മത്സരങ്ങളിൽ നിന്ന് രണ്ട് അർധ സെഞ്ചറികൾ ഉൾപ്പെടെ 246 റൺസും താരം നേടിയിട്ടുണ്ട്.
